Ammana Jawaachishanno Akataati

AMMANA lowo wolqa afidhino. Lawishshaho, Sheexaanu ayyaanaamittetenni shaankera hasiꞌrannoha ikkirono, ammana “giirate gede wala yaannoha bushu koottalo” gargadhate kaaꞌlitannonke. (Efe. 6:16) Ammana, buutote qarra qeelleemmo gede assitannonke. Yesuusi rosaanosira togo yiino: “Shiimiidi gumi geeshshi ammana heedhoommeꞌnero konne ilaala, ‘Kawiinni kai!’ yitiniro haꞌranno.” (Mat. 17:20) Ammana ayyaanaamittetenni kaajjine heeꞌneemmo gede kaaꞌlitannonke daafira, aante noo xaꞌmuwa heda hasiissannonke: Ammana maati? Halaale baxanke ammana heedhannonke gede assitannohu hiittoonniiti? Ammananke kaajjishiꞌra dandiineemmohu ma garinniiti? Aye ammana hasiissannonke?—Rom. 4:3.

AMMANA MAATI?

Ammana, Qullaawu Maxaafi yaannori halaale ikkinota ammane adha calla diꞌꞌikkitino; korkaatuno agaaninte nafa Maganu noota ammantanno, hattono ‘waajjite huxidhanno.’ (Yai. 2:19) Ikkina ammana maati?

Qullaawu Maxaafi ammana lame tiro afidhinota kulanno. Umihunni, “ammanate yaa hexxotenni agadhinoonni coye hawaqiꞌrate.” (Ibi. 11:1a) Ammana heedhunkero Yihowa coyiꞌrinori baalu halaale ikkinotanna coyiꞌrinori woꞌmannota addaxxineemmo. Lawishshaho, Yihowa Israeelete dagara togo yiino: “Ani Kaaliiqi hashshunna barru yanna yannasira daanno gede gondooro oommo; kuni gondoorino horonta didiigamannoho.” (Erm. 33:20, 21) ‘Arrishsho yannasera fulanna ea agurteenna hashshunna barru soorrama agura ikka?’ yite yaadattoni? Yaadattokkiti egennantinote. Arrishsho eꞌannotanna fultannota huluullamattokkiha ikkiro, kuri coyibba kalaqino Kalaqaanchi eino qaale wonshannota huluullama hasiissannoheni?—Isa. 55:10, 11; Mat. 5:18.

Layinkihunni, ammana “illete leellinokki coyeno buuxiꞌrate.” Ammana mittu coyi illete leellannokkiha ikkirono addanka noota leellishshanno tajeeti. (Ibi. 11:1b) Hatto yaa mayyaate? Hanni mittu qaaqqi ‘Diilallo noota mayinni afitto?’ yee xaꞌminohe yine hendo. Diilallo illetenni leeltannokkiha ikkirono, qaaqqu diilallo noota huwatanno gede kaaꞌlattosi; lawishshaho, bubbisanno woyite haqqe milli assitannoti diilallo ikkitinota kulattosira dandaatto. Tini taje, qaaqqu diilallo laꞌꞌa dandaannokkiha ikkirono, diilallo noota ammananno gede assitannosi. Hatteente gede, ammana kaajjado taje aana xintamino coyeeti.—Rom. 1:20.

AMMANA HEEDHANNONKEHU HALAALE BANXEEMMOHA IKKIROOTI

Ammana tajete aana xintamino coye ikkitino daafira, mittu manchi ammana heedhasira hasiꞌriro balaxe “halaale afa” hasiissannosi. (1 Xim. 2:4) Ikkirono, tini calla diguddanno. Soqqamaasinchu Phaawuloosi, “Mannu wodanisinni ammane keeraaꞌmanno” yee borreessino. (Rom. 10:10) Mittu manchi halaale ammana calla ikkikkinni baxa woy naada hasiissannosi. Ammanasi loosunni leellisha woy rosino rosi garinni heeꞌra dandaannohu hatto ikkiro callaati. (Yai. 2:20) Halaale giddosinni baxannokki manchi, ammansiissanno taje nafa adha giwara dandaanno; korkaatuno alba noosi lao biddi assiꞌra woy maalu yortosi wonshiꞌrate injaanno coye agura dihasiꞌranno. (2 Phe. 3:3, 4; Yih. 18) Hunda maalale loonsanna laino manni giddo mitu ammana hooginohu iseraati. (Kir. 14:11; Yoh. 12:37) Qullaawu ayyaani ammana heedhannonsa gede, halaale baxxannore calla kaaꞌlanno.—Gal. 5:22; 2 Tes. 2:10, 11.

DAAWITI KAAJJADO AMMANA HEEDHANNOSI GEDE ASSIꞌRINOHU HIITTOONNIITI?

Kaajja ammana noonsa manni giddo mittu Moote Daawitiiti. (Ibi. 11:32, 33) Maatesi miilla baala kayinni togoo ammana noonsareeti yaa diꞌꞌikkino. Lawishshaho, Daawiti, Israeelete daga uggannohu Gooliyaadi ayimma afa hasiꞌri yannara rodiisi Eeliyaabi hanqe ufinosi; tenne yannara Eeliyaabi Yihowara gatisate wolqa noosita ammanannota dileellishino. (1 Sam. 17:26-28) Ammana adhine ilammannire woy annunna amatewiinni afiꞌnanni coye diꞌꞌikkitino; hakko daafira Daawitira togoo ammana heedhinosihu Maganu ledo muli jaalooma kalaqiꞌrino daafiraati.

Faarso 27, Daawitira togooti kaajjado ammana heedhannosi gede kaaꞌlinosiri maatiro kultannonke. (Kiiro 1) Daawiti alba iillinosi coyenna Yihowa diinnasi anganni gatisinosi gara hiincino. (Kiiro 2 nna 3) Isi Yihowa mine lowo geeshsha baxanno. (Kiiro 4) Daawiti ammanate roduuwisi ledo xaadooshshu dukkanira Magano magansiꞌrino. (Kiiro 6) Isi Yihowa jaate huucciꞌrino. (Kiiro 7 nna 8) Qoleno Daawiti Maganu doogo rosate hasatto noosi. (Kiiro 11) Daawiti, ammana lowo geeshsha hasiissannosita wodanchino daafira, “Ammana hooggoommeꞌꞌero maliꞌya bae hoogino!” yiino.—Far. 27:13, NW.

AMMANANKE KAAJJISHIꞌRA DANDIINEEMMOHU HIITTOONNIITI?

Atino Faarso 27te kulloonnire assittoro, Daawiti gede ammana heedhahera dandiitanno. Ammana egennote anna xintamino coyeeti; hakko daafira Maganu Qaalenna Qullaawu Maxaafi aana xintantino borro xiinxallattoha ikkiro, qullaawu ayyaani guma ikkitinota ammana lossiꞌra dandaatto. (Far. 1:2, 3) Xiinxallatto woyite yanna gaaꞌmite hiinci. Muꞌrote lophora bushshu hasiisannonte gede, hiinca galatinke lexxanno gede assitanno. Yihowara noonke galati lexxanno woyite, songote gambooshshiwa iso magansiꞌratenninna hexxonke wolootaho kulatenni ammananke loosunni leellinsheemmo. (Ibi. 10:23-25) Qoleno, ‘woꞌmanka woyite jaante huucciꞌranke’ ammananke leellishshanno. (Luq. 18:1-8) Konni daafira, Yihowa ate daafira hedannota addaxxite, ‘agurittokkinni huucciꞌri.’ (1 Tes. 5:17; 1 Phe. 5:7) Ammana loosoho kakkayissannonke; tini ammananke kaajjitanno gede assitanno.—Yai. 2:22.

YESUUSA AMMANTINANNITA LEELLISHSHE

Yesuusi reyara albaanni noo hashsha rosaanosira togo yiino: “Magano ammanne; aneno ammanne.” (Yoh. 14:1) Konni daafira Yihowa ammanneemmota calla ikkikkinni, Yesuusa ammanneemmotano leellisha hasiissannonke. Yesuusira noonke ammana leellisha dandiineemmohu hiittoonniiti? Hanni hatto assa dandiineemmota sase doogga laꞌno.

Umihunni, wodote kakkalo Maganu atera uyinohe elto gede assite lai. Soqqamaasinchu Phaawuloosi togo yiino: “Xa heeꞌreemmo heeshsho baxannoehanna ane daafira lubbosi sayise uyinoha Maganu Beetto [ammanatenni] afiꞌroommote.” (Gal. 2:20) Yesuusa ammanattoha ikkiro, wodo atera uyinoonni elto ikkitinota, cubbikkira maaronna hegerera heeꞌrate hexxo afiꞌroottohu tenne eltonni ikkinota, hattono tini elto Maganu baxannoheta leellishshanno taje ikkitinota addaxxatto. (Rom. 8:32, 38, 39; Efe. 1:7) Togoo ammana ateneetira gara ikkitino lao heedhannohe gede assitannohe.—2 Tes. 2:16, 17.

Layinkihunni, Yesuusiti wodote kakkalo fantinohe faro horoonsidhe, huuccattotenni Yihowawa shiqi. Wodo “Maaro adhatenna hasiissanno yannara kaaꞌlitannonke elto afiꞌrate, elto noowa ayirradu Maganu barcimiwa ruxxi yinummokkinni” shinqeemmo gede assitinonke. (Ibi. 4:15, 16; 10:19-22) Huuccatto, cubbu qeelannonkekki gede kaaꞌlitannonke.—Luq. 22:40.

Sayikkihunni, Yesuusira hajajami. Soqqamaasinchu Yohaannisi togo yiino: “Beettosi ammanannohura hegere heeshsho noosi; Beettisira hajajamannokkihura kayinni, Maganu hanqi aanasi heeꞌranno ikkinnina heeshsho diafiꞌranno.” (Yoh. 3:36, NW) Yohaannisi, Yesuusa ammananno manna, Yesuusira hajajamannokki manni ledo heewisiisinota wodanchi. Hakko daafira, Yesuusa ammanneemmoha ikkiro, isira hajajama hasiissannonke. Yesuusira hajajama dandiineemmohu “Kiristoosi Seera” yaano isi rosiisinorenna hajajinore baala agadhatenniiti. (Gal. 6:2) Qoleno Yesuusi “ammanaminohunna wodanaamu borojjichi” widoonni aannonke biddishsha harunsineemmoha ikkiro isira hajajammanni heeꞌnoommo. (Mat. 24:45, NW) Yesuusira hajajammeemmoha ikkiro, hombobolattete gedee qarra cincine saꞌꞌa dandiineemmo.—Luq. 6:47, 48.

‘QULLAAWA AMMANAꞌNENNI UMOꞌNE KEEREENSIDHE’

Mitte yannara, mittu manchi Yesuusa ‘Ammaꞌnoommona, roorse ammaꞌneemmo gede kaaꞌlie!’ yee huucciꞌrino. (Maq. 9:24) Konni manchira mito geeshshano ikkiro ammana noosi; ikkirono umosi heeshshi asse roore ammana hasiissannosita coyiꞌrino. Hakko manchi gede, ninkerano lowo ammana hasiissannonke woyiti no. Qoleno ninke baalunku xaanni ammananke kaajjishiꞌrate assa dandiineemmori no. Aleenni laꞌnummonte gede, Maganu Qaale xiinxallinenna hiincine Yihowara noonke galati lexxanno gede assiꞌnummoro ammananke kaajjitanno. Qoleno, ammanate roduuwinke ledo Yihowa magansiꞌranke, hexxonke mannaho kulankenna jaante huucciꞌranke ammananke kaajjitanno gede assitanno. Ammananke kaajjado ikkituro, baalunkunni roorino baꞌraarsha afiꞌneemmo. Maganu Qaali togo yee jawaachishannonke: ‘Maganu baxilli giddo heeꞌrate, woꞌmunkurinni roorsitine qullaawa ammanaꞌnenni umoꞌne keereensidhe.’—Yih. 20, 21.