Lege ti mû maboko na azo so aga na Mémorial
1. Kpengba tënë ti témoin wa e yeke mä na lango 22 ti mars ngu 2008?
1 Na lango 22 ti mars 2008, fade azo kutu mingi na ndo ti sese kue ayeke mä mbeni kpengba tënë ti témoin. Fade azo so aga na Dango bê na kui ti Seigneur ayeke mä tënë na ndo ti kota ndoye ti Jéhovah so lo fa na mungo ye ti zi azo kue (Jean 3:16). Fade ala mä tënë na ndo ti Royaume nga lege so Jéhovah ayeke sara kusala na ni ti tene ye so lo ye teti sese mobimba aga tâ tënë (Mat. 6:9, 10). Fade ala yeke bâ na lê ti ala wani ndoye na beoko ti azo ti Nzapa, nga ala yeke bâ so e yeke yamba agene na ngia.—Ps. 133:1.
2. Na lege wa e lingbi ti mû maboko na awamandango Bible so aga na Mémorial?
2 Awamandango Bible: Ambeni zo so ayeke ga ande ayeke azo so akomanse ti manda Bible na e ade ti ninga pëpe. Fa ala na aita. Sara na ala tënë ti abungbi so e yeke sara yenga na yenga, na sara na ala vizite ti Da ti Royaume. Na yâ ti tënë ti lo, fade wamungo diskur ni ayeke wa azo tongaso ti ngbâ ti gue na li ni na lege ti yingo. Mo lingbi ti mû atënë ti lo ni ti wa na awamandango Bible ti mo.
3. Ye wa e lingbi ti sara ti wa awakua so azia ti fa tënë so aga na Mémorial?
3 Ala so azia ti fa tënë: Ambeni zo so ayeke ga ande ayeke awakua so azia ti fa tënë. Londo kozoni ti yamba ala na ngia. Kpe ti hunda ala na ambeni tënë wala ti tene atënë so alingbi ti sara si zo aduti nzoni pëpe. Ngoi kete na peko ti Mémorial ni, a lingbi a-ancien ague ti bâ azo tongaso, ti gonda ala ndali ti ngangu so ala sara ti ga, na ti tisa ala na bungbi ti peko so kongregation ayeke sara.
4. Fa tongana nyen zo oko oko alingbi ti mû maboko na agene.
4 Agene: Ambeni zo ni alingbi ti duti azo so e hinga ala wala asewa ti e so e tisa ala. Ti ambeni, ala wara tisango ndo ni na ngoi ti kapa ti kangbingo ambeti ni. Tongana mo bâ ambeni zo so mo hinga ala kozo pëpe, londo mo fa tere ti mo na ala, na tene na ala gango nzoni. Peut-être ala ga fani oko na mbeni bungbi ti e kozoni awe. Na yâ ti lisoro ti mo na ala, gi ti bâ tongana nyen ti kiri ti wara ala. Tongana mo gue mo wani ti bâ ala wala ti pika singa na ala na yâ ti akete lango so aga na peko ti Mémorial ni, a yeke mû lege na mo ti zia na yâ ti ala nzara ti manda ye mingi na ti hunda ti manda Bible na ala.
5. Nyen la e lingbi ti tene ti to nda ti manda Bible na mbeni zo?
5 E lingbi ti mû atënë so asigigi na yâ ti diskur ti Mémorial ni ti fa na buku Bible afa na ngoi so e kiri ti bâ mbeni zo. Na tapande, wamungo diskur ni alingbi ti diko tënë ti Ésaïe 65:21-23. Na ngoi so mo kiri, mo lingbi ti sara tënë ti diskur ni, na mo tene na lo: “Zia mbi fa na mo ambeni ye ti nzoni so kui ti Jésus aga na ni.” Na pekoni, sara lisoro na ndo ti aye so ayeke na lembeti 4-5 ti buku Bible afa. Wala mo lingbi tene: “Azo mingi ayeke hunda tere ti ala atene lawa si e yeke bâ gango tâ tënë ti prophétie ti Ésaïe so.” Na pekoni, sara lisoro na ndo ti chapitre 9, paragraphe 1-3. Mbeni ye ti sara ayeke gi ti mû atënë so asigigi na yanga ti wamungo diskur ni ti fa na zo ni buku Bible afa, na ti fa na lo tongana nyen ti manda ni.
6. Alege wa azi na e ti yeda na komandema ti Jésus so lo hunda ti dabe na kui ti lo?
6 Zia zo oko oko aduti nduru ti gbu alege kue so azi na lo ti mû maboko na awamandango Bible, awakua so azia ti fa tënë nga na agene so aga na Mémorial (Luc 22:19). Biani, fade Jéhovah ayeke iri tënë nzoni na ndo ti ye kue so e sara ti maï na kusala ti Royaume.