‘Kota lâ ti Jéhovah aga nduru’

“Kota lâ ti L’Eternel [Jéhovah, NW ] aga nduru, na a yeke ga fade fade.”​—SOPHONIE 1:14.

1, 2. (a) A-Chrétien ayeke ku lango wa so ayeke nde? (b) Atënë wa a yeke nzoni e hunda tere ti e na ni? Ngbanga ti nyen?

NA LANGO ti mariage ti mbeni wali, lo yeke ku na ngia mingi ngbonga ti mariage ti lo. Mbeni mama ti ngo ayeke ku na ngia lâ ni so lo yeke dü molenge ti lo. Mbeni wakua so awoko na kua ayeke ku na ngia lango so lo yeke to nda ti congé ti lo. Oko ye wa azo so ayeke na ni na popo ti ala? Ala kue ayeke ku mbeni lango so ayeke nde: mbeni lango so ala lingbi ti girisa lâ oko pëpe. Ala kue ayeke ku singo ti mbeni lango so agbu bê ti ala mingi, me na alege nde nde. Lango so ala yeke ku ayeke si ande, na tongana a si, ala yeke na beku so ala leke tere ti ala kozoni ndali ni awe.

² Legeoko nga, laso atâ Chrétien ayeke ku na bê kue singo ti mbeni lango so ayeke nde. A yeke kota ‘lâ ti Jéhovah’. (Esaïe 13:9; Joël 2:1; 2 Pierre 3:12). ‘Lâ ti Jéhovah’ so ayeke ga ayeke nyen? Ye wa singo ti lâ ni so ayeke sara ande na ndo ti azo? Na ndo ni, ye wa e lingbi ti sara ti leke tere ti e si e duti nduru tongana lango ni so asi? A yeke kota ye ti tene e gi akiringo tënë na ahundango tënë so fadeso ngbanga ti so aye mingi afa so atënë ti Bible so ayeke tâ tënë: ‘Kota lâ ti Jéhovah aga nduru, na a yeke ga fade fade.’​—Sophonie 1:14.

‘Kota lâ ti Jéhovah’

3. ‘Kota lâ ti Jéhovah’ ayeke nyen?

³ ‘Kota lâ ti Jéhovah’ ayeke nyen? Na yâ ti Bible, tënë ‘kota lâ ti Jéhovah’ andu ambeni mbilimbili ngoi so Jéhovah adë ngbanga na ndo ti awato ti lo na lo sara si kota iri ti lo awara gloire. Azo ti Juda na ti Jérusalem so aduti be-ta-zo pëpe nga na azo ti Babylone na ti Egypte so asara sana na azo atingbi lani na ‘alâ ti Jéhovah’ na ngoi so lo dë ngbanga na ndo ti ala (Esaïe 2:1, 10-12; 13:1-6; Jérémie 46:7-10). Ye oko, ‘lâ ti Jéhovah’ so ahon atanga ni kue angbâ ti ga. A yeke duti ande “lâ” ni so fade Jéhovah ayeke dë ngbanga na ndo ti azo so abuba iri ti lo. A yeke to nda ni ande na futingo ti “Kota Babylone” so ayeke abungbi ti vorongo nzapa ti wataka kue; na ye ni kue ayeke gue ti hunzi na ngoi ni so a yeke futi tanga ti asioni ye ti ngoi ti e na bira ti Harmaguédon.​— Apocalypse 16:14, 16; 17:5, 15-17; 19:11-21.

4. Ngbanga ti nyen a lingbi mingi ti azo aduti na mbeto ti kota lâ ti Jéhovah so ayeke ga nduru nduru?

⁴ Atâa ala hinga wala pëpe, a lingbi mingi ti azo aduti na mbeto ti kota lâ ti Jéhovah so ayeke ga nduru nduru. Ndali ti nyen? Na lege ti prophète Sophonie, Jéhovah akiri tënë, lo tene: “Fade lâ ni kâ ayeke lâ ti ngonzo, lâ ti vundu na ye ti ngangu, lâ ti futingo ye, lâ ni so ye aga yangbato, lâ ti bingo, bingo so avuko mingi, lâ ti mbinda na bingo so avuko pitipiti.” A yeke mbeni lâ ti mbeto biani! Na ndo ni, prophète ni atene: “ Teti azo asara siokpari so ake L’Eternel, fade Mbi sara si ye ti vundu aga na ndo ala.”​—Sophonie 1:15, 17.

5. Nzoni bango ndo wa azo kutu mingi ayeke na ni na ndo lâ ti Jéhovah? Ngbanga ti nyen?

⁵ Ye oko, ambeni zo kutu mingi ayeke ku na ngia singo ti lâ ti Jéhovah. Ngbanga ti nyen? Ngbanga ti so lâ ni so ayeke duti ande lâ ti tene a sö azo ti mbilimbili na a zi ala, mbeni lango so fade Jéhovah ayeke sara si azo abâ kota ti lo nga iri ti lo so ayeke na gloire ayeke ga nzoni-kue (Joël 3:16, 17; Sophonie 3:12-17). A yeke sarango ye ti azo laso si ayeke fa mingi ni wala ala yeke ku singo ti lâ ni so na mbeto wala na ngia. Mo yeke bâ gango ti lâ ni so tongana nyen? Mo leke tere ti mo awe? Ti hinga so lâ ti Jéhovah aga nduru awe asara ngangu na ndo ti aye so mo yeke sara laso na yâ fini ti mo ti lâ oko oko?

“Fade azo ti hengo zo aga na tënë ti he”

6. Mingi ti azo abâ ‘lâ ti Jéhovah’ tongana nyen? Ngbanga ti nyen ye so adö bê ti atâ Chrétien pëpe?

⁶ Atâa so a hunda ti sara ye hio, mingi ti azo ayeke bi bê ti ala pëpe na ndo ‘lâ ti Jéhovah’ so ayeke nduru. Ala yeke he azo so ayeke gboto mê ti ala na ndo lango ni so. Ye so adö bê ti atâ Chrétien pëpe. Ala dabe ti ala na gbotongo mê so bazengele Pierre amû: “A lingbi i hinga ye so kozoni, na lâ ti nda ni, fade azo ti hengo zo aga na tënë ti he, fade ala tambela na lege ti nzara nde nde ti tere ti ala mveni, na ala tene, Zendo ti singo ti Lo ayeke na ndo wa? teti, a komanse na lâ ni so akotara alango awe, ye kue angbâ legeoko tongana a yeke giriri, a komanse na lâ ni so A créé ye kue.”​—2 Pierre 3:3, 4.

7. Nyen la ayeke mû maboko na e ti ngbâ ti bâ lâ ti Jéhovah tongana ye so ayeke si fade fade?

⁷ Nyen la ayeke mu ande maboko na e ti ke mara ti sioni bibe tongaso na ti ngbâ ti bâ lâ ti Jéhovah tongana ye so ayeke si fade fade? Pierre atene na e: “Mbi dabe i si mbi lingbi zingo bibe ti i, so ayeke na sioni oko pëpe, ti girisa pëpe tënë so aprophète ti nzoni-kue atene giriri, na komandema ti Seigneur na Sauveur so abazengele ti i afa na i.” (2 Pierre 3:1, 2). Tongana e bi bê na ndo ti aprophétie so a sû ti gboto mê ti e, a yeke ‘zingo bibe ti e’. Peut-être e mä atënë ti dango bê so lege mingi awe, me a yeke laso kota ye mingi ahon ti kozo ti tene e ngbâ ti bi bê na ndo ti agbotongo mê so.​—Esaïe 34:1-4; Luc 21:34-36.

8. Ngbanga ti nyen azo mingi adengi mê pëpe na atënë ti dango bê so?

⁸ Ngbanga ti nyen ambeni zo adengi mê pëpe na atënë ti dango bê so? Pierre angbâ ti tene: ‘Ala ye ti girisa tënë so: na lege ti tënë ti Nzapa, ayayu ayeke giriri kozoni, na sese ayeke, sese so alondo na yâ ngu na aga na lege ti ngu; na lege ti ye so, sese so ayeke giriri a futi, teti ngu ahon ndo ti sese kue.’ (2 Pierre 3:5, 6). Biani, ambeni zo aye pëpe ti tene lâ ti Jéhovah aga. Ala ye pëpe ti tene mbeni ye akanga lege na ala ti sara ye so bê ti ala aye. Ala ye pëpe si Jéhovah airi ala ti kiri tënë na lo ndali ti sarango ye ti kion ti ala. Tongana ti so Pierre atene, ala sara ye gi tongana ti so “ala ye”.

9. Azo ti ngoi ti Noé na ti Lot asara ye lani tongana nyen?

⁹ Teti so “ala ye” tongaso, azo ti hengo ndo so asoro ti girisa so Jéhovah asara ambeni ye ândö awe. Jésus Christ nga na bazengele Pierre asara tënë na ndo ti angoi use so Jéhovah afuti azo: “lâ ti Noé” nga na “lâ ti Lot”. (Luc 17:26-30; 2 Pierre 2:5-9). Kozo ti tene Kota Moa aga, azo agbu li pëpe na ndo gbotongo mê so Noé amû. Legeoko nga, kozo ti tene a futi Sodome na Gomorrhe, Lot ayeke “tongana zo ti sara ngia senge” na lê ti akogara ti lo so aye ti mû amolenge ti lo ti wali.​—Genèse 19:14.

10. Ye nyen Jéhovah atene na azo so agbu li pëpe na ndo atënë ti gbotongo mê?

¹⁰ A yeke nga legeoko laso. Ye oko, bâ ye so Jéhovah atene na azo so agbu li pëpe na ndo ti atënë ti gbotongo mê: “Mbi fâ ngbanga na ndo azo so angbâ na yâ siokpari lâ mingi, ala so atene, Fade L’Eternel asara nzoni wala sioni pëpe. Fade mosoro ti ala aga ye so azo anzi, na da ti ala afuti kue. Fade ala sara da me ala duti na yâ ni pëpe; fade ala lu vigne na yaka me ala nyon vin ni pëpe.” (Sophonie 1:12, 13). Azo alingbi ti ngbâ ti sara akusala ti ala ti lâ oko oko, me aye ti peko ti ngangu kusala so ala yeke sara ayeke ngbâ ande lakue pëpe. Ngbanga ti nyen? Ngbanga ti so lâ ti Jéhovah ayeke si ande gi hio tongaso, na aye ti mosoro so ala bungbi ni alingbi ti sö ala pëpe.​—Sophonie 1:18.

Ngbâ ti “ku” ni

11. Gbotongo mê wa a yeke nzoni e dabe ti e na ni?

¹¹ Nde na azo ti sioni so angoro e, a lingbi e ngbâ ti dabe e na gbotongo mê ti prophète Habakuk so atene: “Ye so mo bâ tongana suma, fade a si na l’heure ni so a leke awe, fade tënë ni ague juska na nda ni, na a ga mvene pëpe. Tongana tënë ni asi fade pëpe, mo ku; fade a ga biani, a manke pëpe.” (Habakuk 2:3). Même tongana na bango ndo ti e ti zo e bâ so lâ ni so asi hio pëpe, a lingbi e dabe ti e so Jéhovah ayeke sara ye yeke pëpe. Fade lâ ti lo ayeke si tâ na ngoi ni, na mbeni ngoi so azo aku tere ti ala na ni pëpe.​—Marc 13:33; 2 Pierre 3:9, 10.

12. Ye wa Jésus afa tënë ni kozoni? Tongana nyen sarango ye ti azo so ayeke nde na ti adisciple ti lo so ayeke be-ta-zo?

¹² Ti fa na e so a yeke kota ye ti tene e ngbâ lakue ti ku lâ ti Jéhovah, Jésus atene so même ambeni disciple ti lo ayeke bâ mbeni pëpe lâ ti Jéhovah tongana ye so ayeke si fade fade. Lo fa kozoni ye so ayeke si na ala, lo tene: “Me tongana boi ti sioni so atene na bê ti lo, Mveni ti mbi aga fade pëpe; na lo komanse ti pika afon lo boi, na ti te na ti nyon na popo ti ala so sämba asara ala, fade mveni ti boi so asi na lâ ni so lo yeke ku lo pëpe, na l’heure ni so lo hinga pëpe, na fade lo se lo na chicotte ngangu.” (Matthieu 24:48-51). Nde na azo so, bungbi ti ngbâa be-ta-zo na ti ndara angbâ ti bâ lâ ti Jéhovah tongana ye so ayeke si fade fade. Juska laso, lê ti ngbâa so angbâ ti kpengba na lo fa so lo leke tere ti lo awe. Jésus azia ngbâa so “na ndo ye ti lo kue” so ayeke ge na sese.​—Matthieu 24:42-47.

A hunda ti sara ye hio

13. Tongana nyen Jésus agboto lê na ndo nene ti sarango ye hio?

¹³ A hunda lani ti tene akozo Chrétien aduti lakue nduru ti sara ye hio. A hunda na ala ti sigigi hio na yâ ti Jérusalem tongana ala bâ “aturugu angoro” gbata ni (Luc 21:20, 21). A yeke ye so asi na ngu 66. Bâ tongana nyen Jésus afa so a hunda lani na aChrétien ti sara ye hio, lo tene: “Zia zo so ayeke na ndoda azu na sese pëpe ti kamata ye so ayeke na yâ da ti lo. Zia zo so ayeke na yaka akiri ti kamata bongo ti lo pëpe.” (Matthieu 24:17, 18). Teti so mbaï afa so a futi Jérusalem pëpe juska ngu osio na pekoni, ngbanga ti nyen a hunda lani ti tene aChrétien asara ye hio tongana ti so Jésus atene na ti sigigi na ngu 66?

14, 15. Ngbanga ti nyen a yeke kota ye lani ti tene akozo Chrétien asigigi hio na yâ ti Jérusalem tongana ala bâ aturugu angoro gbagba ni?

¹⁴ Atâa so aturugu ti Rome afuti Jérusalem pëpe juska na ngu 70, akpale asi mingi na yâ ti angu osio so aga kozoni na ngu so. Angu so aduti lani mbeni ngoi so sarango ngangu na sango mênë ahon ndo ni. Mbeni wasungo mbaï afa ye so asi na yâ Jérusalem na ngoi ni so tongana “mbeni bira so azo asara na popo ti ala na so amû mbeto mingi, na a sara si mênë atuku lani mingi nga na mbage, a sara sana na azo mingi.” A mû lani amaseka-koli ti bata gbagba ti Jérusalem, ti mû aye ti bira nga ti sara kua ti turugu. Lâ oko oko, ala yeke manda kua so. A bâ azo so asara ye na wâ pëpe ti bata kodoro tongana azo ti kango kodoro ni. Tongana aChrétien angbâ lani ti duti kete na yâ ti kodoro ni, ka ye ayeke duti ngangu mingi na ala.​—Matthieu 26:52; Marc 12:17.

¹⁵ Bâ so Jésus atene so a lingbi “ala so ayeke na Judée akpe” me gi pëpe ala so ayeke na Jérusalem. A yeke kota ye ti sara tongaso ndali ti so gi na yâ ti ambeni nze kete so aturugu ti Rome azia Jérusalem, ala kiri ti sara bira na kodoro ni. Kozoni, ala mû Galilée na ngu 67 nga na pekoni, yeke na yeke ala mû Judée na ngu 68. Mungo agbata so asara si azo abâ pasi lani mingi na yâ ti akete kodoro. Na a yeke lani ngangu mingi na mbeni Juif ti kpe Jérusalem. A yeke bata lani yanga ti gbagba ti gbata ni, na a yeke bâ azo so ayeke tara ti kpe tongana azo so aye ti gue na mbage ti aturugu ti Rome.

16. A hunda lani na akozo Chrétien ti duti na bango ndo wa ti tene ala sö kuâ na ngoi ti vundu so?

¹⁶ Ti hinga aye so kue amû maboko na e ti hinga nda ni so Jésus aluti mingi na ndo nene ti sarango ye hio. A lingbi aChrétien aduti lani nduru ti gbanzi tere ti ala na ambeni ye na ti zia pëpe si akungba ti ala akanga lege na ala. A lingbi ala duti nduru ti ‘zia ye ti ala kue’ si ala mä gbotongo mê so Jésus amû (Luc 14:33). Ala so ayeda lani hio na gbotongo mê so na akpe na mbage ti Ngu ti Jourdain asö fini ti ala.

Ngbâ ti bâ nene ti sarango ye hio

17. Ngbanga ti nyen a yeke nzoni lê ti e akiri akpengba mingi ahon ti kozo?

¹⁷ Aprophétie ti Bible afa na e polele so e lï mingi na yâ ngoi ti nda ni. A lingbi lê ti e akiri akpengba mingi ahon ti kozo. Na ngoi ti siriri, mbeni turugu ahinga agingo bê nga na akpale ti bira pëpe. Me tongana na ngoi so lo bi bê ti lo na ndo ti bira pëpe na gi hio tongaso a iri lo ti gue ti tiri bira, peut-être lo lingbi ti wara kuâ ngbanga ti so lo leke tere ti lo pëpe. A yeke legeoko nga na lege ti yingo. Tongana e ngbâ ti bâ pëpe nene ti sarango ye hio, a yeke sara si e leke tere ti e pëpe ti luti na gbele akpale so ayeke ku e, na tongaso lâ ti Jéhovah ayeke si na ndo ti e gi gbagburu tongaso (Luc 21:36; 1 aThessalonicien 5:4). Tongana ambeni zo “azia lege ti” Jéhovah, a yeke ngoi ni la ti tene ala kiri agi lo.​—Sophonie 1:3-6; 2 aThessalonicien 1:8, 9.

18, 19. Ye wa ayeke mû ande maboko na e ti ngbâ ti ku singo ti ‘lâ ti Jéhovah’?

¹⁸ A dö bê ti e pëpe so bazengele Pierre awa e ti ngbâ ti bi bê na ndo ‘singo ti lâ ti Jéhovah’. E lingbi ti sara ni tongana nyen? Mbeni lege ni ayeke ti ngbâ ti sara akusala mingi tongana “azo so ayeke nzoni-kue, na azo so abata tënë ti Nzapa”. (2 Pierre 3:11, 12). Sarango tongaso ayeke sara si e ngbâ ti ku ‘lâ ti Jéhovah’ na ngia, na e yeke “sara ye si lâ aga fade”. E lingbi pëpe ti sara si tanga ti alango ti singo ti lâ ti Jéhovah ahon hio. Ye oko, tongana e yeke na aye mingi ti sara na yâ kusala ti Nzapa na ngoi so e yeke ku, a yeke sara si alango ahon hio sân ti tene e hinga.​—1 aCorinthien 15:58.

¹⁹ Tongana e gbu li na ndo Mbeti ti Nzapa nga e bi bê na atënë ti dango bê so ayeke na yâ ni, a yeke mû nga lege na e ti sara ye so: ti fa so e ‘yeke ku lango ti gango ti Nzapa na e ye ti tene a ga hio’. (2 Pierre 3:12, Fini Mbuki, 2001 ). Na yâ ti atënë ti dango bê so, mo yeke wara nga gbâ ti aprophétie so afa gi pëpe tënë ti gango ti lâ ti Jéhovah me a fa nga gbâ ti apendere deba nzoni so fade azo so angbâ ti ‘ku Jéhovah juska lâ ni so’ ayeke wara ande ni.​—Sophonie 3:8.

20. Wango wa a yeke nzoni e mû na nene ni mingi?

²⁰ Biani, a yeke ngoi ni la ti tene e kue e mû na nene ni mingi wango so a mû na lege ti prophète Sophonie so atene: “Kozoni si ngonzo ti wâ ti L’Eternel aga na ndo i, kozoni si lâ ti ngonzo ti L’Eternel aga na ndo i. I gi L’Eternel, i azo ti tâ be-ti-molenge so ayeke na ndo sese, i so i bata kpengba-tene ti Lo. I gi mbilimbili na i gi tâ be-ti-molenge; peut-être fade a honde i na lâ ti ngonzo ti L’Eternel.”​—Sophonie 2:2, 3.

21. Ye wa awakua ti Nzapa aleke na bê ti ala ti sara ande na yâ ti ngu 2007?

²¹ Tongaso, a yeke tâ na lege ni so a soro versê so tongana versê ti ngu 2007: ‘Kota lâ ti Jéhovah aga nduru.’ Awakua ti Nzapa ahinga na bê ti ala kue so kota lâ ti Jéhovah “aga nduru, na a yeke ga fade fade.” (Sophonie 1:14). “Fade a ga biani, a manke pëpe.” (Habakuk 2:3). Na ngoi so e yeke ku lango so, zia lê ti e angbâ lakue ti kpengba si e girisa pëpe ngoi so e yeke dä na e ngbâ ti hinga so ndangba gango tâ tënë ti aprophétie so aga nduru awe!

Mo lingbi ti kiri tënë?

• ‘Kota lâ ti Jéhovah’ ayeke nyen?

• Ngbanga ti nyen azo mingi laso abâ pëpe nene ti sarango ye hio?

• Ngbanga ti nyen a hunda lani na akozo Chrétien ti sara ye hio?

• Ye wa e lingbi ti sara si lê ti e akiri akpengba ahon ti kozo?

[Kete tënë na lembeti 12]

Fade versê ti ngu 2007 ayeke: ‘Kota lâ ti Jéhovah aga nduru.’​—Sophonie 1:14.

[Afoto na lembeti 8, 9]

Legeoko tongana ti so a si na lâ ti Noé, lâ ti Jéhovah ayeke tï na ndo ti azo ti hengo ndo gi hio tongaso

[Foto na lembeti 10]

A hunda na aChrétien ti sigigi hio na yâ ti Jérusalem tongana ala bâ “aturugu angoro” gbata ni