Faamanatuga—Le Aso Faamanatu Kerisiano
1 Sa faavaeina e Iesu le Faamanatuga ia Nisani 14, 33 T.A., ma na ia faatonuina ona aposetolo: “Tou te faia le mea nei e fai ma faamanatuga ia te au.” (Luka 22:19) Na faamatala e le aposetolo o Paulo faapea i le faia o lenei “tou te faailoa atu ai le maliu o le Alii seia afio mai o ia.” (1 Kori. 11:26) E talafeagai ona faamanatu le maliu o Iesu ona o mea uma ua ia faataunuuina i le galueaina o fuafuaga a Ieova. Ua saunia e le taulaga togiola le faavae moni mo lo tatou faatuatua ma aumaia ia i tatou se faamoemoe mo le olaga i le lumanai.
2 Talu mai le amataga o le faapotopotoga Kerisiano, sa faamanatu ai ma le faamaoni e soʻo o Iesu le Faamanatuga o lona maliu. I ona po nei sa lipotia mai ai i tuā i le 1899 faapea e 2,501 na auai i le faamanatuina o le Faamanatuga i le Iunaite Setete. I le taimi nei, 91 tausaga mulimuli ane, ia Nisani 14 e paʻū i le Aso Lua, Aperila 10, pe a goto le la, e faitau miliona tagata i le faatamilo o le lalolagi ua faatalitalia e matauina lenei faamanatuina faaletausaga.
SAUNIUNIGA MANAOMIA E TOEAIINA
3 I le manatu i le tāua o lenei faatasiga ma se aofaiga toatele ua faatalitalia, e tatau i faapotopotoga ona sauniuni mamao. (1 Kori. 14:40) E lē aafia ai ni aganuu ma ni faiga faasāsā. E leai, aua ua tatou matauina i le Mataio 26:26-30 le faigofie o lenei faamanatuga e sili ona tāua sa amataina e Iesu. (1 Kori. 11:23-26) Ae e iai nisi auiliiliga matuā manaomia e ao ona matauina ina ia saʻo le faamanatuina o le Faamanatuga. O le ā e aofia i na mea?
4 Faatasi ma isi mea, ia mautinoa e toeaiina ua faaalia le faaaloalo mo le Talisuaga Afiafi a le Alii i le saunia o ituaiga o faatusa talafeagai. Atonu e faaaogā se areto lē faafefeteina, e pei o se falaoa lē filogia faa-Iutaia, e tau o le falaoa mata ma le vai e fai ai. E tatau foi, ona faaaogā na o se uaina mūmū e lē suia, e pei o le Chianti, Burgundy, po o se uaina mūmū pauli (claret). E ono faaaogā foi se uaina mūmū ua gaosia pe afai e leʻi faasumalieina, faamanogi, pe ua faamalosiina.
5 O le a mananao foi toeaiina e filifilia uso o ē lelei faaaʻoaʻoga ma ua agavaa, ae maise toeaiina po o auauna o le faiva, e tufaina faatusa. E tatau ona pulea lelei i latou ma e ao ona malamalama tonu i le mea ua faatonuina e lo latou tofiga. E ao ona logoina i latou o ē tautua i o latou tiute, e pei o le faasinosinoina o tagata i totonu ma fafo o le maota atoa foi ma le faatonutonuina o taavale e faaopopo mai. E faapitoa ona tāua lenei i mea e tele ai faapotopotoga e faaaogāina se Maota o le Malo e tasi po o le faaopoopoga o le Maota o le Malo. Ia faia foi se faatatauga e faamautinoa ua logo le failauga e uiga i le taimi ma le nofoaga o le faamanatuga.—Mo faamatalaga faaopoopo i mea e sauniuni mo le Faamanatuga, tagai Le Olomatamata faa-Peretania o Fepuari 15, 1985, itulau 19, ma Fepuari 15, 1990, itulau 16-18; La Tatou Faiva o le Malo, Mati 1989, itulau 4.
SAUNIUNIGA TOTINO
6 O i tatou uma lava e tatau ona taumafai e utufia aogā atoatoa mai lenei faamanatuina e sili ona paia. Faatasi ma isi mea, e mafai ona tatou sauniunia i tatou lava i le mafaufau e mulimuli aʻiaʻi i le faitau Tusi Paia mo Aperila 5-10, e pei ona matauina i le Kalena 1990 a Molimau a Ieova. Ia ao foi, ona tatou faia fuafuaga e valaaulia ma fesoasoani i le toatele o tagata e mafai ai e auai i lenei faatasiga sili ona faapitoa. Ma e tatau ona tatou tausia i latou o ē o mai ia lagona le fia auai.
7 I le sauniuni maeʻaeʻa a o mamao, tatou te faaalia ai tatou te manatu i le auai i le Faamanatuga o se faaeaga ma o se avanoa e faaalia ai le sapaitalia mo le tulaga a Keriso. Talosia ia faamaonia le faamanatuina o le Faamanatuga i lenei tausaga o se taimi o faalaeiauga e atiina aʻe ai i auauna uma lava a Ieova. Tau ina ia faagoto ai i totonu o i tatou uma le agaga o le mautinoa sa folasia e Iesu. O lo tatou faalagolago ia Ieova o le a fesoasoani ia i tatou e manumalo i le lalolagi ma maua ai lo tatou taui i le lumanai.—Ioane 16:33; 2 Pete. 1:10; Faaa. 7:9, 10, 14.