Mo Yeke Gue ti Sala Kodoro na Mbeni Ndo?
Tongana a yeke tongaso, aye mingi ayeke dä so a lingbi mo na ambeni zo asala. Tongana mo sala ye alingbi na akozo kapa so a fa ni na gbe ni ge, fade mo yeke ga hio mbage ti fini kongrégation ti mo.
1) Na ngoi so mo hinga awe ndo so mo yeke gue dä, secrétaire ti ngbele kongrégation ti mo alingbi ti wara adresse ti Da ti Royaume ti fini kongrégation ti mo. Tongana mo si na ndo ni, gi ndo so Da ti Royaume ayeke dä na gi ti hinga angbonga ti abungbi. Tongana akongrégation mingi abungbi na yâ ti Da ti Royaume ni, hunda a-ancien ni ti fa na mo na yâ ti territoire ti kongrégation wa mo yeke dä. Ku pepe ti gue na abungbi na gi ti tingbi na a-ancien ti kongrégation ni.
2) Fade secrétaire ti ngbele kongrégation ti mo na lo ti fini ni ayeke sala kusala maboko na maboko ti tokua Carte ti mo ti kusala ti wafango tene nga na ti azo ti sewa ti mo. Fade a yeke tokua nga mbeni mbeti ti fa mo na a-ancien ti fini kongrégation ti mo. (Ba Le ministère du Royaume ti août 1991, Réponses à vos questions.) Fade komite ti kusala ti fini kongrégation ti mo ayeke sala tene ti gango ti mo na zo so amu li ni na yâ ti mandango buku ti ndo so mo yeke dä si lo lingbi ti gi ti ba mo na ti fa na mo ndo ti fini bungbi ti mandango buku ti mo.—aRom. 15:7.
3) Awafango tene kue ti fini kongrégation ti mo ayeke na mbeni pendere kungba ti yö: ti gi ti hinga mo na ti sala si mo duti na ngia. (Ba 3 Jean 8.) Tâ tene, tongana mo ye ti kangbi na aita-koli nga na aita-wali awango tele so akpengba zo, a lingbi mo ga na abungbi.
4) Adu ti mo, ku pepe ti hunzi kue awe akusala so aga na lege ti guengo na mbeni ndo kozoni si mo fa tene na fini kongrégation ti mo. Zia aye ti Royaume na kozo ndo, na fade tanga ni aga na peko; na ndo ni mo yeke duti ande na ngia na yâ fini ndo ti mo. (Mat. 6:33) Tongana mo duti nzoni awe na yâ fini da ti mo, peut-être mo ye ande ti tisa ambeni zo ti kongrégation ti ga na ndo ti mo si mo hinga ala nzoni.—aRom. 12:13b.
Guengo ti sala kodoro na mbeni ndo ayeke gbian aye mingi. Ye oko, tongana azo kue so tene ni andu ala asala ye so a hunda, fade agbiango ye so ayeke sala sioni pepe na ndo dutingo na lege ti yingo. E kue e yeke hinga ande biani so e yeke mbage ti mbeni kota sewa ti aChrétien so ayeke na be-nzoni.