Zo alingbi gi nda ti kota ti Jéhovah pëpe
“L’Eternel ayeke kota, na a lingbi azo asepela Lo mingi; zo alingbi gi nda ti kota ti Lo pëpe.”—PSAUME 145:3.
ZO SO asû Psaume 145 ayeke mbeni koli so iri ti lo awu mingi. So lo de lani maseka, lo tiri na mbeni turugu so ayo na nduzu mingi, na lo fâ lo. Nga tongana lo ga gbia so atiri abira, wasungo psaume so ahon gbâ ti awato ti lo na ngangu. Iri ti lo ayeke David, lo yeke ândö use gbia ti Israël ti giriri. Na peko ti kuâ ti lo, iri ti lo angbâ ti wu, si laso, gbâ ti azo ahinga nga mbeni tënë na ndo ti lo.
2 Atâa so lo sala akota ye, David abâ tele ti lo kete mingi. Na bingo bê na Jéhovah, lo he bia so: “Tongana mbi bâ ayayu ti Mo, ye so li tïtî Mo asala, nze na atongoro so Mo sala, zo ayeke nyen, si Mo dabe Mo na lo? Na molenge ti zo, si Mo ga ti bâ lo?” (Psaume 8:4, 5). Ahon ti tene lo bâ tele ti lo kota mingi, David amû hongo awato ti lo kue na ngangu na Jéhovah, na lo tënë: “Mo mû na mbi vala ti salut ti Mo; nzobe ti Mo asala si mbi ga kota.” (2 Samuel 22:1, 2, 36). Na fango be-nzoni na azo ti siokpari, Jéhovah afa so lo yeke na tâ be-ti-molenge; ni la, David akiri singila mingi ndali ti nzobe ti Nzapa.
‘Fade mbi yä iri ti Nzapa ti mbi, Gbia ti mbi’
3 Atâa so Nzapa si asoro lo ti ga gbia, David abâ Jéhovah tongana tâ Gbia ti Israël ni mveni. Lo tene: “O L’Eternel, ndo ti komande ayeke ti Mo, Mo yeke Li ti ye kue.” (1 Chronique 29:11). David abâ nga na nene ni mingi dutingo ti Nzapa tongana Gbia! Lo he bia tongaso: “Fade mbi yä iri ti Mo, Nzapa ti mbi, Gbia ti mbi; na fade mbi sala tënë nzoni na iri ti Mo lakue lakue. Lâ na lâ, fade mbi sala tënë nzoni na Mo. Fade mbi sepela iri ti Mo lakue lakue.” (Psaume 145:1, 2). David aye lani ti sepela Jéhovah Nzapa na yâ lango ni kue nga teti lakue lakue.
4 Psaume 145 ayeke mbeni ngangu kiringo tënë na gingo yanga ti Satan tongana lo tene Nzapa ayeke mbeni gbia so akanga lege na azo so lo leke ti sala ye ti bê ti ala (Genèse 3:1-5). Psaume so afa nga tënë ti mvene ti Satan so atene azo ayeke mä yanga ti Nzapa gi ndali ti ye so ala lingbi ti wara na pekoni, me pëpe ngbanga ti so ala ye lo (Job 1:9-11; 2:4, 5). Legeoko tongana David, atâ Chrétien laso ayeke fa biani so Zabolo atene mvene. Teti so ala ye ti sepela Jéhovah lakue lakue, ala yeke bâ na nene ni mingi beku ti ala ti duti na fini ti lakue lakue na gbe ti komandema ti Royaume. Azo kutu mingi ato nda ni awe ti sala ye so. Ala fa na gigi mabe na yâ sandaga ti Jésus, nga tongana awakua ti Jéhovah so amû tele ti ala na yâ batême, ndoye apusu ala ti sala na Nzapa na bê ti ala kue.—aRomain 5:8; 1 Jean 5:3.
5 Bâ gbâ ti alege so e awakua ti Jéhovah e yeke na ni ti sala nzoni tënë ti Nzapa nga ti sepela lo. Mbeni lege ni ayeke ti sambela lo tongana e diko mbeni ye na yâ Tënë ti lo, Bible, so andu bê ti e mingi. Tongana salango ye ti Nzapa na mbage ti azo ti lo apika bê ti e, wala tongana mbeni oko ti apendere ye so lo leke amû ngia na e mingi, e lingbi ti fa bê ti kiri singila ti e na lo. E yeke sala nga nzoni tënë ti Jéhovah Nzapa tongana, na ngoi ti abungbi wala na mbeni ngoi ti lisoro nde, e na amba ti e awamabe e sala tënë ti aye so lo leke ti sala. Biani, “nzo kusala” kue so a sala ni ndali ti aye so andu Royaume ti Nzapa ayeke ga na gonda na Jéhovah.—Matthieu 5:16.
6 Ambeni tapande so ade ti ninga pëpe ti mara ti anzo kusala tongaso andu nga gbâ ti ada ti vorongo so azo ti Jéhovah aleke na yâ ti akodoro so nzinga ayeke dä. Mingi ni, a yeke na lege ti nginza ti ambeni ita ti akodoro wande si a sala ada so. Ambeni Chrétien amû nga maboko na guengo na bê ti ala mveni na ando tongaso ti leke aDa ti Royaume. Nga nzo kusala so ayeke kota ahon atanga ni kue ayeke ti sepela Jéhovah na fango nzo tënë ti Royaume ti lo na azo (Matthieu 24:14). Tongana ti so aversê ti Psaume 145, so aga na pekoni afa, David abâ komandema ti Nzapa na nene ni mingi na lo gonda dutingo ti Lo tongana Gbia (Psaume 145:11, 12). Mo yeke bâ pendere lege ti komandema ti Nzapa tongana ti so David abâ? Na mo yeke fa lakue tënë ti Royaume ti lo na azo?
Atapande ti kota ti Nzapa
7 Psaume 145:3 afa mbeni kota nda ti tënë ti sepela Jéhovah. David ahe bia so: “L’Eternel ayeke kota, na a lingbi azo asepela Lo mingi; zo alingbi gi nda ti kota ti Lo pëpe.” Kota ti Jéhovah ayeke na katikati ni pëpe. Zo alingbi ti hinga nda ni, ti gbu nda ni, wala ti hinga konongo ni pëpe. Me bango atapande ti kota ti Jéhovah so zo alingbi gi nda ni pëpe ayeke ga ande biani na ye ti nzoni na e.
8 Tara ti dabe ti mo na mbeni ngoi so mo gue na ngonda na mo bâ gbâ ti atongoro na lê ti nduzu na mbeni bï. A pika bê ti mo pëpe? Bê ti mo apusu mo ti sepela Jéhovah ndali ti kota ti lo so a bâ na yâ lekengo atongoro so kue pëpe? Me, ye so mo bâ ayeke gi mbeni kete mbage ti gbâ ti atongoro so ayeke na yâ bungbi ti atongoro so sese ti e ayeke dä. Nga, a tene so abungbi ti atongoro ayeke kutu mingi mingi. Gi ota si zo alingbi ti bâ sân mbeni masini. Biani, atongoro nga na abungbi ti atongoro gbâ ni gbâ ni so ayeke na yâ dunia kue ayeke mbeni fä ti ngangu ti Jéhovah ti leke na ye nga na ti kota ti lo so zo alingbi gi nda ni pëpe.—Esaïe 40:26.
9 Bâ ambeni mbage nde ti kota ti Jéhovah so andu Jésus Christ. Nzapa afa kota ti lo na lekengo Molenge ti lo nga na salango kusala na lo teti angu kutu mingi tongana “wakode” ti Lo (aProverbe 8:22-31). A bâ kota ti ndoye ti Jéhovah na ngoi so lo mû Molenge ti lo ngengele oko tongana sandaga ti kota ngele teti azo kue (Matthieu 20:28; Jean 3:16; 1 Jean 2:1, 2). Nga mbeni ye so ahon ngangu ti zo ayeke tele ti yingo so Jéhovah amû na Jésus tongana lo zingo na kuâ. Tele so ayeke ti gloire nga alingbi ti kui pëpe.—1 Pierre 3:18.
10 Zingongo ti Jésus na kuâ andu aye mingi so apika bê. Aye ni so afa kota ti Jéhovah so zo alingbi gi nda ni pëpe. Kusala kue so Jésus asala ândö so andu lekengo aye so lê abâ na so lê abâ pëpe, kite ayeke pëpe so Nzapa akiri na ni kue na yâ mongoli ti Jésus (aColossien 1:15, 16). Kusala ni andu lekengo tanga ti azo ti yingo, dunia kue, sese so ayeke lë alengo ti lo, nga na aye nde nde kue so lê abâ so ayeke na ndo ni. Mbeni ye ni ayeke so Jéhovah asala si Molenge ti lo adabe ti lo na ye kue so lo bâ giriri na yayu nga na sese tongana lo yeke ândö na yayu. Nga, ye kue so lo hinga tongana lo ga zo so ayeke mbilimbili-kue na ndo ti sese. Biani, a yeke bâ polele kota ti Jéhovah so zo alingbi gi nda ni pëpe na yâ zingongo ti Jésus na kuâ. Na ndo ni, kota kusala so afa biani so a lingbi ande ti zingo azo na kuâ, na a lingbi kusala so akpengba mabe ti e so Nzapa alingbi ti zingo na kuâ azo kutu mingi mingi so lo ngbâ ti dabe ti lo na ala nzoni mingi.—Jean 5:28, 29; Kusala 17:31.
Kusala ti ngangu na ti kpene
11 Ngbele ye so Jésus azingo na kuâ, Jéhovah asala gbâ ti ambeni kota kusala ti kpene (Psaume 40:6). Na Pentecôte ti ngu 33, Jéhovah asala si mbeni fini mara abâ gigi, “Israël ti Nzapa”, so adisciple ti Christ so a sa yingo vulu na ndo ti ala si ayeke na yâ ni (aGalate 6:16). Na lege so apika bê, fini mara ti yingo so amû ndo kue na ngoi ni kâ. Atâa tënë ti a-apostat so asala si Chrétienté abâ gigi na peko ti kuâ ti abazengele ti Jésus, Jéhovah angbâ lakue ti sala akusala ti kpene ti tene ye so lo leke ti sala aga tâ tënë.
12 Na tapande, a sala kue ti tene a futi Bible pëpe, nga a kiri pekoni na akota yanga ti kodoro kue so azo ayeke tene na ndo ti sese laso. Mingi ni, aye ti ngangu ayeke si ândö na azo so ayeke kiri peko ti Bible na ayanga nde, na azo ti Satan ayeke gi lani ti fâ ala. Biani, tongana fade Jéhovah, kota Nzapa so zo alingbi gi nda ti lo pëpe, ayeda na ni pëpe, ka azo alingbi ti kiri peko ti Bible na ayanga ahon 2 000 pëpe!
13 A bâ nga kota ti Jéhovah na yâ ye so lo leke ti sala na lege ti Royaume ti lo. Na tapande, na ngu 1914, lo zia Molenge ti lo, Jésus Christ, na ndo mbata ti gbia na yayu. Kete na pekoni, Jésus alondo na tele ti Satan nga na asioni ange ti lo. Lo tomba ala na yayu kâ na lo bi ala na ndo ti sese ge, na fadeso ala yeke ku ti tene a bi ala na yâ bukulugbu-ti-bingo (Apocalypse 12:9-12; 20:1-3). Ngbele ye na ngoi ni so, a sala ye ti ngangu mingi ahon ti kozo na tele ti adisciple ti Jésus so a sa yingo na ndo ti ala. Ye oko, Jéhovah amû maboko na ala na ngoi ti singo ti Christ so lê abâ pëpe.—Matthieu 24:3; Apocalypse 12:17.
14 Na ngu 1919, Jéhovah asala mbeni kusala ti kpene nde so afa kota ti lo. Na peko ti ngoi so ala sala kusala pëpe na lege ti yingo, adisciple ti Jésus so a sa yingo na ndo ti ala akiri awara ngangu (Apocalypse 11:3-11). Ti londo na ngu ni so, aChrétien so a sa yingo na ndo ti ala afa na wâ nzo tënë ti Royaume so a zia gere ni na yayu. A bungbi tanga ti ambeni Chrétien so a sa yingo na ndo ti ala si wungo ti ala alingbi 144 000 (Apocalypse 14:1-3). Nga na lege ti ala, Jéhovah azia gunda ti mbeni “fini sese,” wala bungbi ti azo ti mbilimbili (Apocalypse 21:1). Me tongana aChrétien so a sa yingo na ndo ti ala ague kue na yayu awe, ye nyen ayeke si na “fini sese” ni?
15 Na ngu 1935, numéro ti Tour ti Ba Ndo na Anglais ti 1 na 15 août ti oko ngu so afa angbongboro tënë so andu “azo mingi so asi singo”, so buku ti Apocalypse chapitre 7 asala tënë ni. A-Chrétien so a sa yingo na ndo ti ala ato nda ti gi na wâ awamabe so, ti amara kue, akete mara kue, ayanga kue, si ala bungbi legeoko na ala. “Azo mingi so asi singo” so ayeke hon ande na yâ “kota ye ti vundu” so aga ndulu ndulu, na ala yeke na beku ti duti teti lakue lakue na yâ Paradis tongana azo so ayeke ti “fini sese”. (Apocalypse 7:9-14). Ndali ti kusala ti fango tënë ti Royaume nga na ti salango adisciple, so aChrétien so a sa yingo na ndo ti ala ayeke mû li ni dä, azo ahon kutu omene ayeke fadeso na beku ti duti na fini teti lakue lakue na yâ sese so ayeke ga ande paradis. A lingbi a mû gonda ti maïngo so na zo wa, atâa kangango lege ti Satan nga na ti sioni sese so? (1 Jean 5:19). Gi Jéhovah oko si alingbi ti sala aye so kue, na lege ti yingo vulu ti lo.—Esaïe 60:22; Zacharie 4:6.
Kota gloire ti ngangu ti Jéhovah
16 Atâa a yeke so wa, zo alingbi ti girisa lâ oko pëpe “kusala ti kpene” nga na “ti ngangu” ti Jéhovah. David atene: “Fade awagame so agonda kusala ti Mo na awagame so ayeke ga, na ala sala tënë ti kusala ti ngangu ti Mo. Fade mbi bi bê ti mbi na kota gloire ti ngangu ti Mo, na kusala ti kpene ti Mo nga. Na fade azo asala tënë ti kusala ti Mo so amû mbito; na fade mbi sala tënë ti kota ndo ti Mo.” (Psaume 145:4-6). Me, teti so “Nzapa ayeke Yingo” na zo alingbi ti bâ lo pëpe, David alingbi lani ti hinga nyen na ndo kota gloire ti Jéhovah?—Jean 1:18; 4:24.
17 Atâa so lo lingbi ti bâ Nzapa pëpe, ambeni ye ayeke dä so apusu David ti bâ biani so Jéhovah alingbi na yekiango ndo. Na tapande, lo lingbi lani ti diko atënë na yâ Mbeti ti Nzapa so afa akusala ti ngangu ti Nzapa, tongana futingo mbeni sioni sese na lege ti kota ngu. Peut-être, David abâ nga tongana nyen zingo amolenge ti Israël na gbe ti ngbâa na Egypte abi kamene na lê ti anzapa ti wataka ti Egypte ni. Mara ti aye tongaso afa biani kota ti Jéhovah na so lo lingbi na yekiango ndo.
18 A yeke gi pëpe na dikongo Mbeti ti Nzapa si David akiri abâ biani so Nzapa alingbi na yekiango ndo, me a yeke nga na gbungo li na ndo ni. Na tapande, lo gbu peut-être lani li ti lo na ndo ye so asi na ngoi so Jéhovah amû Ndia na Israël. Bekpa asungba lani, wâ ti bekpa aza, lê ti nduzu avuko, nga trompette atoto ngangu. Hoto ti Sinaï ayengi nga guru ti wâ asigigi na li ni. Na go ti Hoto ni, amolenge ti Israël amä “akomandema Bale-oko” na yâ ti wâ nga na mbinda, so Jéhovah amû na ala na lege ti mbeni ange (Deutéronome 4:32-36; 5:22-24; 10:4; Exode 19:16-20; Kusala 7:38, 53). So tâ fä ti kota ngangu ti Jéhovah! Gbungo li na ndo aye tongaso ayeke pusu gi azo so aye Tënë ti Nzapa mingi ti gonda ‘kota gloire ti ngangu ti Jéhovah’. Biani, e yeke laso na Bible kue so ayeke na gbâ ti apendere tënë ti suma ti kota ti Jéhovah so apika bê ti e.—Ezéchiel 1:26-28; Daniel 7:9, 10; Apocalypse, chapitre 4.
19 Mandango andia so Nzapa amû na amolenge ti Israël ayeke nga peut-être mbeni ye nde so asala si lingbingo ti Nzapa na yekiango ndo apika bê ti David (Deutéronome 17:18-20; Psaume 19:7-11). Batango andia ti Jéhovah ayä mara ti Israël na nduzu, na a zia lo nde na tanga ti amara kue (Deutéronome 4:6-8). Legeoko na David, dikongo Bible lakue, gbungo li na ndo ni mingi, nga mandango ni nzoni ayeke sala si e yeke bâ so Jéhovah alingbi na yekiango ndo ahon ti kozo.
Alengo ti Nzapa ayeke kota mingi!
20 Tongana ti so e bâ awe, akozo versê omene ti Psaume 145 afa na e akpengba nda ti tënë ti sepela Jéhovah ndali ti aye so andu kota ti lo so zo alingbi gi nda ni pëpe. Versê 7 ti si na 9 agonda kota ti Nzapa na salango tënë ti alengo ti lo so andu nzoni salango ye. David ahe bia: “Fade ala sala tënë ti ye kue so adabe ala na kota nzobe ti Mo, na ala sala bia tënë ti mbilimbili ti Mo. L’Eternel asi na grâce, na Lo sala nzobe. Ngonzo ti Lo alondo fade pëpe, na nzobe ti Lo ayeke kota mingi. L’Eternel asala nzoni na azo kue, na nzobe ti Lo ayeke na ndo kusala ti Lo kue.”
21 Ge David agboto lê kozoni kue na ndo nzobe nga na mbilimbili ti Jéhovah, so Satan Zabolo aga na kite na ndo ni. Alengo so asala nyen na ndo azo kue so aye Nzapa na ayeda na komandema ti lo? Biani, nzobe ti Jéhovah nga na mbilimbili lege ti lo ti komande aga na kota ngia mingi na awakua ti lo, si ala lingbi pëpe ti kanga yanga ti ala ti gonda lo. Nga, Jéhovah afa nzobe ti lo na “azo kue”. Biani, ye so ayeke mû ande maboko na ambeni zo mingi ti gbian bê ti ala na ti voro tâ Nzapa kozoni si ye kue aga sioni.—Kusala 14:15-17.
22 David abâ nga na nene ni alengo so Nzapa mveni afa tongana Lo ‘hon na gbele Moïse, Lo to mbela, Lo tene, L’Eternel, L’Eternel, Nzapa ti be-nzoni na ti grâce, ngonzo ti Lo alondo fade pëpe, tene-biani na nzobe ti Lo ayeke kota mingi’. (Exode 34:6). Ni la, David alingbi lani ti tene: “L’Eternel asi na grâce, na Lo sala nzobe. Ngonzo ti Lo alondo fade pëpe, na nzobe ti Lo ayeke kota mingi.” Atâa so a lingbi gi nda ti kota ti lo pëpe, Jéhovah ayekia awakua ti lo azo na salango ye na ala na nzobe. Lo si na be-nzoni, lo yeke ndulu ti yeda na awasiokpari so agbian bê ti ala na lege ti sandaga ti kota ngele ti Jésus. Jéhovah ayeke sala nga ngonzo hio hio pëpe, teti lo mû na awakua ti lo lege ti hon ndo ti awokongo so alingbi ti kanga lege na ala ti lï na yâ fini sese so mbilimbili ayeke duti dä.—2 Pierre 3:9, 13, 14.
23 David ayä na nduzu nzobe ti Nzapa, wala ndoye so ayeke gbian pëpe. Me tanga ti Psaume 145 afa tongana nyen Jéhovah afa lengo so na gigi nga tongana nyen awakua be-ta-zo ti lo ayeke sala ye na gbe ti nzobe ti lo. E yeke bâ ande tënë na ndo ni na yâ article ti peko.
Fade mo kiri tënë tongana nyen?
• Alege wa e yeke na ni ti sepela Jéhovah “lâ na lâ”?
• Atapande wa afa so zo alingbi gi nda ti kota ti Jéhovah pëpe?
• Tongana nyen e lingbi ti bâ so Jéhovah alingbi na kota yekiango ndo ahon ti kozo?
[Ahundango tënë ti manda na ye]
1, 2. David ayeke lani mara ti zo wa? Lo bâ lani tele ti lo tongana nyen na gbele Nzapa?
3. (a) David abâ lani dutingo ti lo tongana gbia na ndo Israël tongana nyen? (b) David aye lani ti sepela Jéhovah tongana nyen?
4. Psaume 145 afa nda ti amvene wa?
5, 6. Alege wa ayeke dä ti sala nzoni tënë nga ti sepela Jéhovah?
7. Fa mbeni kota nda ti tënë ti sepela Jéhovah.
8. Dunia kue afa nyen na ndo kota nga na ngangu ti Jéhovah?
9, 10. (a) Aye wa so andu kota ti Jéhovah abâ ni na ndo Jésus Christ? (b) A lingbi zingongo ti Jésus na kuâ asala ye tongana nyen na ndo mabe ti e?
11. Jéhovah ato nda ti sala kota kusala wa na Pentecôte ti ngu 33?
12. So azo alingbi ti wara Bible na akota yanga ti kodoro kue so a tene na ndo ti sese ge afa nyen?
13. Ngbele ye na ngu 1914, tongana nyen a bâ kota ti Jéhovah na yâ aye so lo leke ti sala na lege ti Royaume ti lo?
14. Kusala ti kpene wa Jéhovah asala na ngu 1919? Na kusala so asala nyen?
15. Kusala wa aChrétien so a sa yingo na ndo ti ala amû li ni dä? Na ye ti pekoni ayeke nyen?
16. Ngbanga ti nyen zo alingbi ti bâ ‘kota gloire ti ngangu ti Jéhovah’ na tâ lê ti lo pëpe?
17, 18. Tongana nyen David alingbi lani ti bâ ‘kota gloire ti ngangu ti Jéhovah’ na nene ni mingi ahon ti kozo?
19. Ye nyen ayeke sala si e yeke bâ so Jéhovah alingbi na yekiango ndo ahon ti kozo?
20, 21. (a) Psaume 145:7-9 agonda kota ti Jéhovah ndali ti alengo wa? (b) Alengo ti Nzapa so a fa ni ge asala nyen na ndo azo kue so aye lo?
22. Jéhovah ayeke sala ye tongana nyen na mbage ti awakua ti lo?
23. Lengo ti ngele ngangu wa e yeke bâ ande na yâ article ti peko?
[Foto na lembeti 10]
Abungbi ti atongoro na yâ dunia kue afa kota ti Jéhovah
[Lingu ti foto ni]
Na nzobe ti Anglo-Australian Observatory, foto ti David Malin
[Foto na lembeti 12]
Tongana nyen a bâ kota ti Jéhovah na ndo Jésus Christ?
[Foto na lembeti 13]
Tongana amolenge ti Israël awara Ndia ti Moïse na Hoto ti Sinaï, ala bâ so Jéhovah alingbi biani na kota yekiango ndo