YE TI MANDA 47
Nzoni salango kusala na aye so lê abâ
NGBANGA ti nyen ti sala kusala na ye so lê abâ na yâ fango ye ti mo? Ngbanga ti so salango tongaso alingbi ti sala si fango ye ti mo alë lengo mingi. Jéhovah Nzapa na Jésus Christ asala lani kusala na ye so lê abâ, na e lingbi ti manda ye na mbage ti ala. Tongana a zia aye so lê abâ na ndo tënë so a tene, zo ayeke wara asango ni na lege ti lê nga na mê ti lo. Ye so alingbi ti gboto lê ti azo so ayeke mä mo nga ti kiri ti ndu bê ti ala ngangu. Tongana nyen mo lingbi ti yôro na yâ ti fango nzo tënë ti mo aye so lê abâ? Tongana nyen mo lingbi ti hinga biani so mo yeke sala kusala na ala nzoni?
Lege so akota Wafango ye ahon atanga ni kue asala kusala na ni. Jéhovah asala kusala na aye so lê abâ, so a yeke ngangu ti girisa ni, ti fa akpengba ye. Na mbeni bï, lo sigigi na Abraham na lo tene: “Yä lê ti mo na nduzu, mo diko atongoro ni, tongana mo lingbi diko ala. . . . Fade ahale ti mo ayeke tongaso.” (Gen. 15:5). Atâa so ye so a mû zendo ni ayeke mbeni ye so alingbi ti si pëpe na lê ti zo ti mitele, ye ni andu bê ti Abraham ngangu mingi na lo mä na bê na Jéhovah. Na mbeni ngoi nde, Jéhovah atokua Jérémie na da ti zo ti lekengo ta, na lo sala si Jérémie alï na yâ ndo ti kusala ni ti bâ koli so na lekengo ndô. Ye so adabe ti zo biani na ndo ngangu ti Wasalango ye na ndo azo ti mitele! (Jér. 18:1-6). Nga, ye so Jonas amanda na ndo be-nzoni so Jéhovah afa na lo na lege ti keke ti kangu, lo lingbi ti girisa ni tongana nyen? (Jonas 4:6-11). Jéhovah ahunda même na aprophète ti lo ti haka peko ti ye so atokua ti ala aye ti fa na ngoi so ala yeke sala kusala na ambeni mbilimbili ye (1 aGbia 11:29-32; Jér. 27:1-8; Ezéch. 4:1-17). Aye so ayeke na yâ ti tabernacle nga na yâ ti temple ayeke gi atapande so amû maboko na e ti gbu nda ti aye so ayeke na yayu (aHéb. 9:9, 23, 24). Nzapa asala nga kusala na gbâ ti asuma ti fa akpengba sango.—Ezéch. 1:4-28; 8:2-18; Kus. 10:9-16; 16:9, 10; Apoc. 1:1.
Jésus asala kusala lani na aye so lê abâ tongana nyen? Tongana aFarizien na azo so amû peko ti Hérode aye ti gbu lo na gbanda na yâ atënë ti lo, Jésus ahunda na ala ti mû na lo denier oko, na lo gboto lê ti ala na ndo image ti César na ndo lê ti nginza ni. Na pekoni lo tene a lingbi a futa aye ti César na César, me a lingbi a futa aye ti Nzapa na Nzapa (Mat. 22:19-21). Ti fa ye na ndo gondango Nzapa na aye kue so e yeke na ni, Jésus afa mbeni womua na temple so offrande ti lo, akete lê ti pata use, ayeke gi ye kue so lo yeke na ni ti te na ye (Luc 21:1-4). Na mbeni ngoi, lo mû mbeni kete molenge tongana tapande ti fa nene ti dutingo na tâ be-ti-molenge ahon ti duti na kota nzara ti wara kota ndo (Mat. 18:2-6). Lo mveni lo fa na gigi nda ti dutingo na tâ be-ti-molenge na lege so lo sukula gere ti adisciple ti lo.—Jean 13:14.
Alege ti sala kusala na aye so lê abâ. Nde na Jéhovah, e lingbi pëpe ti fa ye na lege ti asuma. Ye oko, afoto so apusu zo ti gbu li ayeke mingi na yâ ti ambeti ti aTémoin ti Jéhovah. Sala kusala na ni ti mû maboko na azo so asala nzara ti tënë ni ti bâ na lê ti ala Paradis na ndo ti sese, so a mû zendo ni na yâ ti Tënë ti Nzapa. Na ngoi ti mandango Bible na mbeni zo, mo lingbi ti gboto lê ti wamandango ye ni na ndo mbeni foto so andu ye so ala yeke manda, na hunda na lo ti fa ye so lo bâ. A yeke kota ye ti hinga so tongana Jéhovah amû ambeni suma na prophète Amos, Lo hunda lo, Lo tene: “Amos, mo bâ nyen?” (Amos 7:7, 8; 8:1, 2). Mo lingbi ti hunda a-oko hundango tënë tongaso na ngoi so mo yeke gboto lê na ndo afoto so a leke ni ti mû maboko na zo ti bâ ye ni na li ti lo.
Tongana mo sû na mbeti wungo ti aye so atingbi na ndo ti mba, wala mo sala kusala na mbeni tableau so afa tongana nyen aye asi na peko ti mba, ye so alingbi ti mû maboko na azo ti gbu hio mingi nda ti aprophétie tongana ti “ngoi mbasambala” ti Daniel 4:16 nga ti “semaine bale-mbasambala” ti Daniel 9:24. Mara ti atableau tongaso asigigi mingi na yâ ti ambeti ti e ti manda na ye.
Na yâ mandango ye ti mo na sewa, lisoro na ndo aye tongana tabernacle, temple na Jérusalem nga temple ti suma ti Ezéchiel alingbi ti duti ngangu pëpe tongana mo sala kusala na mbeni foto wala dessin. A lingbi ti wara aye so na yâ Étude perspicace des Écritures, na yâ ti atënë so ayeke na andangba lembeti ti Les Saintes Écritures — Traduction du monde nouveau — avec notes et références nga na anuméro nde nde ti Tour ti Ba Ndo.
Tongana mo yeke diko Bible na sewa ti mo, sala kusala nzoni na akarte. Gi ti wara lege so Abraham atambela dä, a londo na Ur ti gue na Haran nga ti si na Béthel. Bâ nzoni lege so mara ti Israël amû ti londo na Egypte na ti tambela ti si na Sese ti Zendo. Gi ti wara ndo so a mû na kete mara oko oko ti Israël tongana ye ti héritier. Ba nzoni konongo ti ndo ti komandema ti Salomon. Gi ti wara lege so Elie amû ti kpe a londo na Jizréel ti si na yando na peko ti Béer-Séba, na pekoni so Jézabel azia mbito na yâ ti lo (1 aGbia 18:46–19:4). Gi ti wara akodoro na agbata so Jésus afa tënë dä. Mû peko ti alege so Paul atambela dä, tongana ti so a fa ni na yâ buku ti Kusala.
Aye so lê abâ ayeke mû maboko mingi tongana a yeke fa na awamandango Bible tongana nyen kongregation ayeke tambela. Mo lingbi ti fa na wamandango ye ni mbeni programme ti akota bungbi, na mo fa na lo mara ti asango wa e yeke sala tënë na ndo ni na ngoi ni. Ye apika bê ti azo mingi tongana ala mveni atambela ti bâ yâ ti Da ti Royaume wala ala sala vizite na mbeni oko ti afiliale ti aTémoin ti Jéhovah. Ye so alingbi ti duti mbeni nzoni lege ti lungula asioni bibe na ndo kusala ti e nga nda ni so e yeke sala ni. Tongana mo yeke sala vizite ti Da ti Royaume na lo, fa tongana nyen a yeke nde na atanga ti ndo ti vorongo. Tene so a leke ni ti pika lê ti azo pëpe, me ti mû lege ti manda ye. Fa aye so a leke ni mbilimbili teti kusala ti e ti fango tënë, ando ti ambeti, karte ti territoire nga na asanduku ti a-offrande (so ayeke nde na ti rongo nginza).
Tongana avidéo so Wabatango Bungbi amû yanga ti leke ni ayeke dä, sala kusala na ni ti tene azo ni azia bê ti ala na Bible ahon ti kozo, ti tene ala hinga kusala ti aTémoin ti Jéhovah nga ti wa ala ti sala ye alingbi na akpengba-ndia ti Bible.
Salango kusala na aye so lê abâ ndali ti gbâ ti azo. Tongana a leke ni nzoni na a fa ni pendere mingi, aye so lê abâ alingbi ti duti anzoni gbakuru ti fango ye ndali ti gbâ ti azo. Bungbi ti ngbâa be-ta-zo na ti ndara ayeke mû agbakuru so na alege nde nde.
Mingi ni, a yeke wara na yâ a-article so e yeke manda na yâ ti Tour ti Ba Ndo aye so lê abâ tongana afoto na adessin, so zo so amû li ni alingbi ti sala na kusala ti fa nene ti akota tënë. A yeke nga tongaso teti ambeti so a sala kusala na ni na Mandango Buku ti Kongregation.
Ambeni plan ti akota diskur alingbi peut-être ti sala si salango kusala na aye so lê abâ alingbi na ni ti fa anene tënë. Ye oko, ye so ayeke ga na ye ti nzoni mingi ayeke ti gboto lê na ndo ye so ayeke na yâ ti Bible, so mingi ti azo ni ayeke na ni na maboko ti ala. Tongana, na mbeni ngoi, a hunda ti sala kusala na mbeni foto wala mbeni ndulu plan ti angbongboro tënë ti fa mbeni ngbongboro tënë oko wala ahon so, gi kozoni ti bâ wala azo so ayeke na ndangba mbage ti ndo ti bungbi ni alingbi ti bâ ni nzoni. A lingbi a sala kusala na aye so fani mingi pëpe.
Tongana e yeke sala kusala na aye so lê abâ ti sala tënë na azo na ti fa ye na ala, ye so e yeke gi ayeke pëpe ti zia gi ngia na bê ti azo. Tongana a sala kusala na mbeni ye so lê abâ, so ane zo, a lingbi a sala si zo abâ na yâ ti li ti lo atënë so a yeke nzoni a gboto lê na ndo ni. Aye tongaso ayeke sala kusala nzoni tongana ala mû maboko ti fa polele tënë so a tene na yanga, ti sala si zo agbu nda ni hio, wala tongana ala fa na gigi ngangu mingi nene ti ye so a tene. Tongana a sala kusala na ni na lege ni, mbeni ye so lê abâ, so alingbi na ni, alingbi peut-être ti pika bê ti zo ngangu, si ye so lê ti lo abâ nga tënë so aye ti fa angbâ na yâ ti li ti lo teti angu mingi.
Ngangu ti mä ye na ti bâ ye, ala use kue ayeke sala kota kusala na yâ mandango ye. Dabe mo tongana nyen akota Wafango ye so ahon atanga ni kue asala kusala na ni, na sala kue ti mû peko ti ala na yâ ngangu so mo yeke sala ti ndu bê ti azo.