Lahatsoratsy Manampy ty Ampela Nisy Nampijaly
“Ampela noho somonjara an-tapitrisany ro misy manararaotsy amy tany toy iaby. Anatini-zay koa va iha? Hohitanao atoa fa tena vatan-draha amy Ndranahary ty fiarova anareo ampela noho ty raha hataony mba tsy hisy olo hanararaotsy anareo sasy.”
Zay ty fanombohan’ny lahatsoratsy amy jw.org ao hoe “Fiarova ty Ampela—Ino ty Volanin’ny Baiboly?” Misy lien ahafahanao mangalaky an’ny lahatsoratsy io amy faran’ny lahatsoratsy io any. Afaky ataonao printy lahatsoratsy io sady afaky aforitsinao mba ho lasa taratasy mivalo misy pejy efatsy. Zao ty nivolanin’i Stacy, ranabavy mipetraky a Etazinỳ any zay: “Nanao printy maromaro tamy lahatsoratsy io aho, bakeo nandesinay amy rahavavy zay amy pilasy raiky amy faritanin’ny fiangonanay ao zay raha rey. Natoka ho an’ny ampela nisy nampijaly noho tsy mana trano hipetraha rey pilasy io.”
Nisy mpiasa tao zay nanontany an’i Stacy, laha mbo misy lahatsoratsy vita printy ty aminy any mba hozarany amin’olo mipetraky amy pilasy iny ao. Lahatsoratsy 40 mahery noho karatsy jw.org 30 tamy zay ty nivoazaran-drozy mirahavavy. Lafa nisy mpitory nitsidiky an’ny pilasy io tafara atoy, le nivola tamin-drozy ty tompon’andraikitsy tao mba hampiseho mikasiky fomba fianara Baiboly amin’olo mipetraky ao.
Nandeha amy pilasy raiky hafa natoka ho an’ny ampela rey koa Stacy noho ranabavy roe rezay. Nahapetraky lahatsoratsy vita printy limy rozy, fe nisy mpiasa maro koa mbo ta hahazo. Nivola ty raiky amy mpiasa rey hoe: “Hanampy an’ny ampela ato reto lahatsoratsy toy.” Zao koa ty nivolaniny: “Mila ani-toy koa zahay.” Lafa nimpoly any ranabavy rey tafara atoy, le nisy ampela maromaro nivorivory satria ta hahita hoe manao akory fianara Baiboly zao. Nivola mihintsy aza ty roe amin-drozy fa ta hanatriky fivoria faran’ny herinandro amy efitrano any.
Zao ty nivolanin’i Stacy: “Nitseriky zahay fa tena nitean’olo ty namaky an’ny lahatsoratsy iny. Iny ro fomba soa niresaha an’ny hafatsy mikasiky an’ny Fanjakà iny, tamy ampela nisy nampijaly rey. Tena nampahery ty nahita hoe nifalifaly ty olo lafa namaky an’ny lahatsoratsy iny. Fa tsy lininay koa ty fomba hitahian’i Jehovah ty ezaky hataonay lafa manohy miresaky vaovao soa amin’ampela reo zahay.”