Se Taimi mo Gaoioiga Faateleina
1 A o matuā lalata mai le mutaaga o lenei faiga amioleaga o mea ma tatou maimoaina le faaʻoaina tele e Ieova o la tatou faiva, e manaomia mo i tatou ona utagia le apoapoaiga a le aposetolo o Peteru ia ‘fusi aʻe o tatou mafaufau mo gaoioiga.’—1 Pete. 1:13; Isaia 60:22.
2 Ina ua avatu e Peteru le apoapoaiga i luga, sa ia tusia e faatatau i le faaolataga e mafai ona fai mo i tatou e ala i le toto masaa o Iesu Keriso. O lo tatou faalauiloaina o le tala lelei o le Malo o se tasi lea o auala tāua ua ia i tatou e faataʻitaʻia ai lo tatou faatuatua ma faaleoina ai lo tatou talisapaia mo aogā ua tatou maua ona o le alofa o Ieova ua faaalia e ala i le meaalofa o lona Alo. (Ioane 3:16) O le vaitau o le Faamanatuga o se taimi e ao ona atili sili ai ona tiotio i lenei galuega ua tofia e le Atua.
FAAMANATUINA O LE FAAMANATUGA MA LE LAUGA FAAPITOA
3 O le a usuia le faamanatuina o le Faamanatuga i lenei tausaga pe a goto le la ia Aperila 10. I le taimi nei, a o faatalitalia lena aso faapitoa, e mafai ona tatou iloiloina la tatou faiā ma Ieova le Atua ma le auala o tatou manatuaina ai le taulaga a Iesu. Pe tatou te faataʻitaʻia lo tatou faatuatua i aso uma i le pipii aʻiaʻi i tapulaa amiotonu a Ieova i o tatou manatunatuga, tautala, ma le amio? O tatou faaalia le alofa mo isi i le uunaia o i tatou e talaʻi e uiga i le Malo ma i le faia o soʻo? O le faamanatuina o le Faamanatuga i se auala faapitoa i tausaga taitasi, tatou te manatua ai le mea na faia e Ieova ma Iesu mo i tatou. (Luka 22:19; 1 Kori. 11:23, 24) O sea manatua faalologo e tatau ona uunaia i tatou i gaoioiga maumauaʻi e tusa ma o tatou tomai ma aiaiga taitoatasi.
4 Ia Mati 25, o le tele o faapotopotoga o Molimau a Ieova i le lalolagi aoao o le a aaoina ai se lauga faapitoa i le mataupu “Aapa Atu mo le Olaga Moni!” Maeu se avanoa matagofie mo ē fou ia amata ona auaumea ma le faapotopotoga! E tatau ona faalaeiau i latou o ē auai i le lauga faapitoa ia faatasi ai mo le faamanatuina o le Faamanatuga ia Aperila 10.
FAATELE TUFATUFAGA O MEKASINI ILOGA
5 Ua faia e Le Olomatamata ma le Awake! se vaega tāua i la tatou faiva i le lautele a o saunia taumafa faaleagaga ma tusi faitau talafeagai mo i tatou uma lava. O le a sapaitalia e tagata talaʻi uma o le Malo le taumafaiga faapitoa na alu i le sauniunia o mekasini mo Aperila ma Me. O lomiga ia o le a tatou faamatilatila pe a ofoina tusiga. Taumafai e faamasani atoatoa i lomiga taitasi i le taimi lava e te mauaina ai. I lea o le a faaosofia ai lou maelega e taulimaina o ia i le fanua pe a ofoina tusiga ma kopi taitasi ma pe a aaoina mekasini e lua ma se tasi o polosiua ia i latou o ē lē talia tusiga.
6 Pe mafai ona e faaava se avanoa i lau faasologa totino e paeonia lagolago ai ia Aperila ma Me? Afai e feololo nisi o tagata talaʻi i le faapotopotoga e fuafua e paeonia i le taimi e tasi, e mafai ona latou fesoasoani ma faalaeiau le tasi i le isi i lenei vaitaimi faapitoa o gaoioiga faateleina. O le a fiafia toeaiina e fesoasoani i le faia o faatatauga faaopoopo mo le molimau i vaega pe a talafeagai.
7 Manatu mamafa e faatatau i ou lava aiaiga, e pei o avega tauave i le aiga, soifua maloloina faaletino, galuega masani, po o faasologa o le aʻoga. Afai e lē mafai ona e paeonia i lenei taimi, i le ā le mamao e mafai ona e faateleina ai lou auai i le faiva i le fanua? E mautinoa e finagalo malie Ieova i le auaunaga ma le loto atoa e faaleo ai lo tatou alofa ma le sapaitalia o ia ma mo le meaalofa tautele o lona Alo, o Iesu. A o tatou iloiloina i tatou lava i le malamalama o le Afioga a le Atua ma fusi aʻe o tatou mafaufau mo gaoioiga, e mafai ona tatou mautinoa le mauaina o le agaga o Ieova e faatumauina i tatou i le ofoina atu o viiga e talileleia.—Epe. 13:15.