Lawa la a yeke nzoni ti kiri ti bâ azo so asara nzara ti tâ tënë?
1. Sarango adisciple ahunda ti sara nyen?
1 Sarango si azo aga adisciple ahunda ti kiri ti bâ azo kue so afa so ala ye ti hinga ye na ndo ti Royaume ti Jéhovah (Mat. 28:19, 20). Mingi ni, a yeke kapa ti e nga na ti zo so asara nzara ti tâ tënë ni la ayeke mû lege na e ti hinga ngoi so ayeke nzoni ti kiri ti bâ lo. Ngbanga ti nyen a yeke nzoni ti kiri hio na peko ti kozo gango ti e?
2, 3. Ngbanga ti nyen a yeke nzoni ti kiri hio tongana lege ayeke dä?
2 Ngbanga ti nyen ti kiri hio? Kusala ti fango “nzoni tënë ti royaume” aga nduru ti hunzi awe nga futingo ti aye ti ngoi ti fadeso aga nduru awe ti si (Mat. 24:14; 1 Pi. 4:7). Ye oko, so “lango ti salut” angbâ teti azo so asara nzara ti tâ tënë, a lingbi e bi bê na wango so: “Fa tënë ni, ngbâ na ndo ni”. Ye so aye nga ti tene ti kiri hio ti kono nzara ti azo so asara nzara ti tâ tënë tongana lege ayeke dä.—2 aCor. 6:1, 2; 2 Tim. 4:2.
3 Satan ayeke gi nduru nduru ti futi lengo ti Royaume so e lu na yâ ti bê ti mbeni zo so asara nzara ti tâ tënë (Marc 4:14, 15). Mingi ni, azo ti sewa, akamarade ti place ti kua nga na ambeni zo ayeke he ka zo so asara nzara ti tâ tënë. Ti kiri hio ayeke mû lege na e ti maï nzara ti zo ni na ndo ti kozo lisoro so e sara na lo kozoni si ambeni zo awara lege ti mingo ni.
4. Na kozo gango ti e, tongana nyen e lingbi ti zia gere ti mbeni fini vizite?
4 Fa mbeni lango: Kozoni si mo zia zo ni na peko ti kozo tingbingo tere ti ala, a yeke nzoni ti fa lango so mo yeke kiri ti ga. Hunda mbeni tënë so mo yeke kiri ande tënë na ni na ngoi ti vizite ti peko. A yeke nzoni ti mû note na ndo ti ye so ala sara lisoro dä nga ti sû lango so mo yeke kiri na ni. Tongana kapa ti mo amû lege na mo, mo lingbi ti hunda ti kiri na lango ti peko wala akete lango na pekoni. Tongana mo fa tënë na zo ni na mbeni nda-yenga, na zo ni ayeke sara kua na yâ ti yenga, peut-être lo yeke yeda ande ti tene mo kiri mo bâ lo na nda-yenga ti peko. Tongana mo fa mbeni lango, sara kue ti ga na lango ni so.—Mat. 5:37.
5. Tongana nyen ti kiri hio ayeke mû maboko na e ti sara adisciple?
5 E yeke na anzoni nda ti tënë ti kiri hio ti bâ azo so asara nzara ti tâ tënë tongana lege ayeke dä. Tongaso, fa mbeni lango nga kiri hio ndali ti so “ngoi so angbâ ayeke mingi pëpe.” (1 aCor. 7:29). Tongana e kiri hio ti sara vizite na azo so asara nzara ti tënë ti Royaume, angangu so e yeke sara alingbi peut-être ti lë lengo mingi.