Chapitre 123

“Baa! Zo ni laa!”

BE TI Pilate ado tongana lo baa dutingo ti Jésus na lo hinga so Jésus asala ye pepee. Tongaso lo gi lege ti zi Jésus si lo gue. Lo tene na azo mingi: “Na lege ti tene ti kodoro ti i, a lingbi mbi zi na i mbeni zo ti kanga na la ti Pâque.”

Pilate ayeke na mbeni wafango zo so ahiri lo Barabbas na da ti kanga ti lo, tongaso lo hunda: “I ye mbi zi na i zo wa, Barabbas wala Jésus, so adi iri ti lo Christ?”

Azo mingi, so amokonzi ti aprêtre awa ala na apusu ala ti ke Jésus, aye si azi na ala Barabbas na afa Jésus. Me Pilate angba na ndo tene ti lo, lo kiri lo hunda ti fani use ni: “Na popo ti ala use, i ye mbi zi na i zo wa?”

Azo kue adekongo: “Barabbas!”

Li ti Pilate akpe, lo hinga ye so lo lingbi ti sala pepee, lo hunda: “Tongaso fade mbi sala nyen na Jésus, lo so adi iri ti lo Christ?”

Ala kue adekongo: “Kanga lo na keke ti pasi!” “Kanga lo na keke ti pasi! Kanga lo na keke ti pasi!”

Pilate ahinga azo ahunda kua ti zo so tene ayeke na li ti lo pepee, tongaso lo hunda: “Sioni so zo asala ayeke nyen? Mbi wara tene so alingbi na kui na li ti lo pepee; fade mbi se lo na mbi zi lo.”

Aye kue so Pilate atara ti sala ayeke gi senge senge na le ti azo mingi so ngonzo asi na be ti ala, teti amokonzi ti nzapa awa ala lakue. Ala kaï pepee ti dekongo: “A kanga lo na keke ti pasi!” Teti aprêtre apusu ala, azo ayeke na ngonzo mingi ahon, na ala ye si Jésus akui. Baa si, a sala laso gi lango oku, mingi na popo ti ala awara Jésus tongana Gbia ti ala na lingo ti lo na Jérusalem! Na ndembe so kue, adisciple ti Jésus, tongana ala yeke da, afa tele ti ala pepee na ala sala mbeni ye pepee.

Tongana Pilate abaa so atene ti lo ayeke gi senge senge, na asala si wuluwulu ti azo ahon ndoni, lo mu ngu, lo sukula maboko ti lo na gbele azo kue na lo tene: “Ngbanga ti mene ti zo ti mbilimbili so ayeke na li ti mbi pepee. So ayeke ngbanga ti i mveni.” Na azo kue akiri tene ala tene: “Ngbanga ti mene ti lo aga na li ti e na ti amolenge ti e.”

Tongaso, ti tene lo sala ye so be ti azo aye ahon ti sala ye ti mbilimbili so lo ye ti sala, Pilate ama yanga ti ala na lo zi Barabbas na ala. Lo mu Jésus, azi bongo ti lo na tele ti lo na ase lo. Ye oko, mara ti sengo so ase na lo ayeke nde na kode ti sengo zo so azo kue ahinga. Baa tongana nyen The Journal of the American Medical Association asala tene ti lege so azo ti Rome ase zo:

“A yeke chicotte ti ndulu (flagrum wala flagellum) ti akamba ti poro so asala na pete, wala na pete pepee. Na tele ti akamba ti chicotte so akanga ale ti wen wala andambo ti bio ti ngasangbaga so ayanga ni aza mingi. Apopo ti ale ti wen wala ti abio ayo lege-oko. (...) Tongana aturugu ti Rome ase peko ti zo fani mingi na ngangu ti ala kue, ale ti wen ni asala si peko ti zo ni asuku, amboko, wala andambo ti bio ni asuru peko ti zo ni na aka. Tongana sengo zo ni aninga, mi ti tele ti lo alingbi ti sigigi na ndo nde nde na mene mingi.”

Na peko ti pasi so, ague na Jésus na yangbo ti zo ti komande, na abungbi aturugu kue. Aturugu angba ti sala sana na Jésus, ala sala couronne ti ki na ala zia ni na li ti lo na ngangu. Ala zia pepe na maboko ti lo ti koli na ala yu na lo bongo ti bengba, mara ti bongo so agbia ayeke yu. Na ala he lo ala tene: “Balao, Gbia ti aJuif!” Ala ku soro na tele ti lo na ala pika lo na ngbangba ti lo. Ala kamata kpengba pepe so na maboko ti lo, ala pika li ti lo na ni, na ala sala si aki ti “couronne” ti mungo kamela so ali na ya poro ti li ti lo mingi ahon.

Nengo tele ti lo na gbungo ngangu ti lo na ya kota pono so asala si Pilate akiri agi lege ti so lo. Ni laa lo tene na azo so: “Baa! Mbi yeke gue na lo na gigi na gbele i, si i lingbi ti hinga so mbi wara tene ti ngbanga na li ti lo oko pepee.” Peut-être Pilate abaa so hungo pono so Jésus ahu ahon ndoni alingbi ti de be ti ala kete tongana ala baa lo. Tongana Jésus so ayu couronne ti ki na bongo ti bengba, na mene na le ti lo, aluti na gbele azo mingi so be ti ala ahule, Pilate atene: “Baa! Zo ni laa!”

Zo ni so tele ti lo amboko na so pono awoko lo, ayeke zo ti kota mingi ahon na ya ti mbai, biani koli so ahon tanga ti azo kue so abaa gigi na ndo ti sese! Nengo tele na dutingo kpo ti Jésus ayeke fa ti kota gloire so ataa Pilate alingbi ti hinga, teti so atene ti lo afa na gigi so lo yeke na mbito na mawa ti Jésus. Jean 18:39–19:5; Matthieu 27:15-17, 20-30; Marc 15:6-19; Luc 23:18-25.

▪ Na lege wa Pilate atara ti sala si azi Jésus?

▪ Tongana nyen Pilate atara ti zi tele ti lo na gbe ti kungba kue?

▪ Na la ni ka sengo zo atambela tongana nyen?

▪ Tongana ase Jésus awe, azo ahe lo tongana nyen?

▪ Nyen si Pilate atara ti sala nga ti zi Jésus?