Atënë So Azo Ahunda

Na ngoi so David asû atënë so ayeke na Psaume 61:8, so lo tene lo yeke he bia ti sepela iri ti Nzapa “lakue lakue,” eskê lo pensé lani so lo yeke kui lâ oko ape?

Ên-ën. Tënë so David atene ayeke lani tâ tënë.

Gbu li na ndö ti tënë so lo tene na yâ ti versê so nga na yâ ti ambeni versê so ague oko na ni, lo tene: “Mbi yeke he bia ti sepela iri ti mo lakue lakue, na ngoi so, lâ oko oko, mbi yeke sara ye alingbi na azendo so mbi mû.” “Jéhovah, Nzapa ti mbi, mbi sepela mo na bê ti mbi kue nga mbi yeke gonda iri ti mo lakue lakue.” “Mbi yeke sepela iri ti mo lakue lakue nga kpu na kpu.”—Ps. 61:8; 86:12; 145:1, 2.

Na ngoi so David asû atënë so, lo pensé lani ape so lo yeke kui lâ oko ape. Lo hinga lani so Jéhovah atene so azo ayeke kui ndali ti so ala sara siokpari, David ahinga nga so lo yeke mbeni zo so siokpari ayeke na terê ti lo (Gen. 3:3, 17-19; Ps. 51:4, 5). Lo hinga lani so même azo so ayeke be-ta-zo, na tapande, Abraham, Isaac nga na Jacob, akui. David ahinga nga lani so lo nga kue lo yeke kui (Ps. 37:25; 39:4). Me atënë ti lo so ayeke na Psaume 61:8 afa nzara so lo yeke na ni ti sepela Nzapa lakue lakue, so ti tene, na ngoi kue so lo yeke na fini, na a yeke ye so lo leke na bê ti lo ti sara.—2 Sam. 7:12.

Na ambeni ngoi, David asû tënë na ndö ti aye so asi na lo, tongana ti so a fa ni na yâ ti kete li ti tënë ti Psaume 18, 51 nga na 52. Na Psaume 23, David afa so Jéhovah ayeke tongana mbeni berger so ayeke fa lege na zo, so ayeke dë bê ti zo nga so ayeke bata zo. David ayeke lani mara ti berger so. Lo ye nga lani ti sara na Nzapa ‘na yâ ti gigi ti lo kue’.—Ps. 23:6.

Girisa nga ape so Jéhovah la afa na David ti sû aye kue so lo sû ni. Na popo ti aye so lo sû lani a yeke wara aprophétie so ayeke ga tâ tënë angoi mingi na pekoni. Na tapande, na Psaume 110 David asara tënë ti mbeni ngoi so Seigneur ti lo ayeke “duti na mbage ti maboko ti [Nzapa] ti koli” nga lo yeke wara kota ngangu. Ti sara nyen? Ti sö benda na ndö ti awato ti Nzapa nga ti “sara ye alingbi na ngbanga so lo fâ na li ti amara” na ndö ti sese. David ayeke lani mbeni kotara ti Jésus so ayeke Messie so ayeke duti “prêtre kpu na kpu”. (Ps. 110:1-6). Jésus atene lani so prophétie so ayeke na Psaume 110 abâ lo nga ayeke ga tâ tënë na yâ ti angoi so ayeke ga.—Mat. 22:41-45.

Biani, Jéhovah afa na David ti sû tënë na ndö ti ngoi ti lo nga na ndö ti mbeni ngoi so ayeke ga so a yeke zingo ande lo na kuâ nga so lo peut ti sepela Jéhovah lakue lakue. Ye so a-aidé e ti bâ so Psaume 37:10, 11, 29 aye ti sara tënë ti aye so asi na ngoi ti azo ti Israël nga na aye so ayeke si na yâ ti dunia kue na yâ ti ngoi so ayeke ga, na ngoi so Nzapa ayeke sara ye alingbi na azendo ti lo.—Bâ paragraphe 8 ti article “Mo yeke duti ande na mbi na Paradis” na yâ ti Tour ti Ba Ndo so.

Tongaso Psaume 61:8, nga na aversê so ague oko na ni, afa so David aye lani ti mû gloire na Jéhovah na ngoi ti azo ti Israël ti giriri juska lo kui. A fa nga ye so David ayeke wara ande lege ti sara na yâ ti angoi so ayeke ga tongana Jéhovah akiri na lo na fini.