A Lingbi ti Tene Nyen na Mbeni Juif?
1 Na kozo siècle, “amolenge ti Israël” mingi ayeda na fango tene ti Jésus na ti abazengele ti lo. (Kus. 10:36) Legeoko nga na ngoi ti e laso, aJuif so bê ti ala ayeke nzoni ayeda na tâ tene, pepe gi na Israël me nga na Russie, na États-Unis ti Amérika, nga na ambeni kodoro. Mo ye ti sala apendere lisoro na aJuif? Fade awango so a mu ge ayeke mu maboko na mo ti fa tene na kode, atä na aJuif so amä na bê wala ala so amu peko ti lege ti vorongo pepe.
2 Fango tene na aJuif so amä na bê: Zia e hinga nzoni so fani mingi, aJuif so amä na bê abi bê ti ala mingi na ndo batango angobo ti salango ye ti a-rabbin ahon ti fa nda ti ambilimbili kota tene ti mabe. Biani, mingi ni ala ba so ngangu ti komande ti atene ti akotara nga na ti Mbeti ti Nzapa ayeke kue legeoko. Tongaso, alisoro na ndo akpengba tene ti Bible agbu bê ti ala lakue pepe. Na lë ti ala, ala yeke ba nga Bible tongana buku ti aChrétien. Ni la, a yeke nzoni ahon ti sala kusala na atene tongana “Mbeti ti Nzapa so asala na yanga ti Hébreu,” “Torah,” wala “Mbeti ti Nzapa.” Brochure Connaîtrons-nous un jour un monde sans guerre? so a leke ni mbilimbili teti aJuif ayeke mbeni pendere gbakuru ti kusala.
3 Akota tene wa a lingbi ti gbu bê ti mbeni Juif so amä na bê? A-Juif amä na bê na mbeni Nzapa oko so abi bê ti lo biani na zo. Ala mä na bê nga so Nzapa ayeke bi tele na yâ atene ti azo. Na ndo atene tongaso, lege ayeke dä ti mä tele na zo ni. Na mbage, tene ti apono so asi na mara ti ala na ngoi ti Use Bira so Amu Sese Kue agbu bê ti aJuif mingi. Ala yeke hunda tele ti ala ngbanga ti nyen Nzapa azia lege na mara ti aye ti kirikiri tongaso, na lawa si fade sioni ayeke hunzi. E lingbi nzoni ti kiri tene na mara ti ahundango tene tongaso, na tapande, na salango tene ti aye so asi na aita ti e na ngoi ti kota fango zo ti aNazi.
4 Biani, ti kpe ti tene zo ni ake tene ni, a yeke nzoni pepe ti yôro hio na yâ lisoro ni tene so ayeke ti gi ti hinga Messie ayeke zo wa. Nde na so, a lingbi ti sala lisoro na ndo ti kusala so Moïse asala na yâ mbaï ti Israël na ti hunda zo ni wala lo mä na bê so a lingbi lakue ti sala kusala na afango ye ti Moïse na ngoi ti e laso. Tongana a ba so a lingbi ti sala lisoro na ndo zo wa si Messie ni ayeke, a lingbi ti to nda ni na dikongo Deutéronome 18:15: “Fade L’Eternel [“Jéhovah,” NW] Nzapa ti mo ahiri Prophète oko teti mo na popo ti aita ti mo tongana mbi (a lingbi i mä yanga ti Lo).” Hunda zo ni ti hinga zo wa Moïse abi bê na lo tongana lo sala tene ti mbeni prophète tongana lo. Na pekoni, ba ambeni tene ti brochure Un monde sans guerre, lembeti 14, § 17 na 18.
5 A-Juif so amu peko ti lege ti vorongo pepe ayeke na mbeni bango ndo nde: A yeke pepe ala kue so atene ala yeke Juif si ayeda na afango ye ti lege ti vorongo ti aJuif. Bango ndo ti aJuif mingi andu pepe tene ti lege ti vorongo. Ala bi bê ti ala mingi ti maï dutingo ti aJuif so ayeke nde, na angobo ti salango ye ti akotara ti ala, nga na fango ye ti ala, ahon ti sala ye alingbi na lege ti vorongo ti aJuif. Ambeni Juif so amu peko ti lege ti vorongo pepe ayeke a-agnostique (so ti tene, ala hinga mbilimbili pepe wala biani Nzapa ayeke dä), na ambeni même atene Nzapa ayeke dä pepe. Fade a yeke wara alengo mingi pepe tongana, na tongo nda ni, afa aversê mingi ti Mbeti so asala na yanga ti Hébreu. A yeke duti nzoni mingi ahon ti to nda ti lisoro ni tongana ti so a yeke sala ni na mbeni zo so amä na bê pepe. Na tapande, a lingbi ti fa tongana nyen Bible ayeke nzoni teti e laso. Tongana zo ni amä na bê pepe so Bible alondo na Nzapa, ambeni tene ti brochure Un monde sans guerre alingbi ti mu maboko, mbilimbili atene so ayeke na mbage so ato nda ni na lembeti 3 so li ti tene ni ayeke “La Bible: inspirée par Dieu?”
6 Ti fa tene na mbeni Juif, mo lingbi ti tene:
◼ “Mingi na popo ti e awara vundu ti glisa mbeni zo so e ndoye lo mingi. Ti mo, tongana e kui, ye nyen asi na e?” Zia zo ni akiri tene. Na pekoni, fa na lo encadré so li ti tene ni ayeke “Que sont la mort et l’âme?” na lembeti 22 ti brochure Un monde sans guerre. Encadré so ahaka ye so Mbeti ti Nzapa atene na ndo ti fini na peko ti kuâ na ye so a-rabbin afa. Na pekoni, gue na paragraphe 17, lembeti 23, na fa so na lege ti Mbeti ti Nzapa, a yeke zingo ande azo so akui ti duti na fini na ndo sese so ayeke ga paradis. Mu na lo brochure ni. Ti leke ndo teti mbeni vizite ti peko, mo lingbi ti tene so kotara Job amä na bê la ni na londongo ti awakinda. Fa aversê ti Bible so a mu na hunzingo ti paragraphe 17, na fa na lo so mo ye ti kiri ti sala lisoro na ndo ni.
7 Abuku ti Matthieu, Marc, Luc, Jean, na Kusala afa so aJuif adengi mê na tâ tene na asala ye alingbi na ni. Laso, Jéhovah angbâ ti bata lege so ague na fini ti lakue lakue na zingo ni. A-Juif mingi so ayeke na bê ti nzoni alingbi lakue ti manda ti hinga Jéhovah, tâ Nzapa, si ala nga alingbi ti duti na fini ti lakue lakue na yâ fini sese ti Nzapa.—Michée 4:1-4.