Lettre ti Filiale

Aita, awafango tënë ti Royaume:

“Nzapa asala si a ko na a maï.” (1 aCor. 3:6). So ye ti mungo ngia na bê ti bâ guengo na li ni na Bê nga na Do ti Afrika! Na ngoi ti ngu ti kusala 2003, e lingbi ti tene so akodoro ti e kue awara mbeni fini kota wungo so ahon atanga ni kue ti fini wungo ti awafango tënë. Zia e bâ ambeni tapande ni: na avril, Bénin awara ti fani oko ni na yâ mbaï ti lo mbeni kota wungo so ahon atanga ni kue ti awafango tënë so ahon 7 000. Gi na yâ ti oko nze ni so, Cameroun awara mbeni fini wungo so ahon atanga ni kue ti awafango tënë 28 931. Ti Burkina Faso, lo wara mbeni wungo so ahon atanga ni kue ti awafango tënë 1 059 na mai. So ayeke ye ti gonda.

Jéhovah nga kue ayeke deba nzoni na ndo amandango Bible na azo nga na ndo kusala ti pionnier. Na yâ akodoro ti e, tongana a bungbi atondo ti nze oko oko kue, wafango tënë oko oko ayeke na étude oko. So afa so lege ayeke dä ti tene e kiri e wara guengo na li ni na ngoi so ayeke ga, tongana ti so Jésus atene: “I yä lê ti i, i bâ le-kobe ti yaka abe alingbi na fango ni.” (Jean 4:35). Tongana ti so atondo ti e afa, “zia e ngbâ lakue ti tambela mbilimbili na oko lege so.” (aPhil. 3:16, NW ). A yeke mbilimbili ye ti mû wâ na bê ti bâ aita mingi mingi so ayeke ga na popo ti apionnier. Na ndo tënë so, Cameroun awara wungo so ahon atanga ni kue ti apionnier permanent 1 540 na nze ti mars. Na yâ ti oko nze ni so, Togo asi na wungo ti apionnier 777. Mingi ti ala ayeke amaseka, so ambeni na popo ti ala angbâ ti gue na ekole. Zia pendere tapande ti ala amû maboko na ambeni ti bungbi na ala na yâ mbeni kusala so a yeke kiri ti sala ni mbeni pëpe.​—Zo-ti-fa-tene 12:3; 2 Pierre 3:11.

Na yâ ngu ti kusala ti e so ahon, e sala kusala nzoni mingi na ambeti nde nde. A mû na azo so ayeke na nzara ti tâ tënë mbeni kota wungo ti apériodique. Na Cameroun a kangbi apériodique 350 849, na oko ngoi ni, Sénégal awara mbeni fini wungo so ahon atanga ni kue na lege so tongana a bungbi atondo ni kue, wafango tënë oko akangbi apériodique 8 na nze ti avril. Na ti hunzi na ngu ti kusala ni, e to nda ti mbeni kapa ti kusala so ayeke nde na brochure Lege ti fini ti lakue lakue. Gi na Cameroun, a kangbi na akongregation nde nde abrochure so 548 130 na nze ti juin. Azo afa na gigi mbeni kota nzara, nga a to nda ti amandango Bible mingi na azo na yanga-da. Na lege so, lungo na ziango ngu na tele ti ale-kobe ti yingo aduti dä lani na ngu ti kusala 2003.​—1 aCor. 3:6.

Teti e to nda ti ngu ti kusala 2004, e bungbi legeoko na i ti sambela Jéhovah ti ‘sala [ande] si a ko na a maï.’

Aita ti i,

Biröo ti Filiale