TI MÛ MABOKO NA ASEWA | MARIAGE
Tongana nyen la mo lingbi ti kanga bê na koli wala wali ti mo
“Lâ oko oko, aye mingi ayeke si so na yâ ni mbeni koli na wali adoit ti fa so ala kanga bê na mba. Tongana mo ngbâ kumbamba, peut-être mo peut ti bâ so a yeke kota ye mingi ape ti kanga bê; me ti azo so asara mariage awe, a yeke kota ye mingi ti kanga bê tongana ala ye ti duti na ngia na yâ ti mariage ti ala.”—John.
Ngbanga ti nyen la a lingbi mo kanga bê?
Tongana mbeni koli na wali asara mariage, ala yeke hinga wokongo ti mba ahon ti kozo.
“Tongana ngoi ayeke hon na peko ti mariage ti mo, a yeke facile ti zia lê ti mo gï na ndö ti awokongo ti koli wala wali ti mo. Tongana mo komanse ti wara mara ti sioni pensé tongaso, ge la a yeke ga fadeso ngangu na mo ti kanga bê.”—Jessena.
Tongana mo hinga ti kanga bê ape ayeke sara si mo sara tënë sân ti gbu li.
“So mbi yeke fa ka atënë ti bê ti mbi hio mingi, a sara si na ambeni ngoi mbi yeke tene atënë so mbi doit fade ti tene ape. Tongana mbi hinga lani ti kanga bê, ka mbi yeke gbu li kozo ti bâ wala atënë so mbi ye ti tene so ayeke biani kota ye, na peut-être lani mbi yeke tene atënë ni ape.”—Carmen.
Bible atene: “Ndoye ahinga ti kanga bê ti ku nga lo sara nzoni na zo.” (1 aCorinthien 13:4). Na bango ni tongana azo use andoye terê, donc a yeke na lege ni ti tene ala kanga bê na mba. Me a yeke ka lakue tongaso ape. John so e sara tënë ti lo fade atene: “Tongana ti tanga ti anzoni sarango ye, a yeke ngangu na zo ti kanga bê ahon ti kanga bê ape. A hunda effort tongana mo ye ti ga zo so ahinga ti kanga bê mingi.”
Tongana nyen la mo peut ti fa so mo kanga bê?
Tongana mbeni ye so mo ku terê ti mo na ni ape asi, na a yeke ngangu na mo ti kanga bê.
Na tapande: Koli wala wali ti mo atene mbeni tënë so ason mo. Kozo ye so mo pensé ti sara, a yeke ti tene na lo mara ni.
Mama-ndia ti Bible: “Zia si bê ti mo ason hio hio pëpe, ndali ti so a yeke ye so a hinga zo ti buba na ni.”—Zo-ti-fa-tene 7:9, kete tënë na gbe ni.
Fa so mo kanga bê: Ku kete. Kozo ti kiri tënë, tara ti zia na yâ ti li ti mo so tënë so koli wala wali ti mo atene so, lo tene ni ti son bê ti mo na mbana ape. Mbeni mbeti (Fighting for Your Marriage) atene: “Mingi ni, sarango ye ti e ayeke luti na ndö ti ye so e pensé na ndö ti tënë so koli wala wali ti e atene ahon ti tene aluti na ndö ti vrai tënë so lo ye fade ti tene.”
Même si koli wala wali ti mo aye ti tara ti son bê ti mo, so mo kanga bê na mo sara na lo mara ni ape, a peut ti sara si tënë ni akiri aga ngangu ape. Bible atene: “Tongana keke ti wâ ayeke dä pëpe, wâ amingo.”—aProverbe 26:20.
“Tongana mo komanse ti bâ wali ti mo tongana wato ti mo, luti kete na pensé na raison so apusu mo ti ye lo, na hio tara ti sara mbeni nzoni ye ndali ti lo.”—Ethan.
Gbu li na ndö ti ahunda so:
Tongana koli wala wali ti mo atene mbeni tënë wala lo sara mbeni ye so ason mo, nyen la mo yeke sara wala tënë ti nyen la mo yeke tene?
Tongana ti peko, lo kiri lo sara mara ti ye tongaso, nyen la mo yeke sara ti fa so mo kanga bê mingi?
Tongana koli wala wali ti mo asara mbeni même ye so ason ka bê ti mo lakue.
Na tapande: Koli wala wali ti mo ayeke sara ye lakue na retard, a sara si mo ku lo gbä na bê ti mo ason.
Mama-ndia ti Bible: “Ala ngbâ ti kanga bê na amba ti ala na popo ti ala, na ti pardonné mba na bê ti ala kue.”—aColossien 3:13.
Fa so mo kanga bê: Gi ti pensé na songo ti mo na koli wala wali ti mo mingi ahon ti pensé gï na mo wani. Hunda terê ti mo: ‘Tongana mbi sara ngonzo wala mbi papa na lo ndali ti ye so asi so, eskê a yeke sara si songo ti mbi na lo akpengba wala ayeke buba ni?’ Nga, girisa ape so “fani mingi e kue e yeke pika gere ti e.” (Jacques 3:2). Tënë so aye ti fa nga so mo kue mo yeke na awokongo.
“Fani mingi mbi yeke kanga bê na akamarade ti mbi mingi ahon ti kanga bê na koli ti mbi. Mbi pensé a yeke ndali ti so mbi na koli ti mbi e yeke place oko mingi, a sara si mbi yeke bâ awokongo ti lo. Me tongana mbi kanga bê na lo, a fa so mbi ndoye lo nga mbi ne lo; a yeke kota ye mingi na yâ ti mariage ti mbi.”—Nia.
Gbu li na ndö ti ahunda so:
Mo yeke kanga bê tongana koli wala wali ti mo asara afaute?
Ti peko, nyen la mo lingbi ti sara ti fa so mo kanga bê mingi na lo?