Yaaqoobi Sokka

1 Maganunna Yesuusi Kiristoosi borojjichi Yaaqoobi, addi addi basera billaallite noote tonaalamente gaꞌrera:

Keeriꞌya iilloꞌne!

2 Roduuwaꞌya, addi addi fonqoli iillannoꞌne woyite lowo geeshsha hagiirsiisannori gede assitine kiirre; 3 hatto assitiniro, fonqolante saꞌino ammanaꞌne cincitine kaajjitinanni gede assitannoꞌneta affinoonni. 4 Ikkollana duuchunku raginni mitturino xeinoꞌnekkire, guutanna minshe nooꞌnekkire ikkitinanni gede cinca* loosose umo fushshito.

5 Konnira kiꞌne mereero hayyo ajjinosihu heeꞌriro, Magano marro marro hige huucciꞌro; korkaatuno Maganu ayeno mishikkinni* baalunkura shaqqillunni aanno; isirano uyinannisi. 6 Ikkollana mittoreno huluullamikkinni woꞌmanka woyite ammanatenni huucciꞌro; korkaatuno huluullamanno manchi bubbe xiibbannohunna shaffannohu baaru dambali gedeeti. 7 Isinni hattoo manchi Yihowawiinni* mittoreno afiꞌreemmo yee agadha dihasiissannosi; 8 togoo manchi lame hedonni kawa kaꞌa higannohonna doogosi baalantenni kaajjannokkiho.

9 Ikkollana woffi yiino rodii gotti assinoonnisi daafira hagiidho;* 10 qoleno dureessu heeshshi yaasinni hagiidhona; korkaatuno dureessu manchi dubbu daraaro gede giggilanno. 11 Arrishsho giiranno iibbillisenni fulte muꞌro qoorsitanno; daraarono giggiltanno; biinfilliseno baꞌꞌanno; dureessu manchino hattonni loosisira uffi qocci yaanni sunu sununni baꞌꞌanno.

12 Fonqolo cince kaajje heeꞌranno manchi hagiirraamoho; korkaatuno isi Maganu albaanni ayirrinye afiꞌranno yannara, Yihowa woꞌmanka woyite baxxannosirira qaale einota heeshshote baꞌlatto adhanno. 13 Aye manchino jifamanno woyite, “Maganu jifanni nooe” yoonke. Korkaatuno Maganu bushu coyinni jifamara didandaanno; isi umisino ayeno bushu coyinni dijifanno. 14 Ikkollana mittu mittunku manchi umisi yortonni goshooshamanninna dogamanni* jifamanno. 15 Hakkiinni yorto godobbuhu gedensaanni cubbo iltanno; cubbu qole loonsiro reyo abbanno.

16 Baxantinoonni roduuwaꞌya, sodhinoonte. 17 Dancha eltonna guutu baꞌraarshi baalu iiminniiti; dirrannohuno gordu xawaabbi Anniwiinniiti; isi bayichunni bayicho saꞌꞌanno caali gede disoorramanno. 18 Fajjosi ikkino daafira kalaqamisi giddonni umi laalchi gede ikkinammora halaalu qaalinni ilinonke.

19 Baxantinoonni roduuwaꞌya, tenne affe: Mittu mittunku manchi macciishshate rahinoha, coyiꞌrate muddamannokkihanna hanqoho muddamannokkiha ikka hasiissannosi; 20 korkaatuno mannu hanqi Maganu keeraanchimma diabbanno. 21 Hakko daafira batte ikkinore baalanna bunshe baala* huntine, gatisaꞌnera* dandaannoha giddoꞌne kaasamanno qaale joongillunni adhe.

22 Ikkollana qaale wonshitinannire ikke ikkinnina kaphu korkaata kultine umoꞌne dogginanni macciishshitinannire calla ikkitinoonte. 23 Aye manchino qaale macciishshannoha ikkinnina wonshannokkiha ikkiro, kuni manchi albasi hincilaallotenni layiꞌranno manchi gedeeti. 24 Kuni manchi isonooto layiꞌre kae agure haꞌranno; hakkawoyintenni danisi hiittoohoro hawanno. 25 Ikkollana keere fushshannoha guuta seera hixamanye laꞌꞌannohunna isinni kaajje heeꞌranno manchi, macciishshe kae hawannoha ikkikkinni loosu aana hosiisannoho; assannorinnino hagiirraamo ikkanno.

26 Aye manchino Magano magansiꞌranni noommo yee hedirono,* arrawosi kayinni eemadhannokkiha* ikkiro wodanasi doganni no; magansiꞌrasino beebbate. 27 Maganinkenna Anninke albaanni xuru nookkitinna battaabbinokki magansiꞌra,* annanna ama shiidhinorenna gunnoota qarrantanno woyite towaatatenna alamete xuriwiinni meessaneeto agadhate.