Tean’i Jehovah Hibebaky ty Olo Iaby

1. Ino ty ataon’olo mibebaky?

TENA mila mibebaky tsika laha misy raha raty nataontsika. Mivola ty Baiboly fa mibebaky ty olo raiky laha manomboky malay an’ny raha raty nataony iny, tsy manao an’ny raha iny sasy, sady tapa-kevitsy tsy hampimpoly an’ny raha iny.​—Mat. 3:8; Asa. 3:19; 2 Pet. 3:9.

2. Manino ro tsika iaby mihintsy ro mila mahay ty atao hoe fibebaha? (Nehemia 8:9-11)

² Mila mahay ty atao hoe fibebaha lafa kila olombelo. Fa manino? Satria samby manota tsika iaby sanandro. Taranakin’i Adama noho Eva tsika ka nandova ota noho fahafatesa. (Rom. 3:23; 5:12) Tsy misy amintsika zany afaky mivola hoe tsy mpanota. Ndre ty olo nana finoa matanjaky manahaky an’ny apostoly Paoly aza, tsy nimora taminy ty handresy fanirian-draty. (Rom. 7:21-24) Fe midika va zay hoe tsy ho avotsy sasy tsika satria nisy fahotà nataontsika, ka ho kivy lava avao? Aha, tsy zay. Tena mamindra fo Jehovah sady teany ho falifaly tsika. Eritsereto, ohatsy, ty Jiosy tamy andron’i Nehemia. (Vakio Nehemia 8:9-11.) Nalahelo biby rozy tamy fahotà nataon-drozy taloha tany. Fe tsy tean’i Jehovah halahelo lava avao rozy, fa teany ho falifaly lafa manompo azy. Hain’i Jehovah fa ho falifaly tsika laha mibebaky, ka zay mahavy azy mampianatsy antsika an’ny raha io. Laha mibebaky tsika, le afaky matoky fa hanenga ty fahotantsika azy Babantsika mamindra fo iny.

3. Ino ty hianarantsika amy lahatsoratsy toy ato?

³ Hianatsy misimisy mikasiky ty atao hoe mibebaky tsika amy lahatsoratsy toy ato. Misy raha telo retoa hodinihintsika: Voalohany, hodinihintsika hoe ino ty nampianarin’i Jehovah ty Israely mikasiky fibebaha. Bakeo, hianarantsika hoe akory ty nanampean’i Jehovah ty olo mba hibebaky. Farany, ho hitantsika hoe ino ty nampianarin’i Jesosy Kristy ty mpanori-dia azy mikasiky fibebaha.

NAMPIANATSY TY ISRAELITA MIKASIKY FIBEBAHA JEHOVAH

4. Ino ty nampianarin’i Jehovah ty firenenan’Israely mikasiky fibebaha?

⁴ Lafa nandamy ty Israelita ho firenena Jehovah, le nanome lalàna an-drozy. Nanao fifanekea na fifanaraha tamin-drozy ie tamy zay. Laha rozy manoriky avao ty lalànany, le harovany sady hotahiny. Ho zao ty nivolaniny mikasiky an’ny lalàna nameany an-drozy rey: “Tsy sarotsy marè aminao didy ameako anao androany zao, sady tsy lavitsy marè anao.” (Deot. 30:11, 16) Fe laha tsy manoriky ty lalànany rozy, ohatsy hoe mivavaky amy ndranahary hafa, le tsy hotahiny sasy ka hijalijaly. Fe tsy midika zay hoe vita eo ty mikasiky an-drozy. Mbo afaky ‘mimpoly amy Jehovah Ndranaharin-drozy rozy, ka mijanjy ty feony.’ (Deot. 30:1-3, 17-20) Afaky mibebaky zany rozy. Laha nanao ani-zay rozy, le hifandramby amin-drozy Jehovah sady hitahy an-drozy ndraiky.

5. Akory ty nampisehoan’i Jehovah hoe tsy nikivy tamy vahoakiny rey ie? (2 Mpanjaka 17:13, 14)

⁵ Vahoaky nifilin’i Jehovah ty Israelita, fe tsy nanoriky ty safàny avao rozy matetiky. Tsy vitan’ny hoe nanompo sampy rozy, fa mbo nanao raha raty hafa koa. Vokany, nijalijaly rozy. Fe tsy namoy fo Jehovah, ka hoe le liany nengany any rozy. Tsy nivozaky ie fa naniraky ty mpaminany avao, mba hampirisiky an-drozy hibebaky noho himpoly aminy.​—Vakio 2 Mpanjaka 17:13, 14.

6. Naniraky ty mpaminaniny Jehovah mba hampianatsy ty vahoakiny hoe tena mila mibebaky rozy. Akory ty nanaovany ani-zay? (Henteo koa sary io.)

⁶ Matetiky Jehovah nampiasa ty mpaminaniny mba hampitandrina noho hananatsy an’ny vahoakiny maheriloha rey. Ho zao, ohatsy, ty nivolani-Ndranahary tamy alalan’i Jeremia: “Mimpolia Israely maheriloha ... Tsy handatsa anareo aho na ho meloky anareo, satria tsy mivaliky aho ... Tsy ho meloky mandrakizay aho. Ekeo avao hoe diso nareo, satria niala tamy Jehovah Ndranaharinareo.” (Jer. 3:12, 13) Nirahin’i Jehovah Joela hanambara amy vahoaky rey hoe: “Mimpolia amiko amy fonareo iaby.” (Joela 2:12, 13) Ho zao koa ty hafatsy nampivolaniny an’i Isaia: “Misasà ka diovo ty vatanareo. Afaho tsy ho hitan’ny masoko ty raha raty ataonareo, le ka manao raha raty sasy.” (Isaia 1:16-19) Le ho zao ty nivolaniny tamy alalan’i Ezekiela: “Le ho teako va ty hahafatesa ty raty fanahy? ... Tsy nainako aza ie hiala amy ty raha raty fataony le ho velo? Tsy teako mihintsy ty hahafatesa ty olo, ndre ia zay ndre ia. ... Ka manao raha raty sasy zany mba ho velo nareo!” (Ezek. 18:23, 32) Tena falifaly Jehovah lafa misy olo mibebaky, satria teany hiay tsy misy farany rozy! Fe mandiny an’olo iny hibebaky va zany Jehovah zay vo manampy azy? Ndao tsika handiniky ohatsy vitsivitsy mikasiky ani-zay.

7. Ino ty tean’i Jehovah hampianary ty vahoakiny baka amy ty tantaran’i Hosea mpaminany morovaly?

⁷ Diniho ty tantaran’i Hosea mpaminany noho Gomera valiny. Ho haintsika baka amy tantara io hoe ino ty tean’i Jehovah hampianary ty vahoakiny. Nandranto Gomera bakeo nisaraky amy Hosea, ka nanaraky lahilahy hafa. Ka ino ty nataon’i Jehovah? Mahay ty am-po ao ie, le zao ty nivolaniny tamy Hosea: “Ndany ndraiky, tiavo ampela niaraky amy lahilahy hafa noho mandranto iny. Tiavo ie, manahaky ty itiavan’i Jehovah ty vahoakin’Israely, ndre manompo ndranahary hafa aza rozy.” (Hosea 3:1; Ohab. 16:2) Henteo fa mbo tsy niala tamy raha raty fataony iny valin’i Hosea iny, fa mbo nandranto avao. Fe nivola tamy Hosea Jehovah mba hamonjy an’ny ampela iny, le hanenga ty hadisoany sady hampimpoly azy ndraiky.a Nampiasa an’ny tantara io Jehovah mba hampianara ty vahoakiny hoe ino ty raha tsapany mikasiky an-drozy. Mbo nitea an-drozy avao Jehovah ndre nanao raha raty aza rozy. Tsy nivozaky ie fa naniraky ty mpaminaniny avao mba hanampy an-drozy hibebaky noho hanova ty fomba fiainan-drozy. Ianarantsika baka amy tantara io fa mahay mikasiky ty olo raiky Jehovah satria “mpandiniky ty fo.” Hiezaky avao ie hanampy an’olo iny hibebaky, ndre mbo manao fahotà bevata aza ie. (Ohab. 17:3) Ndao tsika handiniky misimisy mikasiky ani-zay.

AKORY TY ANAMPEAN’I JEHOVAH TY OLO HIBEBAKY?

8. Ino ty nataon’i Jehovah mba hanampea an’i Kaina hibebaky? (Genesisy 4:3-7) (Henteo koa sary io.)

⁸ Kaina ro voalohan’anakin’i Adama noho Eva. Nandova ota tamy ray aman-dreniny ie. Ho zao koa ty volanin’ny Baiboly mikasiky azy: ‘Nanao raha raty ie.’ (1 Jaona 3:12) Mety zay vasa ty antony nahavy an’i Jehovah ‘tsy nankasitraky an’i Kaina noho ty fanatitsiny’, lafa ie nanao soro. Tokony niova Kaina, fe ndra vomaiky koa ie ‘neloky biby sady tena nikivy.’ Ino amy zay ty nataon’i Jehovah? Niresaky tamy Kaina ie. (Vakio Genesisy 4:3-7.) Henteo fa nananatsy an’i Kaina moramora Jehovah, le nivola taminy ie hoe laha manao raha soa ie le hotahiny. Nampitandrina azy koa Jehovah hoe laha tsy mieny helokiny io, le mety hitariky azy hanao raha raty. Mampalahelo fa tsy nijanjy Kaina. Nanampy azy hibebaky Jehovah, fe tsy zaho zao hoasan’i Kaina. Lafa tsy nety nanary Kaina, niankenjy va Jehovah ka nanapa-kevitsy hoe tsy hanampy olo hafa hibebaky sasy? Ndao ndraiky zay ro hodinihintsika.

9. Akory ty nanampean’i Jehovah an’i Davida mba hibebaky?

⁹ Tena tea an’i Davida Mpanjaka Jehovah. Nikaihiny mihintsy aza ie hoe “lahilahy mahazo hatò amiko.” (Asa. 13:22) Fe nisy fotoa Davida nanao raha farani-ze raty. Nijangajanga, ohatsy, ie sady namono olo. Laha hentea ty Lalànan’i Mosesy, le tokony hovonoa Davida. (Lev. 20:10; Nom. 35:31) Fe niferinay azy Jehovah ka nanampy azy.b Nirahin’i Jehovah tamy Davida tany Natana mpaminany mba hiresaky aminy, ndre mbo tsy nieky ty fahotàny aza Davida sady mbo tsy nibebaky. Nanao fanohara Natana mba hanampea an’i Davida hahatsapa hoe tena raty ty raha nataony. Lafa naharè an’ny fanohara iny Davida le nieky ty fahadisoany, farany nibebaky. (2 Sam. 12:1-14) Nanoratsy salamo raiky ie mba hampisehoa hoe tena nibebaky. (Sal. 51, safà mampilitsy azy.) Maro ty olo nanao fahotà nahazo fampahereza lafa namaky an’ny salamo io, ka lasa nibebaky. Soa avao fa be fitiava Jehovah ka nanampy an’ny mpanompony io hibebaky. Ka ino ty tsapanao mikasiky an’i Jehovah? Tsy lasa falifaly va iha lafa mandiniky an’ny raha nataony tamy Davida io?

10. Ino ty tsapanao lafa hainao hoe manam-pahareta amintsika Jehovah sady manenga ty hadisoantsika?

¹⁰ Halan’i Jehovah lafa kila fahotà. (Sal. 5:4, 5) Fe tea antsika Jehovah. Lafa manota tsika, le ta hanampy antsika ie. Tsy kivy ie ndre amin’olo nanao fahotà tena raty rey aza, fa ampeany avao rozy hibebaky noho hifandramby soa aminy ndraiky. Tena mampahery antsika ty mahay hoe ta hanenga ty hadisoantsika Jehovah. Lafa tsika mametsivetsy hoe manam-pahareta amintsika Jehovah sady manenga ty hadisoantsika, le tapa-kevitsy tsy hivaliky aminy avao tsika sady avy le mibebaky lafa manota. Nampianatsy ty mpianatsiny mikasiky fibebaha koa Jesosy. Ndao zay koa ro hodinihintsika.

NAMPIANATSY TY MPANORI-DIA AZY MIKASIKY FIBEBAHA JESOSY

11-12. Ino ty fanohara niresahin’i Jesosy mba hampianara antsika hoe tena parè hanenga ty hadisoantsika Jehovah? (Henteo sary amy gazety toy.)

¹¹ Lafa ho niavy tan-tany etoy ty Mesia, le nirahin’i Jehovah Jaona Mpanao Batisa mba hitory tamy ty vahoakiny noho hampirisiky an-drozy hibebaky. Lafa nanomboky ty fanompoany Jesosy, le nampianatsy ty olo koa ie hoe tena ilà ty mibebaky.​—Mat. 3:1, 2; 4:17.

¹² Tamy Jesosy tan-tany tetoy, le nampianatsy ty olo ie hoe parè hanenga ty hadisoantsika Babany laha manota tsika. Nanao fanohara mikasiky anaky adala iny ie mba hanampea antsika hahatsapa ani-zay. Nihalan’ny mpamaraky io ie niada tamy babany tao iny fa naleony niala tao, le nanao fiainan-draty tam-baliky any. Fe lafa nitsapany hoe tsy nety ty raha nataony, le nimpoly tamy babany any ie. Ino amy zay ty nataon’ny babany? Nivola Jesosy fa “mbo nilavitsy ie, le fa nijilon’ny babany. Le niferinay azy babany iny ka nilailay le nandrakoky azy sady nanoroky azy.” Fa tsy nitamà ie hoe hanenga ty hadisoany babany, farany nangataky ie mba hatao mpanompo an-tranon’ny babany ao. Fe parè hanenga ty hadisoany babany. Nikaihiny mihintsy aza ie hoe “anako toy”, sady nengany ie hiaraky mipetraky amin-drozy ndraiky. Hoy babany: “Nitrobo [ie] fe nihita ndraiky.” (Lioka 15:11-32) Tamy Jesosy mbo tan-danitsy any, le azo antoky fa nihitany hoe miferinay ty mpanota mibebaky Jehovah Babany sady parè hanenga ty hadisoan-drozy. Tena mampahery antsika fanohara niresahin’i Jesosy io, sady manampy antsika hahita hoe tena mamindra fo Jehovah Babantsika!

13-14. Ino ty nianaran’ny apostoly Petera mikasiky fibebaha, le ino ty nampianariny ty olo hafa mikasiky ani-zay? (Henteo koa sary io.)

¹³ Nisy raha bevata nianaran’ny apostoly Petera baka amy Jesosy mikasiky fibebaha noho fanengà hadisoa. Tsy indraiky avao Petera ro nanao fahadisoa, fe parè hanenga ty hadisoany avao Jesosy. Lafa baka nandà an’ny Tompony intelo Petera, le nikivy biby ie satria nanea azy ty eritseriny. (Mat. 26:34, 35, 69-75) Fe lafa nivelomy tamy maty Jesosy, le niseho taminy. (Lioka 24:33, 34; 1 Kor. 15:3-5) Azo antoky fa nanenga ty hadisoan’ny apostoliny nibebaky io Jesosy tamy fotoa io sady nanome toky azy.

¹⁴ Afaky nampianatsy ty olo hafa mikasiky fibebaha noho fanengà hadisoa Petera satria fa niainany raha zay. Nanao lahateny tamy Jiosy rey ie tsiela tafaran’ny fetin’ny Pentekosta, le nihazavaniny tamin-drozy hoe namono an’ny Mesia rozy. Fe ndre zay, le nisoa fanahy tamin-drozy ie ka nampirisiky an-drozy hoe: “Mibebaha zany, ka mimpolia amy Ndranahary mba ho voafafa ty fahotanareo. Amy zay le hisy fotoa mamelombelo baka amy Jehovah.” (Asa. 3:14, 15, 17, 19) Nampianatsy Petera fa mibebaky ty olo raiky nanota laha mimpoly amy Ndranahary, zany hoe manova ty eritseri-draty nananany, tsy manao raha raty sasy, noho manomboky manao raha tea-Ndranahary. Nivola koa Petera fa hanenga tanteraky ty fahotan’olo iny Jehovah. Sahala hoe fafàny tsy hisy sasy raha rey. Le tao maro tafara atoy, nanome toky ty Kristiana Petera hoe: “Manam-pahareta aminareo [Jehovah], satria tsy teany hisy ho ripaky ty olo fa teany hibebaky iaby.” (2 Pet. 3:9) Laha mibebaky amy ty fahotantsika tsika, ndre atao hoe fahotà bevata aza raha zay, le hanenga tanteraky ty fahadisoantsika Jehovah. Tena mampahery antsika ty mahay ani-zay!

15-16. a) Akory ty nianaran’ny apostoly Paoly mikasiky fanengà hadisoa? (1 Timoty 1:12-15) b) Ino ty hodinihintsika amy lahatsoratsy manaraky ao?

¹⁵ Anisan’ny olo tena nila nibebaky noho tena nila fanengà hadisoa, Saoly baka Tarsosy any satria maro biby ty raha raty nataony. Nanenjiky marè ty mpanori-dia an’i Kristy ie sady tena nisatà tamin-drozy. Mety nieritseritsy ty ankamaroan’ny Kristiana hoe tsy Saoly zao mihintsy ro hibebaky. Fe tsy nanahaky ani-zay ty fahitan’i Jesosy azy. Hainy fa mbo afaky hiova ie sady hibebaky. Hitan-drozy amy Babany hoe nisy toetsy soa nananan’i Saoly. Hoy Jesosy: “Fanaky nifiliko lahilahy zay.” (Asa. 9:15) Nanao fahagagà mihintsy aza Jesosy mba hanampea an’i Saoly hibebaky. (Asa. 7:58–8:3; 9:1-9, 17-20) Nibebaky Saoly, na Paoly, ka nilasa Kristiana. Nitendrèn’i Jesosy ho apostoly ie, le nisy asa nampanaoviny azy. Matetiky Paoly nivola hoe tena misaotsy an’i Jehovah noho Jesosy ie satria nisoa fanahy noho namindra fo taminy rozy. (Vakio 1 Timoty 1:12-15.) Ho zao ty nivolanin’ny apostoly Paoly tamy rahalahiny noho anabaviny rey: “Tea-Ndranahary hibebaky iha kanao soa fanahy aminao ie.”​—Rom. 2:4.

¹⁶ Niren’i Paoly ndraiky zay hoe misy lahilahy mpijangajanga tamy fiangonan’i Korinto teo, fe mbo nengàn-drozy ho anisan’ny fiangona avao ie. Ino ty raha nampanaoviny an-drozy? Ao fa hodinihintsika ty raha nivolaniny. Ho hitantsika amy raha nivolaniny hoe be fitiava Jehovah lafa mananatsy ty mpanompony sady mamindra fo ie lafa rozy mibebaky. Hianarantsika koa hoe akory ty azontsika anahafa azy. Hodinihintsika soa raha niseho ta Korinto any io amy lahatsoratsy manaraky ao.