Yihowa Cincitine Agadhitinanni Woyite Hagiirraamma Ikke
YIHOWA bunshe baala hunannotanna baalanka coye haaro assanno yanna quqquxantine agadhitinanni? (Aju. 21:1-5) Agadhitinanniti dihuluullissannote! Ikkirono roorenka qarru amadannonke woyite Yihowa cincine agadha qarra ikkitankera dandiitanno. Woꞌmitukkinni keeshshitanno hexxo wodana daafursitara dandiitanno.—Law. 13:12.
Ikkirono Yihowa isi hirqino yanna iillita geeshsha cincine agadhinammora hasiꞌranno. Isi cincine agadhinammora hasiꞌrannohu mayiraati? Cincine agadhineemmo woyite hagiirraamma ikkineemmo gede kaaꞌlannonkeri maati?
YIHOWA CINCINE AGADHINAMMORA HASIꞌRANNOHU MAYIRAATI?
Qullaawu Maxaafi togo yaanno: “Kaaliiqi maaraꞌnera qixxaawe [“cince agadhe” NW] no. Kaaliiqi taashshanno Magano ikkino daafira, mararinoꞌne; kunnira Kaaliiqa hexxitannori baꞌraadhinoreeti.” (Isa. 30:18) Isayyaasi tenne hedo borreessinohu haxawarrootu Ayihudete manniraati. (Isa. 30:1) Ikkirono Ayihudete manni giddo mitu ammanaminoho; tini hedo insara hexxo heedhannonsa gede assitannote. Tini hedo xaa yannara noote ammanantinote Yihowa soqqamaanorano hexxo heedhannonsa gede assitannote.
Yihowa cince agadhe noo daafira ninkeno cincine agadha hasiissannonke. Isi tenne busha alame hunanno yanna hirqe no; qoleno hakku barrinna saate iillita geeshsha cince agadhe no. (Mat. 24:36) Hatte yannara Sheexaanu Yihowanna iso magansidhannore kassasino kisse kapho ikkase xabbe leeltanno. Hakkiinni Yihowa Sheexaanenna isi wido ikkitinore baala hunanno; ‘ninke kayinni maarannonke.’
Hatti yanna iillita geeshsha kayinni Yihowa iillannonke qarra dihoolanno; ikkirono kayinni cincine agadhineemmo woyite hagiirraamma ikka dandiineemmota buuxisinonke. Isayyaasi coyiꞌrinonte gede albillitte ikkannoha dancha coye agadhineemmo woyite woy hexxineemmo woyite hagiirraamma ikka dandiineemmo. (Isa. 30:18)a Hagiirraamma ikka dandiineemmohu hiittoonniiti? Hanni tennera kaaꞌlannonkeha shoole coye laꞌno.
CINCINE AGADHINEEMMO WOYITE HAGIIRRAAMMA IKKA DANDIINEEMMO GARA
Dancha danchare hedde. Moote Daawiti heeshshosi diro woꞌma lowo bunshe laino. (Far. 37:35) Ikkirono isi togo yee borreessino: “Cincite Kaaliiqi assannore agadhi; wolootu durooꞌmituro, bunshe assitannorira qiniinsaro giirantooti.” (Far. 37:7) Daawiti umisi Yihowa gatisannosita kule uyinosi hexxo illachishe tenne amaale loosu aana hosiisino. Qoleno isi Yihowa uyinosi atooti baalaho galatu noosita leellishino. (Far. 40:5) Ninkeno qooxeessinkera ikkannoha gara ikkino coye laꞌne giirama agurre dancha danchare hendeemmoha ikkiro cincine Yihowa agadha shota ikkitannonke.
Yihowa guwisiꞌrate afidhini faro baala horoonsidhe. Faarso 71 borreessinohu Daawiti ikkikki digatino; isi togo yiino: “Ani kayinni woꞌmanka woyite hexxeemmohe [“cince agadheemmo,” NW]; lede lede galaxxeemmohe.” (Far. 71:14) Isi Yihowa galaxxinohu hiittoonniiti? Isi wolootaho Yihowa daafira kulino hattono iso faarsotenni guwisiꞌrino. (Far. 71:16, 23) Daawiti gede ninkeno Yihowa cincine agadhineemmo woyite hagiirraamma ikka dandiineemmo. Soqqanshonkenni, barru baala hasaambeemmo hasaawinninna faarsotenni iso guwisiꞌra dandiineemmo. Aantanno yannara faarso faarsatto woyite jawaachishannoha faarsote gixima woy kiiro illachisha dandaatto?
Ammanate roduuwiꞌnewiinni jawaante afiꞌra dandiitinanni. Daawitira qarru iillisi yannara Yihowa, “Suꞌmikki danchumma mannikki xaadinowa lallaweemmo [“suꞌmakki hexxeemmo” NW]” yiino. (Far. 52:9) Ninkeno gambooshshunniwanna soqqansho fulleemmo woyite calla ikkikkinni ammanate roduuwinke ledo yanna sayinseemmo woyiteno jawaante afiꞌra dandiineemmo.—Rom. 1:11, 12.
Hexxoꞌne kaajjishidhe. Faarso 62:5 “Hexxeemmohu isootina, lubboꞌya, ati sammi yite Magano calla agadhi” yitanno. Roorenkanni tini busha alame baꞌanno yanna ninke hendoommohunni saꞌe keeshshitanno woyite kaajjado hexxo hasiissannonke. Cincine agadhineemmo yanna ikkitu geeshshitano ikkituro Yihowa eino qaali woꞌmannota addaxxa hasiissannonke. Qullaawa Maxaafa xiinxalline lawishshaho masaalo, Qullaawu Maxaafi isi isiniiwa sumuu yaanno garanna Yihowa umisi daafira kulinonkeha mitto mittonka coye xiinxalline hexxonke kaajjishiꞌra dandiineemmo. (Far. 1:2, 3) Qoleno Yihowa hegere heeshsho aankera eino qaali woꞌmanno yanna cincine agadhineemmo woyite Yihowa ledo noonkehu danchu jaaloomi baꞌꞌannokki gede woꞌmanka woyite ‘Qullaawu Ayyaaninni huucciꞌra’ hasiissannonke.—Yih. 20, 21.
Moote Daawiti gede Yihowa Iso cincite agadhitannore laꞌꞌannotanna bagamannokki baxillesi leellishannonsata addaxxe. (Far. 33:18, 22) Dancha danchare heddine, Yihowa guwisidhine, ammanate roduuwiꞌnewiinni jawaante afidhinenna muxxe ikkitino hexxoꞌne kaajjishidhine woꞌmanka woyite Yihowa cincitine agadhe.
a “Agadha” yine tirroonniha hundi afii qaale “mittu coyi ikkanno yanna quqquxamme agadha woy hexxa” yineno tiro dandiinanni; tini, gatonke quqquxamme agadha soꞌro afidhinokkita leellishanno.