Chapitre 67

Ala wara lege ti gbu lo pepee

NA NGOI ti matanga ti Akpangba, amokonzi ti vorongo nzapa ato ambeni capita ti gbu Jésus. Jésus agi lege ti honde tele ti lo pepee, me lo ngba ti fa tene na le ti azo, lo tene: “Mbi ngba na i teti mbeni kete ngoi, na fade mbi gue na lo so ato mbi. Fade i gi mbi, na i wara mbi pepee, na ndo so mbi yeke da, i lingbi si ka pepee.”

A-Juif so agbu nda ti tene so pepee agi be ti ala: “Zo so ayeke gue na ndo wa? si e lingbi ti wara lo pepee. Fade lo gue na aJuif so akangbi na popo ti aGrec na lo fa nda ti tene na aGrec? Tene so lo fa ayeke nyen? ‘Fade i gi mbi, na i wara mbi pepee, na ndo so mbi yeke da, i lingbi si ka pepee’?” Biani, Jésus asala tene ti kui ti lo na tene ti londongo ti lo ti ma na nduzu, ndo so awato ti lo alingbi ti si da pepee.

Tanga ti lango mbasambala ti matanga ni asi awe. La oko oko na ndapelele mbeni prêtre atuku ngu so lo to na ngu ti Siloam na gbe balaga ni. Ti dabe awamango lo na ye so asala ni la na la, lo tene na kongo: “Tongana mbeni zo ayeke na nzala ti ngu, zia lo ga na mbi, lo nyon. Zo so ama na be na mbi, ‘Fade ngu so amu fini asigigi na be ti lo, a sua’, lege-oko tongana Mbeti ti Nzapa atene.”

Na ndo so, Jésus asala tene ti aye ti kpene so fade yingo ti nzoni-kue ti Nzapa ayeke sala na la ti Pentecôte, so ayeke si na ngu ti peko. Tongana adisciple 120 atonda ti sala kusala na gbe le ti azo, fade angu so amu fini asigigi biani. Me juska la ni so ade a sa yingo pepee, so aye ti tene, adisciple ti Christ ade asa yingo na ndo ala ti gue na nduzu pepee.

Teti so tene ti Jésus andu be ti ala, ambeni zo atene: “Biani, zo so ayeke Prophète Ni”, teti ala pensé na prophète so amu zendo giriri so lo yeke kota ahon Moïse. Me ambeni atene: “Lo yeke Christ.” Ambeni ake ala tene: “Nyen! Christ asigigi na Galilée? Mbeti ti Nzapa atene pepee? Christ ayeke ti hale ti David, na lo londo na Bethléhem, kodoro so David ayeke da giriri.”

Tene ti kangbi asi na popo ti azo ni. Ambeni aye ti gbu Jésus, me zo oko azia maboko na ndo lo pepee. Tongana acapita akiri senge, ala gbu Jésus pepee, akota prêtre na aFarizien atene na ala: “Teti nyen i ga na lo pepee?”

Acapita akiri tene: “Mbeni zo asala tene tongaso la oko pepee.”

Ngonzo agbu amokonzi ti vorongo nzapa so, tongaso ala sala tene ti mbana na ala zonga acapita. Ala hunda na tene ti mbana so: “I nga, i yeda na tene ti handa ti lo? Ambeni mokonzi wala Farizien ama na be na lo? Me azo mingi so, so ahinga Ndia pepee, zonga ayeke na li ti ala!”

Tongana lo ma tene ti ala, Nicodème, mbeni Farizien na mokonzi ti aJuif (so aye ti tene, lo yeke membre ti Sanhédrin), na mbito pepee lo mu mbage ti Jésus. I da be ti i peut-être so a sala fadeso ngu use na nze omene awe Nicodème aga na Jésus na bi ti fa na lo so lo ma na be na lo. Fadeso, Nicodème amu tene: “Nyen? Ndia ti i afa ngbanga na li ti zo kozoni si i ma tene ti lo, na i hinga ye so lo sala?”

Ngonzo ti aFarizien akiri alondo ti ma mbeni oko ti ala ti mu mbage ti Jésus. Ala tene na Nicodème: “Mo yeke zo ti Galilée nga? Mo gi, na mo baa, prophète oko alondo na Galilée pepee.”

Kamême so Mbeti ti Nzapa atene mbilimbili pepee so fade mbeni prophète alondo na Galilée, mbeti so afa so fade Christ asigigi na ya kodoro so, teti a tene fade “abaa kota lumière so asu” na ya kodoro so. Na mbage, adu Jésus na Bethléhem, na lo yeke hale ti David. Kamême so aFarizien ahinga ataa tene so kue, a yeke gi ala si afa tene ti mvene so na ndo Jésus. Jean 7:32-52; Esaïe 9:1, 2 [8:23; 9:1 sango]; Matthieu 4:13-17.

▪ Ye nyen asi na ndapelele oko oko kue ti matanga ni? Na lege wa si Jésus agboto le ti azo na ndo ye so?

▪ Ngbanga ti nyen acapita agbu Jésus pepee, na amokonzi ti vorongo Nzapa asala nyen?

▪ Nicodème ayeke zo wa? Lo pensé nyen na ndo Jésus, na atanga ti aFarizien atene nyen na ndo lo?

▪ Nyen afa so Christ ayeke sigigi ande na Galilée?