Magansiꞌrate Mitteenni Gamba Yaa Hasiissannonkehu Mayiraati?

1-3. (a) Kiristaanu, mitteenni gamba yaa baxannota leellishinohu hiittoonniiti? (Hanafote noo misile lai.) (b) Konni birxichira maa ronseemmo?

KORIINA 17 diriti heedheenna amase Sooviyetete daafursanno looso loonsanni kaampe eessinoonni. Gedensaanni, Koriinano heedhannowiinni lowo geeshsha xeertiꞌrannowa yaano Sayibeeriya haaꞌne haꞌnoonni; mito wote borojjichu gede assine qorru qiidi giddo gari uddano uddidhukkinni gibirinnu looso loossanno gede giddeessinannise. Koriinanna mitte wole rodoo togoo qarri iillinonsaha ikkirono songote gambooshshe haꞌrate murciꞌrino.

² Koriina togo yitino: “Hawarro loonseemmowiinni fullummo gedensaanni 25 km xeertiꞌre noowa baabura giddinanniwa lekkatenni haꞌneemmo. Baaburu kainohu soodo lame saatenniiti; hakkiinnino baaburunni lee saate woꞌma haꞌnummohu gedensaanni gambooshshu bayicho iillate 10 km lekkatenni haꞌnoommo.” Tini kaaꞌlitinonsari nooyya? Koriina togo yitino: “Gambooshshunniwa Agarooshshu Shae xiinxallinoommo hattono Mangistete faarso faarsinoommo. Hakku gambooshshi kiꞌꞌinonke hattono ammananke jawaachishino.” Insa sasu barri geeshsha loosu base marinokkiha ikkirono loosiisannonsahu Koriinanna ledose noo rodoo loosoho dayinokkita nafa dihuwatino.

³ Yihowa manni mitteenni gamba yaanno yanna aye woteno kaffi asse laꞌꞌanno. Kiristaanu songo kalaqantuhunni shiima yanna gedensaanni, Yesuusi harunsaano ‘mitteenni gamba yaate hixamanyitino.’ (Looso 2:42) Atino insa gede songote gambooshshe ganyite haꞌra hasiꞌrattoti egennantinote. Ikkollana, baalu Kiristaanira guficho ikkannori dihooganno. Loosu, dilgo batidheennanke woy daafursannonkehura gambooshshe haꞌra shota ikka hooggankera dandiitanno. Konne baala guficho qeelle saꞌne gambooshshe ganyine haꞌneemmo gede kakkaayisannonkeri maati?^[1] Qullaawu Maxaafi xiinxallonkenna wole manna gambooshshe haꞌra kaaꞌlitannore huwatanno gede kaaꞌla dandiineemmohu hiittoonniiti? Konni birxichira, magansiꞌrate gamba yaa hasiissannonkeha sette korkaata ronseemmo. Konne korkaata sasewa gaamme laꞌneemmo; insano, gambooshshe haꞌra ninkera kaaꞌlitanno gara, wolu mannira kaaꞌlitanno garanna Yihowa hagiirsiissanno garaati.^[2]

GAMBOOSHSHE HAꞌRAKKI ATERA KAAꞌLANNOHE GARA

4. Mitteenni gamba yaanke Yihoware rosate kaaꞌlitannonkehu hiittoonniiti?

⁴ Gambooshshunniwa roso ronseemmo. Baalunku songote gambooshshi Maganu Yihowa daafira ronseemmo gede kaaꞌlannonke. Lawishshaho, Songonnite Qullaawu Maxaafi Xiinxallora “Maganu Baxillinni Fultinikki Heedhe” yaanno maxaafi giddo Maganu akatta xiinxallakkinna roduuwu coyidhannoti jawaachishshanno hedo iimi Annikkira noohe baxilli lexxanno gede diassitinohe? Songote gambooshshiwa shiqqanno lallawo, loonse leellinshanni ikkitonna Qullaawu Maxaafi niwaawe aana illachishakki Maganu Qaale roore afatto gede assitannohe. (Neh. 8:8) Lawishshaho, hanni lamalate kiiro Qullaawu Maxaafi niwaawe luphi assate qixxaawatto wotenna wolu roduuwi luphi assanna macciishshatto wote afiꞌrattota ayyaanaamittete jiro hedi!

5. Gambooshshu Qullaawu Maxaafinni rosoottore horoonsiꞌratto gedenna sabbakatto gara woyyeessiꞌrate kaaꞌlinohehu hiittoonniiti?

⁵ Gambooshshunniwa heeshshonke baalantenni Qullaawu Maxaafita xintu seerubba harunsa dandiineemmo gara ronseemmo. (1 Tes. 4:9, 10) Lawishshaho, Agarooshshu Shae xiinxallo Maganu mannira hasiisannore hende qixxeessinanni. Agarooshshu Shae xiinxallo, fushshiꞌrootto mixo galagalte layiꞌratto gede, ayyaanaamittete roduuwikkira gatona yaattonna huucciꞌratto gara woyyeessiꞌratto gede kaaꞌlitinohe? Kiristaanu Heeshshonna Soqqansho Gambooshshiwa soqqanshote daafira ronseemmo. Konni gambooshshiwa dancha duduwo duduwa dandiineemmo garanna Qullaawa Borrota xintu seerubba danchu garinni rosiisa dandiineemmo gara ronseemmo.—Mat. 28:19, 20.

6. Gambooshshu jawaachishannonkehunna kaajjishannonkehu hiittoonniiti?

⁶ Gambooshshu jawaachishannonke. Tini alame ammananke shoshshoggishatenna hexxo mudhineemmo gede assate woꞌnaaltanno. Songote gambooshshi kayinni, jawaachishannonke hattono kaajjishannonke. (Hawaariyaatete Looso 15:30-32 nabbawi.^[3]) Duucha wote gambooshshunniwa Qullaawu Maxaafi masaalo woꞌmitino gara ronseemmo. Tini, Yihowa albillittete yanna daafira eino qaaleno wonshannota huluullammeemmokki gede assitannonke. Jawaachishannonkehu madirakete heeꞌre rosiisanno rodoo calla diꞌꞌikkino. Dawaro qoltannonna giddonsanni faarsitanno roduuwinkeno jawaachishshannonke. (1 Qor. 14:26) Gambooshshu hanafara albaanninna goofihu gedensaanni roduuwu ledo hasaambeemmo wote baxxannonke jaalla afiꞌnoommohura tashshi yaannonke.—1 Qor. 16:17, 18.

7. Gambooshshe haꞌra lowo geeshsha hasiissannohu mayiraati?

⁷ Gambooshshunniwa qullaawu ayyaani kaaꞌlo afiꞌneemmo. Lowo ayirrinye afiꞌrinohu Yesuusi Kiristoosi “ayyaanu songuwate coyiꞌrannore macca noosihu macciishsho” yiino. (Aju. 2:7) Ee, Yesuusi qullaawu ayyaaninni Kiristaanu songo massaganno. Fonqolo dandee saꞌꞌate, soqqanshote kaaꞌlitanno jawaantenna qajeelsha afiꞌrate hattono dancha doorsha doodhate qullaawu ayyaani hasiisannonke. Songote gambooshsheno ikko wole konne ayyaana afiꞌrate kaaꞌlitanno qixxaawo giddo mitteno gatte baꞌꞌannonkekki gede sharrama dihasiissannonke?

GAMBOOSHSHE HAꞌRANKE WOLU MANNIRA KAAꞌLITANNO GARA

8. Roduuwinke gambooshshunniwa ninke ledo xaadansa, hattono dawaro qollannanna faarsinanna macciishshansa kaaꞌlitannonsahu hiittoonniiti? (“Duuchanka Wote Hagiidhe Higanno” yitanno saaxine lai.)

⁸ Gambooshshu roduuwanke banxeemmota leellinsheemmo faro fanannonke. Hanni songoꞌnera noo roduuwi cince noo qarra hedi. Hawaariya Phaawuloosi “mimmito towaaxxino” yaasi garankolla! Phaawuloosi aanche roduuwanke towaaxxineemmota leellinsheemmohu, ‘mitteenni gamba yaa lashshi assa’ hoogatenni ikkinota xawisino. (Ibi. 10:24, 25) Gambooshshe haꞌrakki roduuwikki ledo yanna sayisa hasiissannoheta huwatoottotanna insara hedattota leellishshanno. Qoleno gambooshshunniwa dawaro qolattonna faarsatto yannara roduuwakki jawaachishatto.—Qol. 3:16.

9, 10. (a) Yesuusi Yohaannisi 10:16 aana coyiꞌrinori, roduuwinke ledo gamba yaa hasiissannota huwanteemmo gede kaaꞌlannonkehu hiittoonniitiro xawisi. (b) Gambooshshe ganyine haꞌneemmoha ikkiro maatensa gibbinonsa roduuwa kaaꞌlineemmohu hiittoonniiti?

⁹ Gambooshshu roduuwinke ledo mittimma heedhannonke gede assanno. (Yohaannisi 10:16 nabbawi.^[4]) Yesuusi umosi allaalaanchu gedenna harunsaanosi kayinni geꞌreewu hoshsha gede asse xawisino. Hanni konne lawishsha hedi: Lame geꞌrecho ilaalu aana, lame kayinni xeichoho heeꞌriro hattono mitte geꞌrecho wolewa hayisso xinqidhanni heedhuro ontenta geꞌrecho hoshshate yinanni? Duucha wote geꞌreewu hoshsha mitteenni allaalaanchonsa harunsitanno. Ninkeno roduuwinkewa gambo gimbeemmoha ikkiro Allaalaanchonke harunsa didandiineemmo. “Mitte hoshsha” wido ikkatenna ‘mittu allaalaanchi’ hunda heeꞌrate roduuwinke ledo mitteenni gamba yaa hasiissannonke.

¹⁰ Gambooshshe haꞌneemmoha ikkiro roduuwu maamari mittimmara kaaꞌlineemmo. (Far. 133:1) Mito roduuwanke anninsanna amansa hattono roduuwinsa giwannonsa. Ikkirono Yesuusi, baxxannonsatanna insara heddannota ayyaanaamittete maate aansara qaale eino. (Marq. 10:29, 30) Gambooshshe ganyine haꞌneemmoha ikkiro, kuri muxxe roduuwira anna, ama woy rodoo ikka dandiineemmo. Tini gambooshshe ganyine haꞌrate dandiinummore baala assineemmo gede kakkaayissannonketa diꞌꞌikkitino?

GAMBOOSHSHE HAꞌRANKE YIHOWA HAGIIRSIISSANNO GARA

11. Gambooshshe haꞌranke Yihowara aa hasiissannonkere aate kaaꞌlitannonkehu hiittoonniiti?

¹¹ Gambooshshe haꞌranke Yihowara aa hasiissannonkere aate kaaꞌlitannonke. Yihowa Kalaqaanchonke ikkinohura guweenyu, galatunna ayirrinyu hasiisannosi. (Ajuuja 7:12 nabbawi.^[5]) Gambooshshunniwa huucciꞌneemmo wote, faarsineemmonna Yihoware coyiꞌneemmo wote iso magansiꞌnanni heeꞌnoommo; kuni isira aa hasiissannonkereeti. Lowore assinonke Magano guwisiꞌrate qoossonke ajinshe laꞌꞌa dihasiissannonke.

12. Yihowa hajajora hajajamme gambooshshe haꞌneemmo yannara isira mayi macciishshamannosi?

¹² Yihowara hajajamano hasiisannonke. Isi mitteenni gamba yaa lashshi assineemmokki gede hajajinonke; tini hakko iso konni goofimarchu dirira hasiissannote. Tenne hajajora hajajammeemmoha ikkiro isi hagiidhanno. (1 Yoh. 3:22) Yihowa gambooshshe haꞌrate yine sharrammeemmo sharro dihawanno hattono tenne kaffi asse laꞌꞌanno.—Ibi. 6:10.

13, 14. Gambooshshe haꞌranke Yihowawanna Yesuusiwa shinqeemmo gede assitannonkehu hiittoonniiti?

¹³ Gambooshshe haꞌranke Yihowara, isiwanna Beettisiwa shiqa hasiꞌneemmota leellishshanno. Gambooshshinkewa Bayiru Rosiisaanchinke Qaalisi Qullaawu Maxaafi widoonni biddishsha aannonke. (Isa. 30:20, 21) Gambooshshe daannohu Yihowa Farciꞌraasine ikkinokki manni nafa “addinta Maganu kiꞌne mereero no” yaate geeshsha iillino. (1 Qor. 14:23-25) Yihowa ayyaanasi oye gambooshshe maassiꞌranno, hattono Qullaawa Borro aana xintamino roso rosiisannonke. Hakko daafira, gambooshshunniwa Yihowa huuro macciishshineemmo, qoleno baxillunni towaatannonke gara wodanchineemmo. Tini isiwa shinqeemmo gede kaaꞌlitannonke.

¹⁴ Yesuusi togo yiino: “Suꞌmiꞌyanni lamu woy sasu gamba yitinowa ani mereeronsa heeꞌreemmo.” (Mat. 18:20) Kuni Qullaawu Maxaafihu xintu seeri gambooshshehono loosanno. Songote umo ikkinohu Kiristoosi Maganu manni songo mereero “millisanno.” (Aju. 1:20–2:1) Ee, Yihowanna Yesuusi Kiristaanu gambooshshinke yannara ledonke heedhanno, hattono jaawaachishshannonke. Yihowa isiwanna Beettisiwa shiqate hasiꞌneemmo gara laꞌꞌanno wote mayi macciishshamannosiha lawannohe?

15. Gambooshshe haꞌneemmoha ikkiro Maganoho hajajammeemmota leellinsheemmohu hiittoonniiti?

¹⁵ Gambooshshe haꞌranke Maganu aliidimma irkinseemmota leellishshanno. Yihowa gambooshshe haꞌneemmo gede hajajinonkeha ikkirono tenne assineemmo gede digiddeessannonke. (Isa. 43:23) Konnira Yihowa wodaninkenni banxeemmotanna isi hasiꞌrire hajaja dandaannota ammanneemmota leellisha ninke faantaati. (Rom. 6:17) Lawishshaho loosiisannonkehu ganyine gambooshshe haꞌra agurre looso loonseemmo gede xixxiiwannonkeha ikkara dandaanno. Mangiste gamba yaa agura hoongummoro woxunni qorichishannonketa, usurtannonketa woy hakkiinni sainore assitannota kulte waajjishiishshannonkeha ikkara dandaanno. Woy gambooshshe honse boohaarshaho haꞌra hasiꞌneemmoha ikkara dandaanno. Togoori iillannonke yannara ayera soqqammeemmoro doodha hasiissannonke. (Looso 5:29) Yihowa aliidimma irkisa doodhinummoro isi lowo geeshsha hagiidhanno.—Law. 27:11.

MITTEENNI GAMBA YAATE HIXAMANYA AGURTINOONTE

16, 17. (a) Umi xibbi diro heeꞌrino Kiristaani gambooshshe kaffi asse laꞌꞌannota mayinni anfeemmo? (b) Roduu Jiyorji Gangaasira Kiristaanu gambooshshi daafira mayi macciishshaminosi?

¹⁶ Hunda heeꞌrino Kiristaani maalale ikkannori woꞌmi wote yaano 33 M.D. Phenxeqosxete barra calla gamba yee diagurino. Hawaariyaatete Looso 2:42 togo yitanno: “Insa hawaariyaatete roso harunsatenna huucciꞌrate hixamanya diagurtino.” ‘Hixamanya’ yine tirroonnihu Girikete qaali mitto coye assate cincanna agura hooga yitanno sokka sayisanno. Kuri Kiristaanira Roomu gashshootinna Yihudunniri ammaꞌnote marooti darte iillishshannonsahura mitteenni gamba yaa shota diꞌꞌikkitinonsa. Ikkirono insa tenne assa diagurtino.

¹⁷ Xaa yannara nooti Yihowa soqqamaasineno Kiristaanu gambooshshe lowo geeshsha naaddanno. Aliidi Bisi miila ikke 22 saꞌꞌanno diro soqqaminohu Jiyorji Gangaasi togo yee coyiꞌrino: “Roduuwu ledo gamba yaa heeshshoꞌya giddo lowo geeshsha hagiirsiissannoe hattono jawaachishshannoe. Dandaamiero Mangistete Addaraashe balaxe maranno manni ledo iillanna gedeꞌne fula baxeemmo. Maganu manni ledo hasaaweemmo wote giddoꞌya hagiidhitanno. Insa ledo noommo wote ayyaanaamittete gannatera mine maateꞌya ledo noommohu gede ikke macciishshamannoe.” Isi lede togo yiino: “Kompaase aye woteno aliyye widira qolte raga leellishshannonte gede, anerano giddiidi hedoꞌyanna hasattoꞌya gambooshshe haꞌrate.”

18. Gambooshshu daafira mayi macciishshamannohe? Maa assate murciꞌrootto?

¹⁸ Yihowa magansiꞌrate mitteenni gamba yaate daafira aterano hatto ikke macciishshamannohe? Hatto ikkiro, gambooshshe agurittokkinni haꞌrate murciꞌri. Hatto assattoha ikkiro Nugusu Daawiti coyiꞌrinori ledo sumuu yaattota leellishatto; isi togo yiino: “Yihowa, ati heeꞌratto mine baxeemmo.”—Far. 26:8.