Mo Ba Be-nze-pepe ti Jéhovah na Nene Ni?
1 Tongana Jéhovah aduti la ni pepe na be-nze-pepe na yâ ti angu bale oko so ahon, so amu lege ti sala tene ti témoin na azo mingi, ka mo hinga tâ tene? E kiri biani singila teti so lo zi lege na azo mingi ti ‘ga ti gbian bê ti ala’! Ye oko, fade kota lâ ti fango ngbanga ti Jéhovah ayeke “ga tongana wanzi.” (2 Pi. 3:9, 10) Tongaso, be-nze-pepe ti Nzapa aye ti tene pepe so nda ti bungbi ti aye so ayeke ga ande hio pepe.—Hab. 2:3.
2 Ba mawa ti azo: Be-nze-pepe so Jéhovah angbâ ti fa ahon ngangu ti e ti gbungo nda ti ye. A lingbi e glisa pepe nda ni. (Jonas 4:1-4, 11) Jéhovah aba dutingo ti azo so amu vundu na lo ba mawa ti ala. Jésus ayeke na mara ti abibe tongaso. Teti lo ba mawa ti azo so lo yeke fa tene na ala, lo ye la ni ti tene kusala ti fango tene amu ndo si lege azi na azo mingi ti wara fini ti lakue lakue.—Mat. 9:35-38.
3 Tongana mbeni kpale asi, bê ti e adö pepe teti azo so ahinga tâ tene pepe? Laso, azo ti ngoi ti e ayeke tongana “angasangbaga so ayeke na berger pepe” so asala ngangu ti hon ndo ti kpale ti sese so na ti wara mbeni nda ti fini. (Marc 6:34) Na fango tene na wâ, e yeke dë bê ti ala so ayeke ndulu ti dengi mê na e fa tongana nyen e ba be-nze-pepe ti Jéhovah na nene ni.—Kus. 13:48.
4 Kusala ti e alingbi ti ku pepe: Na ngu so ahon, azo 323 439 awara batême na azo ahon 14 000 000 aga na Matanga ti Dango Bê. Tongaso, azo mingi alingbi ti sö kuâ na futingo ti sioni bungbi ti aye so. Wungo ti azo so asi singo ayeke duti ande oke, e hinga pepe. (Apoc. 7:9) Ngoi oke angbâ na kusala ti e tongana awafango tene, e hinga nga ni pepe. Me Jéhovah ahinga. A yeke fa ande nzo tene na ngoi kue so bê ti lo aye, “na pekoni, fade nda ni aga.”—Mat. 24:14, NW.
5 Ngoi so angbâ ayeke gi kete na lâ ti Nzapa aga ndulu. (1 aCor. 7:29a; aHéb. 10:37) Kite oko ayeke dä pepe, “salut ti e aga ndulu na e awe, a hon ti lâ ni so e mä na bê.” (aRom. 13:11) Zia e glisa pepe nda ti be-nze-pepe ti Nzapa. Nde na so, zia e fa tene na wâ, si ambeni zo so asala nzala ti mbilimbili alingbi nga ti wara kota be-nzoni ti Jéhovah.