Batango nzoni kapa ti aye ti yingo aga na adeba nzoni mingi
1. Ngbanga ti nyen a yeke nzoni ti kiri ti bâ kapa ti mo ti aye ti yingo?
1 Na ngoi so mo ga lani Chrétien, peut-être mo sara ando ngangu mingi ti zia na yâ sarango ye ti mo ti lâ oko oko aye ti yingo tongana mandango Bible, gango na bungbi, sigingo na fango tënë nga na sambela. Ye ti pekoni ayeke so Jéhovah airi deba nzoni na ndo ti angangu so mo sara na mo maï na lege ti yingo. Peut-être angu mingi ahon awe ngbene ye so mo wara batême. Mo ngbâ ti bata nzoni kapa ti aye ti yingo so mo zia lani na sese?
2. Tongana nyen si e yeke wara nzoni na lege ti dikongo Bible lâ oko oko?
2 Kiri mo bâ kapa ti mo ti aye ti yingo: Mo yeke diko ka ambeni mbage ti Bible lâ oko oko? So tâ kota deba nzoni si e yeke wara na sarango tongaso! (Jos. 1:8; Ps. 1:2, 3). Na Israël ti giriri, a hunda na mbeni gbia ti sara copie ti mbeti ti Ndia teti lo mveni na ti diko tënë ti mbeti so “na lâ ti [fini ti] lo kue.” Ye ti nzoni wa aga na pekoni? Lo yeke duti na tâ be-ti-molenge nga lo yeke manda ti kpe Jéhovah si lo gue nde na akomandema ti lo pëpe (Deut. 17:18-20). Legeoko nga laso, ti diko Bible lâ oko oko ayeke mû maboko na e ti lingbi kue nga ti duti na tënë na li ti e pëpe na yâ ti sioni sese ti laso so abuba mingi. A yeke mû nga lege na e ti wara aye kue so a hunda si e lingbi na kusala ti fango tënë.—aPhil. 2:15; 2 Tim. 3:17.
3. Aye ti nzoni wa e yeke wara na guengo lakue na abungbi?
3 A yeke lani na yâ ti sarango ye ti Jésus ti gue lakue na synagogue, mbeni ndo so a yeke fa ka Tënë ti Nzapa dä (Luc 4:16). Kite ayeke dä pëpe so sarango tongaso amû maboko na lo ti gbu ngangu na gbe ti atara so ayeke nduru ti si lani na lo. E nga kue, afango ye so e yeke wara na ngoi ti abungbi nga na dutingo na tere ti aita ayeke sara si “e kue e lingbi kpengba na lege ti mabe ti [mba]”. (aRom 1:12). Ti bungbi oko na aita ti e ayeke sara si e hon ndo ti akpale ti lâ ti nda ni so (aHéb. 10:24, 25). Mo ngbâ lakue ti gue na abungbi kue?
4. Tongana nyen ti fa tënë yenga na yenga ayeke ga na ye ti nzoni na e?
4 Bible afa na e so abazengele ayeke fa nzo tënë “lakue, na yâ Temple, na na yâ da ti azo” wala da na da (Kus 5:42). Tongana e wara lege ti fa tënë lâ oko oko pëpe, e lingbi ti mû mbage na mbeni ti alege nde nde ti fango tënë yenga oko oko? Na sarango tongaso, e yeke hinga ande ti sara kusala na Tënë ti Nzapa nzoni ahon ti kozo nga e yeke wara aye ti nzoni na ngoi so e yeke fa atâ tënë ti Bible na amba ti e.
5. Ngbanga ti nyen a yeke kota ye ti sambela Jéhovah lakue?
5 Prophète Daniel awara gbâ ti adeba nzoni ngbanga ti so lo sara na Jéhovah “lakue” na yâ ti fini ti lo kue. Na popo ti aye so lo sara lakue ayeke ti sambela Jéhovah (Dan 6:10, 16, 20). Legeoko nga, tongana e yeke sambela Jéhovah lakue na bê ti e kue, lo yeke mû na e yingo vulu ti lo (Luc 11:9-13). Mingi ahon so, Jéhovah ayeke ga nduru na e na lo yeke mû lege na e ti lë kpengba songo na lo (Ps. 25:14; Jacq. 4:8). So ayeke tâ nzoni ye ti pekoni! Tongaso, zia e sara kue ti bata mbeni nzoni kapa ti aye ti yingo si e wara adeba nzoni mingi so alondo na Jéhovah.