Aganunnite Umi Qidaamera Qullaawu Maxaafi Xiinxallo Jammarsiisate Illachishshe
Onkoleessa 2011nni jammarre, halashshaano aganunnite umi Qidaamera Qullaawu Maxaafi xiinxallo jammarsiisate woꞌnaaltanno gede kulloonni. Tenne assate kaaꞌlannonke gede, “Qullaawu Maxaafi Xaꞌmonna Dawaro” yaanno birxichi mannaho ellannite Agarooshshu Shaera ganye fulanno gede assinoonni. Konni daafira, aganunnite umi Qidaamera heeꞌrannohu simirriitete gambooshshira, Qullaawu Maxaafi xiinxallo jammarsiisate konne birxicho horoonsiꞌnanni gara shiqishanna loonse leellinshanni ikkito shiqqanno gede assa hasiissanno.
Cimeeyye mitte mittenti simirriitete gaamo umi Qidaamera addi addinni gamba yitanno gede woy baalanti gaamo Mangistete Addaraashera mitteenni gamba yitanno gede wossana dandiitanno. Ikkollana, mitte Mangistete Addaraashe duucha songuwa horoonsidhannoha ikkiro, songuwa simirriitete gaamo baalanti mitteenni gamba yitara yite Qullaawu Maxaafi xiinxallo jammarsiinseemmoha konne baxxino barra soorra dihasiissannonsa.