Awango ndali ti Asurveillant ti Ekole

NA YÂ ti kongregation oko oko, a yeke zia mbeni ancien oko tongana surveillant ti Ekole ti Kusala ti aChrétien. Tongana a mû na mo kungba so, wâ so mo yeke na ni ndali ti ekole ni, nga bingo bê ti mo mveni na guengo na li ni ti élève oko oko, alingbi ti duti akota ye mingi na yâ ye so ekole ni ayeke sala na yâ kongregation ti mo.

Mbeni kota mbage ti kusala ti mo ayeke ti mû li ni na Ekole ti Kusala ti aChrétien ti yenga oko oko ti kongregation ti mo. Dabe mo so na tele ti a-élève so a mû na ala devoir na ekole ni, ambeni zo nde ayeke nga dä. Mû li ni na ekole ni na mbeni lege so asala si kongregation ni kue awara adango bê so ayeke pusu zo ti sala ye na so alingbi biani, ti lingbi kamême na mbeni oko ti aye so ekole ni azia na gbele lo. A sala tënë ti aye so na lembeti 5 ti si na 8 ti buku so.

Bi bê na a-élève ni kue, atâa ala yeke na devoir ti dikongo ye, ti sala ni tongana démonstration wala ti mû diskur na ekole ni. Mû maboko na ala ti bâ ye so ala yeke sala gi tongana senge devoir pëpe, me tongana lege so azi na ala ti gue na li ni na yâ kusala ti ala na Jéhovah. Biani, ngangu so ala mveni ayeke sala ayeke mbeni kota ye so ayeke sala si ala gue na li ni. Me a yeke nga kota ye ti tene mo bi bê na ala na nzobe, mo mû maboko na ala ti hinga nene ti awango ni, nga mo fa tongana nyen ti sala kusala na mara ti awango tongaso. Ti sala ye so, dengi mê nzoni na devoir oko oko si mo lingbi ti mû awango so ayeke na ngele mingi.

Sala kue ti to nda ti ekole ni na ti hunzi ni na ngoi ni. Zia nzoni tapande na mungo awango ti mo alingbi na ngoi ni so a mû. Tongana devoir ti mbeni élève ahon ngoi ni, a lingbi mo wala zo so amû maboko na mo asala maboko na lo. A lingbi élève ni ahunzi tanga ti tënë so angbâ na yanga ti lo na lo zia estrade ni lo hon. Tongana mbeni devoir nde ahon ngoi ni, tene atënë ti mo ndulu, na pekoni sala lisoro na ndo tënë ni na ita ni na peko ti bungbi.

Tongana mo yeke dä, a lingbi mo mû li ni na ekole ni. Tongana a si so mo lingbi pëpe ti duti dä, a lingbi mbeni ancien nde, so bungbi ti a-ancien asoro lo kozoni, abâ lege ti ekole ni. Tongana mo bâ so a lingbi a mû maboko na mo ti leke aprogramme ni, ti sû aye na ndo ambeti ti devoir na ti kangbi ni, wala ti leke si ambeni zo asala devoir na place ti ambeni zo na yâ ti programme ni, mbeni serviteur ti mungo maboko so bungbi ti a-ancien asoro lo alingbi peut-être ti mû maboko na mo na yâ aye so.

Mungo iri ti a-élève na ekole. Wa awafango tënë kue ti zia iri ti ala na ekole. Ambeni zo so abungbi na kongregation na ayeke mû mbage na ambeni ye na yâ ni alingbi ti zia iri ti ala tongana ala yeda na afango ye ti Bible, nga tongana fini ti ala ague oko na akpengba-ndia ti aChrétien. Tongana mbeni zo afa nzara ti lo ti zia iri ti lo na ekole, gonda lo na wâ. Tongana a yeke mbeni zo so ade ti ga wafango tënë pëpe, mo so mo yeke surveillant ti ekole, sala lisoro na lo na ndo aye so a hunda ti zia iri na ekole. A yeke nzoni ti sala ni na lê ti zo so ayeke manda Bible na lo (wala na lê ti babâ wala mama ti lo so ayeke Chrétien). Aye so a hunda so ayeke oko na ti so a hunda na mbeni zo ti ga wafango tënë so ade ti wara batême pëpe. A yeke wara ni na lembeti 79 ti si na 80 ti buku Bungbi so a leke ni ti sala ye so Jéhovah aye. Bata mbeni mbeti so a-iri ti a-élève kue nga na afini ni ayeke dä.

Salango kusala na mbeti ti awango. Mbeti ti awango ti élève oko oko ayeke na yâ ti buku ti lo mveni, na lembeti 79 ti si na 81. Tongana ti so anzoroko nde nde afa, a lingbi ti sala kusala na wango 1 ti si na 17 tongana élève ni ayeke na devoir ti dikongo ye. Teti adevoir so a sala tongana démonstration, a lingbi ti sala kusala na awango kue, me pëpe na wango 7, 52 na 53. Wango teti adiskur andu awango kue, me pëpe wango 7, 18 na 30.

Tongana a mû mbeni wango ti sala na kusala, a lingbi surveillant ti ekole abâ si a sû na crayon lango ni na gbe ti tënë “Lango so a mû ni” na place so a zia gi na tele ti wango ni na ndo mbeti ti awango na yâ buku ti élève ni. Na pekoni so élève ni ahunzi devoir ti lo awe, hunda gi na lo oko wala lo sala aye ti tara na tele so ayeke na hunzingo ti aye so a fa na ndo wango ni. Tongana lo sala ni, a lingbi a zia marque na yâ ti kete place so ayeke na ndo ti mbeti ni. Tongana mo hunda na lo ti kiri ti sala kusala na oko wango ni, a hunda pëpe ti zia ambeni tënë nde na ndo mbeti ti awango ni; sû ye oko pëpe na place so a zia senge na gbe ti tënë “Lango so a hunzi ni.” A lingbi a sû ye na yâ mbage so gi tongana élève ni alingbi awe ti gue na mbeni wango nde. Nga, na lembeti 82 ti buku ti élève ni, na mbage ti gati ti cadre so a sala na kusala, a lingbi a zia dä lango so a sala na devoir oko oko kue. Place ayeke dä na ndo mbeti ti awango nga na molongo ti acadre ti mû lege ti sala kusala na awango nga na acadre fani use. A lingbi a-élève aduti na buku ti ala na ngoi ti ekole ni.

Mû wango oko na oko. Ti bâ ni mbilimbili, a yeke nzoni mingi ti mû awango na lege ti molongo so ala ga na peko ti mba. Ye oko, tongana ambeni élève ayeke na akpengba kode, mo lingbi peut-être ti wa ala ti manda ala mveni ambeni ye ti manda ni na ti sala ye alingbi na ni. Na pekoni, mo lingbi ti mû maboko na ala na ndo awango so mo bâ so a yeke sala ye ande mingi ti tene ala maï ti ga awamungo diskur nga awafango tënë so ayeke lë lengo.

Atâa tongana mbeni élève azia iri ti lo na ekole ni teti angu mingi, lo lingbi ti wara ye ti nzoni mingi na mandango ye ti manda oko oko na ti sala ye alingbi na ni. Ti mû maboko na a-élève so bezoin ti ala ayeke nde mingi, mo lingbi peut-être ti soro ambeni kode ti salango tënë ndali ti ala ti sala kusala ahon ti mû na ala wango oko na oko na peko ti mba.

Mungo wango. Na mungo wango, sala kusala nzoni na atapande nga na akpengba-ndia ti Bible. A lingbi a-élève ni abâ so a yeke akpengba-ndia ti Tënë ti Nzapa so ayeke kota ye mingi si ayeke na gunda ti wango ni nga na ti lege so a mû na wango ni.

Girisa pëpe so mo yeke ‘zo so ayeke sala kua na tele’ ti aita ti mo ti koli na ti wali (2 aCor. 1:24). Legeoko tongana ala, a lingbi mo ngbâ lakue ti sala kue ti ga nzoni wamungo diskur nga nzoni wafango ye ahon ti kozo. Manda mo mveni buku Wara nzoni na lege ti Ekole ti Kusala ti aChrétien, sala ye alingbi na awango ni, nga zia mbeni nzoni tapande na azo ti sala oko tongaso.

Na ngoi so mo yeke sala ye so, zia na gbele mo ti mû maboko na a-élève ni ti ga anzoni wadikongo ye, awamungo diskur so alingbi nga anzoni wafango ye. Ti sala ye so, mû maboko na ala na yâ aye kue so ahunda, si awamandango ye ni ahinga nzoni ye so akode ti salango tënë nde nde ayeke, ngbanga ti nyen ala yeke kota ye nga tongana nyen ti maï ni. A leke buku so na mbeni lege so ayeke mû maboko na mo ti sala ye so. Ye oko, mingi ni, a hunda ye mingi na mbage ti mo ahon gi senge dikongo atënë ti buku ni. Sala tënë na ndo abibe so atënë ni afa na gigi nga tongana nyen ti sala ye alingbi na ni.

Tongana mbeni élève asala nzoni na ndo mbeni wango, gonda lo. Na ndulu tënë, tene ye so a sala si wango ni ayeke nzoni wala ngbanga ti nyen ye so ayeke kota ye. Tongana lo lingbi fade ti wara ye ti nzoni na bingo bê mingi na ndo mbeni mbilimbili tënë, sala si lo hinga ngbanga ti nyen. Fa tongana nyen ti si na ye so. Fa atënë ni polele, nga na oko ngoi ni sala ye na nzobe.

Hinga so, ti azo mingi, ti londo ti fa ye na gbele mbeni bungbi ti azo ayeke ngangu ye mingi. Tongana mbeni zo abâ so lo sala ye ni nzoni pëpe, lo lingbi peut-être ti hunda tele ti lo wala a lingbi lo ngbâ ti sala ngangu. Mû tapande ti Jésus, so afâ pëpe “[sosongo] so a suru awe” wala so amingo pëpe “mèche so kete wâ ayeke dä”. (Mat. 12:20). Bi bê na ndo ye so wango ti mo alingbi ti sala na ndo élève ni. Na ndembe so mo yeke mû wango, zia si mo gi ti hinga kozoni wala élève ni ayeke fini zo wala mbeni wafango tënë so aninga awe. Gondango ndo so a mû na wâ nga na bê kue alingbi ti kpengba azo ni ti ngbâ ti sala ngangu ti ala kue.

Sala ye na élève oko oko na nengo lo. A-Romain 12:10 (NW ) atene na e: “I mû li ni ti yekia tele ti i na popo ti i.” So tâ mbeni wango so alingbi ndali ti mbeni wamungo wango na Ekole ti Kusala ti aChrétien! Tongana ngu ti élève ni ahon ti mo, mû peko ti wango ti 1 Timothée 5:1, 2 nzoni. Ye oko, atâa ngu ti zo ni ayeke tongana nyen, tongana a mû na nzobe wango so andu gbiango aye na yâ salango ye ti lo, mingi ni a yeke ngangu pëpe ti yeda na ni hio.​—aProv. 25:11.

Tongana mo yeke mû wango, gboto lê ti élève ni na ndo ye so fango ye ni aye ti si dä. Ye so ayeke pëpe gi ti sala kue ti wara gonda ndali ti devoir ni na ti gue na mbeni wango nde. A yeke pëpe ti duti mbeni wamungo diskur nga mbeni wafango ye so azo ayeke gonda lo mingi (aProv. 25:27). Nzara ti bê ti e ayeke ti mû matabisi ti e ti salango tënë ti sepela na Jéhovah na ti mû maboko na ambeni zo ti hinga lo na ti ndoye lo. Fango ye so e yeke wara ayeke mû na e ye kue so e yeke na bezoin ni ti sala nzoni mingi kusala so a fa ni na Matthieu 24:14 nga na 28:19, 20. A lingbi ti hunda na aita-koli so awara batême awe, na so alingbi, ti bâ lege ti “kundu ti Nzapa” tongana awamungo diskur nga na awafango ye.​—1 Pi. 5:2, 3.

Wa a-élève ni ti diko wango ti buku ni so ala yeke sala na kusala ande gi na yâ ti alango kete na pekoni so a mû na ala devoir ni. Wa ala ti sala ye alingbi na ye so ala manda na yâ lekengo devoir ti ala na ekole ni, na yâ lisoro ti ala ti lâ oko oko, na yâ kiringo na tënë ti ala na abungbi nga na yâ fango tënë.

Mungo adevoir na a-élève. Mingi ni, a yeke nzoni a sala ye so kamême yenga ota kozoni. A lingbi a sala ngangu ti mû adevoir so kue na mbeti.

A lingbi a mû ambage so andu mungo wango na kongregation na a-ancien (a yeke nzoni ti mû ni na azo so ayeke sala ande ambage so nzoni) nga na aserviteur ti mungo maboko so ayeke anzoni wafango ye.

Ti hinga adevoir wa a lingbi a mû na aita-koli nga adevoir wa a lingbi a mû na aita-wali, mû peko ti awango so ayeke na yâ ti mbeti-kapa ti ekole ni. Tongana aita-koli ayeke mingi pëpe me aita-wali mingi si ayeke sala devoir ti a-élève, sala hange ti mû lege nzoni na aita-koli ti sala adevoir so angbâ pëpe gi na dikongo Bible.

Bâ dutingo ti zo oko oko na ngoi so mo yeke mû adevoir. Tongana mbeni ancien wala serviteur ti mungo maboko ayeke na mbage na Bungbi ti Kusala wala na oko yenga so lo yeke na kota diskur na yâ ti kongregation, a hunda biani ti mû na lo mbeni devoir na ekole? Ti mbeni ita-wali so oko ti akete molenge ti lo ayeke na devoir, so a lingbi peut-être lo mû maboko na lo, a lingbi a mû na lo mbeni devoir na oko lango ni? Ti mbeni maseka wala élève so ade ti wara batême pëpe, devoir ni alingbi na lo? Gi ti hinga wala devoir ni alingbi na wango so a mû na élève ni ti sala kua na ni.

Ti adevoir so a mû na aita-wali, mingi ni élève ni ayeke soro ande cadre ti lo mveni alingbi na awango so ayeke na lembeti 78 nga na 82. A lingbi a mû na lo mbeni zo so lo yeke sala lisoro na lo, me élève ni alingbi peut-être ti zia mbeni zo nde na ndo ni. Tongana élève ni ahunda ti sala kusala na mbeni zo so ayeke lingbi ande mbilimbili na mbeni cadre, a lingbi a bâ hundango ye ni na nene ni.

Ambeni klase nde. Tongana a-élève so ayeke na ekole ni ahon 50, peut-être mo yeke ye ande ti bâ wala a sala kusala na ambeni ndo nde ndali ti adevoir ti a-élève. A lingbi na bezoin ti kongregation ni, a lingbi ti leke ye so ndali ti adevoir kue ti a-élève wala gi ndali ti devoir ti ota na ti osio ni.

A yeke nzoni oko oko ti aklase so aduti na mbeni wamungo wango so alingbi, mbilimbili mbeni ancien. Na ndo so a hunda tongaso, kusala so alingbi ti duti teti mbeni serviteur ti mungo maboko so ayeke na kode biani. A lingbi bungbi ti a-ancien ayeda na awamungo wango so. Sala kusala maboko na maboko na ala, si a lingbi ti hinga nzoni awango so a-élève ayeke sala kusala na ni ande, atâa ala yeke sala ande devoir ni na klase wa.

Klase ti dikongo mbeti so ayeke nde. Tongana bungbi ti a-ancien abâ so ambeni zo na yâ ti kongregation ni ayeke na bezoin ti tene a fa ye na ala na ndo akozo kode ti dikongo mbeti na yanga ti kodoro so a yeke tene na yâ ti kongregation ni, mo lingbi ti leke aye na lege ti Ekole ti Kusala ti aChrétien. Fango ye so alingbi ti ndu akozo kode ti mandango mbeti, wala ye so a yeke gi ayeke ti tene azo ni adiko mbeti nzoni ahon ti kozo.

A hunda pëpe ti tene a leke aklase so na oko ngoi so a yeke sala devoir ti a-élève na Ekole ti Kusala ti aChrétien. Ti mû maboko alingbi na ni, a yeke hunda peut-être ngoi mingi ahon so a lingbi ti sala na ngoi ti ekole ni. A-ancien ti kongregation ni alingbi ti gi ti hinga bezoin ni nga ngoi ti fa ye tongaso na azo. Tongana bezoin ni ayeke dä, a lingbi ti leke ye ti tene a fa ye na bungbi ti azo wala gi na zo oko oko.

A hunda mbeni wafango ye so alingbi. A yeke nzoni a mû kungba ni na mbeni ita-koli so ayeke nzoni wadikongo ye na so ahinga yanga ti kodoro ni nzoni. Tongana mbeni ita-koli ayeke dä pëpe, a-ancien alingbi ti hunda na mbeni ita-wali so alingbi, na so ayeke na nzoni tapande, ti mû maboko. A lingbi lo kanga mbeni ye na li ti lo na ngoi so lo yeke fa ye na klase ni.​—1 aCor. 11:3-10; 1 Tim. 2:11, 12.

A leke awe brochure I Sala Ngangu Kue ti Diko na ti Sû Mbeti na ayanga ti kodoro mingi. A leke ni ti fa akozo kode ti mandango mbeti. Lege ayeke dä ti sala kusala na ambeni mbeti nde ti fango na ye, a lingbi na ngangu ti dikongo mbeti ti a-élève ni. Tongana a-élève ni ague na li ni alingbi na ni, a yeke nzoni ti wa ala ti mû mbage na tâ programme ti Ekole ti Kusala ti aChrétien.

Mo so mo yeke surveillant ti Ekole ti Kusala ti aChrétien, mo lingbi ti sala ye mingi ti ga na ye ti nzoni na kongregation. Leke tele nzoni. Nga, a lingbi na wango so ayeke na aRomain 12:6-8, yô kungba ti mo tongana mbeni ye ti ngele ngangu so Nzapa amû na mo.