Wara Bê so Anzere na Jéhovah

“Leke na yâ mbi bê so ayeke na sioni oko pepe, O Nzapa, na zia na yâ mbi mbeni fini yingo, so aluti ngangu.”​—PSAUME 51:10, NW, (51:12, Bible ti Sango)

1, 2. Ngbanga ti nyen a lingbi e gbu li na ndo bê ti e?

LO YEKE la ni mbeni koli so ayo nga lo yeke pendere mingi. Na bango lo, bê ti Samuel apika mingi na lo tene na bê ti lo so kozo molenge ti Jessé so ayeke lo so Nzapa asoro ti ga gbia na peko ti Saül. Me Jéhovah atene: “Mo zia bê ti mo na pendere ti [molenge so] pepe, wala na yongo ti lo nga pepe; teti Mbi ke lo awe. . . . Teti zo aba lê ti zo, me L’Eternel aba bê ti lo.” Jéhovah asoro tanga ti amolenge ti Jessé, David, mbeni “zo so bê ti Lo aye.”​—1 Samuel 13:14; 16:7.

² Nzapa alingbi ti diko bê ti zo, tongana ti so lo fa ni polele na pekoni: “Mbi, L’Eternel, Mbi gi nda ti bibe ti zo, Mbi tara bê ti lo, ti mu ye na azo oko oko kue ye so alingbi na lege ti ala, a lingbi na lengo ti kusala ti ala.” (Jérémie 17:10) Biani, “zo so ayeke gi nda ti bê ti azo ayeke Jéhovah.” (aProverbe 17:3, NW) Ye oko, bê so Jéhovah ayeke gi nda ni na yâ zo ayeke nyen? Na ye nyen e lingbi ti sala ti wara bê so anzere na lo?

“Zo ti yâ Ni”

3, 4. Kozo nda ti tene “bê” so asala kusala na ni na yâ Bible ayeke nyen? Mu ambeni tapande.

³ Tene “bê” asigigi ndulu na fani saki oko na yâ Mbeti ti Nzoni-kue. Mingi ni, a sala tene ni na lege ti fä. Na tapande, giriri Jéhovah atene na prophète Moïse: “Mo sala tene na amolenge ti Israël ti ga na offrande na Mbi; azo oko oko kue so bê ti ala ayeke na ngia ti mu offrande, fade ala mu na Mbi.” Na, “azo oko oko kue so bê ti ala aye aga” na a-offrande. (Exode 25:2; 35:21) A yeke polele so mbeni mbage ti bê na lege ti fä ayeke ye so apusu zo ti sala ye: mbeni ngangu so ayeke na yâ e so apusu e ti sala ye. Bê ti e na lege ti fä afa nga na gigi atene ti bê na abibe ti e, anzala na aye so agbu bê ti e. Ngonzo wala mbito alingbi ti sï bê ti mbeni zo, a lingbi ti duti na kota vundu wala na kota ngia. (Psaume 27:3; 39:4 [39:3, NW]; Jean 16:22; aRomain 9:2) A lingbi ti duti na baba wala na tâ be-ti-molenge, na ndoye wala na tene ti ke.​—aProverbe 16:5; Matthieu 11:29; 1 Pierre 1:22.

⁴ Tongaso, fani mingi “bê” abungbi oko na ye so apusu zo ti sala ye nga na atene ti bê, nde na so “bibe” ague mbilimbili oko na hingango ndo. A yeke tongaso si a lingbi a gbu nda ti atene so tongana a wara ala na yâ mbeni ndo oko na yâ Mbeti ti Nzapa. (Matthieu 22:37; aPhilippien 4:7) Ye oko, a lingbi ti zia kangbi lakue pepe na popo ti bê na bibe. Na tapande, Moïse awa azo ti Israël na ngangu: “A lingbi mo hinga laso, na mo bata tene so na bê ti mo [wala, “a lingbi mo dabe mo,” NW, kete tene na gbe ni], L’Eternel ayeke [“tâ,” NW] Nzapa.” (Deutéronome 4:39) Na ascribe so agbe lingo ti sala sioni na lo, Jésus atene: “Teti nyen i bi bê ti i na sioye tongaso?” (Matthieu 9:4) “Gbungo nda ti ye,” “hingango ye,” na “fango nda ti tene” alingbi ti bungbi nga oko na bê. (1 aGbia 3:12; aProverbe 15:14; Marc 2:6) Tongaso, bê na lege ti fä alingbi ti ndu nga hingango ndo ti e; abibe ti e wala gbungo nda ti ye ti e.

5. Bê na lege ti fä aye ti tene nyen?

⁵ Na lege ti mbeni bakari, bê na lege ti fä ayeke “kota mbage ti ye ni, ye so ayeke tâ na yâ ni, na tongaso a ye ti tene, zo ti yâ ni so afa ye so lo yeke biani na yâ akusala nde nde ti lo, anzala ti lo, aye so agbu bê ti lo, atene ti bê, aye so lo sala nzala ni mingi, aye so lo leke ti sala, abibe ti lo, bango yâ ti aye, ndara ti lo, hingango ye, kode, atene ti mabe ti lo na afango nda ti ye ti lo, aye so lo dabe lo na ni nga na ye so lo bi bê dä.” A duti fä ti ye so e yeke biani na yâ ni, “zo ti yâ ni.” (1 Pierre 3:4) A yeke ye so Jéhovah aba na agi nda ni. Tongaso, David alingbi ti sambela: “Leke na yâ mbi bê so ayeke na sioni oko pepe, O Nzapa, na zia na yâ mbi mbeni fini yingo, so aluti ngangu.” (Psaume 51:10 NW; [51:12, Bible ti Sango]) Tongana nyen e lingbi ti wara bê so ayeke na sioni oko pepe?

‘Zia Bê ti I’ na Tene ti Nzapa

6. Wango wa Moïse amu na Israël tongana ala se kando na Popo-hoto ti Moab?

⁶ Na ngoi so lo mu wango na amolenge ti Israël so abungbi tele na Popo-hoto ti Moab kozoni si ala lï na Sese ti Zendo, Moïse atene: “I zia bê ti i na tene so kue so mbi fa na i laso, si i lingbi komande amolenge ti i ti bata na ti sala na lege ti tene ti Ndia so kue.” (Deutéronome 32:46) A hunda na azo ti Israël ti ‘dengi mê nzoni.’ Ala lingbi ti yôro akomandema ti Nzapa na yâ bê ti amolenge ti ala gi tongana ala mveni ahinga ni nzoni.​—Deutéronome 6:6-8.

7. Ti “zia bê” na Tene ti Nzapa andu nyen?

⁷ Kota ye so a hunda ti lë bê so ayeke na sioni oko pepe ayeke warango tâ hingango ye na ndo ye so bê ti Nzapa aye nga na aye so lo leke ti sala. Lingu ti hingango ye so ayeke gi oko, Tene ti Nzapa so a sû na gbe ti yingo. (2 Timothée 3:16, 17) Ye oko, dutingo gi na mbeni hingango ye na li ayeke mu ande maboko na e pepe ti wara bê so anzere na Jéhovah. Ti tene hingango ye andu biani ye so e yeke na yâ ni, a lingbi e ‘zia bê ti e’ na, wala “e ba na nene ni,” ye so e yeke manda. (Deutéronome 32:46, Bible en français courant) A sala ni tongana nyen? David, wasungo psaume, afa nda ni: “Mbi dabe mbi na alâ ti giriri; mbi gbu li ti mbi na ndo kusala ti mo kue; na bê kue mbi bi bê ti mbi lakue na kusala ti tïtî mo.”​—Psaume 143:5, NW.

8. Na ngoi so e yeke manda ye, e lingbi ti gbu li ti e na ndo ti ahundango tene wa?

⁸ A lingbi nga e gbu li na bê ti kiri singila na ndo kusala ti Jéhovah. Tongana e diko Bible wala ambeti so a sû na ndo ti Bible, a lingbi e gbu li na ndo ahundango tene tongana: ‘Ye so afa na mbi nyen na ndo Jéhovah? Alengo wa ti Jéhovah mbi ba asigigi na ndo so? Ye nyen mbaï so afa na mbi na ndo ye so Jéhovah aye na ye so lo ke? Kangbi wa ayeke na popo ti aye so ayeke si tongana mbi sala ye so Jéhovah aye na ala so ayeke si na salango ye so lo ke? Tongana nyen asango so ague oko na ye so mbi hinga awe?’

9. Mandango ye zo mveni nga na gbungo li na ndo ni ayeke kota ye tongana nyen?

⁹ Lisaa, mbeni wali ti ngu 32, afa tongana nyen lo ga ti yekia ngele ti mandango ye nzoni na ti gbungo li na ndo ni: “Na peko ti so mbi wara batême na ngu 1994, mbi yeke sala la ni kusala mingi na yâ tâ tene teti ndulu na angu use. Mbi gue na abungbi kue ti aChrétien, mbi fa tene teti angbonga 30 ti si na 40 nze oko oko, na mbi bungbi oko na afon mbi Chrétien. Na pekoni mbi to nda ti kiri na peko. Mbi tï mingi juska mbi ke même ndia ti Nzapa. Me li ti mbi aga dä na mbi leke na bê ti mbi ti sala si fini ti mbi akiri ague oko na ye so Bible afa. Bê ti mbi anzere mingi so Jéhovah ayeda na gbiango bê ti mbi nga na kiringo ti mbi na lo! Fani mingi mbi gbu li ti mbi: ‘Ngbanga ti nyen mbi kiri na peko?’ Kiringo tene so aga lakue na li ti mbi ayeke so mbi ba na nene ni pepe mandango ye nzoni nga gbungo li na ndo ye so mbi manda. A yeke gi ngbanga ti so tâ tene ti Bible andu bê ti mbi pepe. A to nda ni na ngoi so ti gue na ni, mandango ye mbi mveni nga gbungo li na ndo ni ayeke duti lakue mbeni kota ye so mbi zia na yâ fini ti mbi ti sala.” Na ngoi so hingango ye ti e na ndo Jéhovah, Molenge ti lo, nga na Tene ti lo ayeke kono, ba tongana nyen a yeke kota ye ti mu ngoi ti gbu li nzoni na ndo ni!

10. Ngbanga ti nyen a lingbi e vo ngoi fade fade teti mandango ye e mveni nga teti gbungo li?

¹⁰ Na yâ sese so aye ti sala asi singo dä, warango ngoi ti manda ye na ti gbu li ayeke biani mbeni kota kpale. Ye oko, aChrétien laso aluti na yanga ti mbeni pendere Sese ti Zendo: fini sese ti Nzapa so mbilimbili aduti dä. (2 Pierre 3:13) Aye ti dongo bê so ayeke si ande, tongana futingo ti “Babylone ti Kota” nga na bira so “Gog, zo ti sese ti Magog” ayeke sala ande na azo ti Jéhovah, aga ndulu. (Apocalypse 17:1, 2, 5, 15-17, NW; Ezéchiel 38:1-4, 14-16; 39:2) Ye so ayeke si ande alingbi ti zia ndoye ti e teti Jéhovah na gbele tara. A lingbi e vo fade fadeso ngoi so alingbi na e zia bê ti e na Tene ti Nzapa!​—aEphésien 5:15, 16.

‘Leke Bê ti Mo ti Gi Nda ti Tene ti Nzapa’

11. Tongana nyen a lingbi ti haka bê ti e na sese?

¹¹ A lingbi ti haka bê na lege ti fä na mbeni sese so a lingbi ti lu alengo ti tâ tene dä. (Matthieu 13:18-23) A yeke leke lakue tâ sese si lengo ni amaï nzoni. Legeoko nga, a lingbi a leke bê si a duti ndulu ti yeda mingi ahon na Tene ti Nzapa. Ezra, so ayeke prêtre, “aleke bê ti lo ti gi ndia ti Jéhovah na ti bata ni.” (Ezra 7:10, NW) Tongana nyen e lingbi ti leke bê ti e?

12. Fade ye nyen ayeke mu maboko ti tene zo aleke bê ti lo teti mandango ye?

¹² Mbeni pendere lege ti leke bê ti e tongana e gi nda ti Tene ti Nzapa ayeke ti sambela na bê kue. Abungbi ti Chrétien ti atâ wavorongo ato nda ni na ahunzi na sambela. Ba tongana nyen a yeke tâ na lege ni ti tene e to nda ti mandango Bible e mveni na lege ti sambela so e tene na bê kue nga na pekoni ti bata lakue mbeni dutingo so a zia bê kue na ndo mandango ye ni!

13. Ye nyen a lingbi e sala ti wara bê so anzere na Jéhovah?

¹³ A lingbi a leke bê na lege ti fä ti zia yamba atene so a gi nda ni kozo pepe. Amokonzi ti lege ti vorongo na ngoi ti Jésus aduti la ni ndulu ti sala ni pepe. (Matthieu 13:15) Nde na so, Marie, mama ti Jésus, awara anda ti tene ‘na yâ bê ti lo,’ atene so aluti na ndo atâ tene so lo mä awe. (Luc 2:19, 51) Lo ga mbeni disciple be-ta-zo ti Jésus. Lydie ti kodoro ti Thyatire adengi mê ti mä Paul, na Jéhovah “alungula bê ti lo ti mä tene.” Lo nga lo ga mbeni wamabe. (Kusala 16:14, 15) Zia e luti ngangu lâ oko pepe na ndo atene ti e mveni wala atene ti mabe so e ye ni mingi. Nde na so, zia e duti ndulu ti ‘hinga so Nzapa ayeke Nzapa ti tene-biani, atä so azo kue ayeke awamvene.’​—aRomain 3:4.

14. Tongana nyen e lingbi ti leke bê ti e ti dengi mê na abungbi ti aChrétien?

¹⁴ Lekengo bê ti dengi mê na abungbi ti aChrétien ayeke mbilimbili kota ye. Bingo bê na ndo aye nde nde so asi na tele ti e alingbi ti sala si e hon yongoro na ye so a yeke tene. Atene so a tene alingbi ti sala ngangu mingi pepe na ndo ti e tongana e bi bê ahon ndo ni na aye so asi na yâ lango ni wala e gi bê ti e teti ye so ayeke ku e kekereke. A lingbi e kpengba lekengo na bê ti e ti mä na ti manda ye tongana e ye ti wara aye ti nzoni na lege ti ye so a yeke tene. E lingbi ti wara aye ti nzoni mingi tongana e leke na bê ti e ti gbu nda ti aversê so a yeke fa pekoni nga fango nda ni so a yeke mu!​—Néhémie 8:5-8, 12.

15. Tongana nyen tâ be-ti-molenge amu maboko na e ti manda ye mingi ahon?

¹⁵ Tongana ti so ziango ambeni engrais na ndo ni ayeke sala si tâ sese aga nzoni ahon, legeoko nga ti gi ti lë tâ be-ti-molenge, kota nzala teti aye ti yingo, ziango bê, kpengo mbito ti Nzapa, nga na ndoye teti Nzapa alingbi ti sala si bê ti e na lege ti fä aga nzoni ahon. Tâ be-ti-molenge awoko bê, a mu maboko na e ti duti ndulu ahon ti manda ye. Jéhovah atene na Yoshiya, Gbia ti Juda: “Teti bê ti mo awoko tongana mo mä tene ni kue so Mbi tene . . . na mo toto na gbele Mbi, tongaso Mbi mä mo awe.” (2 aGbia 22:19) Bê ti Yoshiya asala ye na tâ be-ti-molenge na amä ndo. Tâ be-ti-molenge amu lege na adisciple ti Jésus so ayeke “azo so amanda mbeti pepe, na ala yeke azo senge” ti gbu nda ti atâ tene ti yingo so “awandara na azo so ahinga mbeti” agbu nda ni pepe na ti sala ye alingbi na ni. (Kusala 4:13; Luc 10:21) Zia e sala “e mveni kete na gbele Nzapa ti e” na ngoi so e yeke sala kue ti wara bê so anzere na Jéhovah.​—Esdras 8:21.

16. Ngbanga ti nyen a hunda ti sala ngangu ti lë nzala ti kobe ti yingo?

¹⁶ Jésus atene: “Ngia ayeke na azo so ahinga ye ti yingo atia ala.” (Matthieu 5:3) Atä so a dü e na ngangu ti bi bê na aye ti yingo, akpale so alondo na sioni sese so wala asioni lengo tongana goigoi alingbi ti sala si e ba mbilimbili pepe aye so atia e. (Matthieu 4:4) A lingbi e lë nzoni nzala teti kobe ti yingo. Même si na kozo ngoi ni dikongo Bible nga mandango ye e mveni anzere na e pepe, tongana e ngbâ ti sala ni e yeke ba ande so hingango ye ayeke ‘nzere na tâ âme ti e,’ na a yeke sala si e yeke ku kungo na bê kue angoi ti mandango ye.​—aProverbe 2:10, 11, NW.

17. (a) Ngbanga ti nyen Jéhovah alingbi ti tene e zia bê kue na lo? (b) Tongana nyen e lingbi ti lë ziango bê na Nzapa?

¹⁷ Gbia Salomon amu wango so: “Zia bê ti mo kue na Jéhovah na luti pepe na ndo hingango ndo ti mo mveni.” (aProverbe 3:5, NW) Zo so azia bê kue na Nzapa ahinga so atä ye so Lo hunda wala Lo fa lege na ni na yâ Tene ti Lo, a yeke lakue na lege ni. (Esaïe 48:17) Jéhovah alingbi biani ti tene e zia bê kue na lo. Lo lingbi ti sala si ye kue so lo leke ti sala aga tâ tene. (Esaïe 40:26, 29) Ni la, tâ iri ti lo mveni aye mbilimbili ti tene “Lo so Asala si Ye Aga,” na iri so akpengba bê so zo azia na ndo ngangu ti Lo ti sala si ye so Lo zê aga tâ tene! Lo yeke “mbilimbili na yâ ti alege ti lo kue na be-biani na yâ ti akusala ti lo kue.” (Psaume 145:17, NW) Tâ tene, ti lë ziango bê na lo, a lingbi e ‘tara na e ba so Jéhovah ayeke nzoni’ na salango ye alingbi na ye so e manda na lege ti Bible na yâ fini ti e nga na gbungo li na ndo lengo ti nzoni so aga na pekoni.​—Psaume 34:8, NW.

18. Tongana nyen kpengo mbito ti Nzapa amu maboko na e ti yeda na fango lege ti lo?

¹⁸ Na fango mbeni lengo nde so asala si bê ti e ayeda na fango lege ti Nzapa, Salomon atene: “Kpe mbito ti Jéhovah na zia lege ti sioni.” (aProverbe 3:7, NW) Na ndo Israël ti giriri, Jéhovah atene: “O! tongana bê ti ala ayeke tongaso ti kpe mbito ti Mbi! na ti bata komandema ti Mbi kue lakue, si ala na amolenge ti ala alingbi duti nzoni lakue!” (Deutéronome 5:29) Biani, azo so akpe mbito ti Nzapa amä yanga ti lo. Jéhovah ayeke na ngangu “ti fa ngangu ti Lo teti ala so bê ti ala ayeke mbilimbili na Lo” na ti se ala so amä yanga ti lo pepe. (2 Chronique 16:9) Zia kota mbito ti nzere pepe na Nzapa akomande akusala, abibe, nga atene ti bê ti e kue.

‘Ndoye Jéhovah na Bê ti Mo Kue’

19. Kusala wa ndoye ayeke na ni na salango si bê ti e ayeda na fango lege ti Jéhovah?

¹⁹ Ahon tanga ti alengo kue, ndoye asala biani si bê ti e ayeda na fango lege ti Jéhovah. Zo so bê ti lo asi singo na ndoye teti Nzapa asala si lo yeke na kota nzala ti manda ye so anzere na Nzapa na ye so anzere na Lo pepe. (1 Jean 5:3) Jésus atene: “A lingbi mo ndoye Jéhovah Nzapa ti mo na bê ti mo kue, na âme ti mo kue, nga na bibe ti mo kue.” (Matthieu 22:37, NW) Zia e kono ndoye ti e teti Nzapa na salango si gbungo li na ndo nzobe ti lo aga mbeni ye so e sala lâ oko oko, na salango lakue tene na lo tongana na mbeni kota kamarade, nga na salango tene ti lo na bê kue na ambeni zo.

20. Tongana nyen e lingbi ti wara bê so anzere na Jéhovah?

²⁰ Ti dabe na ni: Ti wara bê so anzere na Jéhovah a ndu mungo lege na Tene ti Nzapa ti sala ngangu na ndo zo so e yeke biani, zo ti yâ ni. Nzoni mandango ye e mveni nga na gbungo li na ndo ni ayeke tâ kota ye. Lege ti nzoni ahon ti sala ni ayeke ti leke bê ti e kozoni, bê so azia yamba atene kue so a gi nda ni kozo pepe, bê so asi singo na alengo so asala si e duti ndulu ti manda ye! Biani, na lege ti mungo maboko ti Jéhovah, zo alingbi ti wara bê so anzere na Nzapa. Ye oko, a lingbi e sala aye wa ti bata bê ti e nzoni?

[Kete Tene na Gbe Ni]

Mo Yeke Kiri Tene Tongana Nyen?

• Bê na lege ti fä so Jéhovah agi nda ni ayeke nyen?

• Tongana nyen e lingbi ti ‘zia bê ti e’ na Tene ti Nzapa?

• Tongana nyen e lingbi ti leke bê ti e ti gi nda ti Tene ti Nzapa?

• Na peko ti mandango article so, bê ti mo apusu mo ti sala nyen?

[Foto na lembeti 17]

David agbu li na bê ti kiri singila na ndo aye ti yingo. Mo nga?

[Afoto na lembeti 18]

Leke bê ti mo kozoni ti manda Tene ti Nzapa