Taulimaina o le Tala Lelei—E ala i Suesuega faale-Tusi Paia
1 I le tausaga faaleauaunaga faatoa tuanai atu nei i le Iunaite Setete, e silia ma le 535,000 suesuega faale-Tusi Paia na taulimaina i masina taitasi. Pe ā o le afa o le 817,000 tagata talaʻi o lena atunuu na i ai se sao i lenei gaoioiga olioli, ma i Samoa e itiiti ifo le numera na i lo lena. O le mea moni, afai e maualalo ifo i le afa o tagata talaʻi na auai i lenei gaoioiga, o lona uiga o le toatele e leʻi auai. E mafai faapefea la ona sili atu i tatou e olioli i le faamalieina faapitoa e sau mai le aʻoaʻoina o se tasi i le upu moni?
2 Ona tatou te alolofa i le Atua ma tuaoi, ua tatou mananao ai e faasoa atu le upu moni i isi. Peitai tatou te manaomia le fesoasoani mai ia Ieova i la tatou faiva. (1 Kori. 3:6, 7) O lea, pe lē o se mea lelei ona faalatalata atu ia Ieova i le tatalo ma talosagaina o ia e fesoasoani mai ia i tatou e amata se suesuega faale-Tusi Paia i le aiga? (1 Ioane 5:14, 15) Ona tatou gaoioi faatatau lea ia ōgatasi ma la tatou olega ma auai i le faiva i le fanua i le atoatoa o le a faatagaina e o tatou aiaiga, ofo se suesuega faale-Tusi Paia i le aiga i taimi uma e aliaʻi mai ai le avanoa.
E LASI AVANOA
3 I nai tausaga ua mavae, na tatou tuua ai le faitau afe o tusi, tamaʻi tusi, ma polosiua ma tagata i le oganuu. E mafai ona maua tusi o le Ola e Faavavau, Filemu Moni, ma le Upu Moni, atoa ma isi, i aiga o le toatele o tagata o ē lē ni Molimau a Ieova. Ua aumaia e lenei se fanua tele o avanoa mo le amataina o suesuega faale-Tusi Paia fou.
4 Pe a faailoa mai e lē ona le fale ia i tatou faapea ua ia masani ma la tatou galuega pe ua maeʻa ona ia te ia a tatou lomiga, e ao ona tatou taʻu atu ia te ia lo tatou fiafia tele. (Vaai Reasoning, itulau 20.) Afai o ia te ia se lomiga, e mafai ona fautuaina ma le agalelei e alu e avane ae seʻi o tatou faasinoina atu nisi o vala tausaafia o le a aogā ia te ia ma lona aiga. Afai e maumauai le tali mai, ona tatou ofoina lea o se suesuega faale-Tusi Paia i le aiga.
5 O se faaeseesega o mea ua muamua atu e faitalia i tatou ona taulamua ma fesiligia pe ua i ai i lē ona le fale a tatou lomiga. Atonu e faapitoa ona uigā lenei i oganuu e tele lomiga tatou te tuua ai. A maeʻa se faatomuaga faaleuō, tatou te ono faapea atu ona o ā matou asiasiga e lē aunoa, e toatele tuaoi ua i ai nisi o ā matou lomiga. Tatou te naunau e vaaia ua maua e tagata aogā mai faamatalaga ua lomia ai. Ona tatou fesili lea i lē ona le fale pe faamata o ia te ia so o sa tatou lomiga. Afai o ia te ia, e mafai ona tatou siligia ma le agalelei pe mafai ona tatou tagai i ai ma ofo e faasino ia te ia le auala o loo tatou suesueina ai. O sina faataʻitaʻiga puupuu atonu e iʻu ai i se suesuega faale-Tusi Paia i le aiga. Afai na te leʻi maua a tatou lomiga, e mafai ona tatou taulimaina le ofo fou po o le fesili saʻo foi i ai pe manao lona aiga e fai fua se suesuega faale-Tusi Paia.
FAAAOGĀ LE FAAUTAUTA
6 Ona o le pisi o tagata, e atamai ona ia faautauta ma aua neʻi faaumiumia la tatou faafeiloaiga. Atonu e mafai ona faatapulaa nai uluai suesuega pe tusa o le 15 minute. Afai e iloa e lē ona le fale faapea o le a lē tele sona taimi e maimau ai, atonu o le a ia lotomalie e talia asiasiga faifai pea mai ia i tatou. A maeʻa loa ona faavae le suesuega ma ua tuputupu aʻe le naunau o lē ona le fale, ona faatoa faaalu lea o se taimi umi i le suesuega. E moni, o le a mananao nisi e suesue mo se taimi umi mai lava i le amataga.
7 O loo i ai ē pei ni mamoe i le fanua o ē manaomia la tatou fesoasoani, ma o le toatele o i latou o loo i ai ā tatou lomiga. E le taumatea, o nisi o loo mapuitiga ma feoi ona o mea inosia ua faia i le lalolagi i aso nei. (Eseki. 9:4) O se faaeaga ia i tatou e lē gata ia faasalalauina lomiga e uiga i le Malo o le a faapea ona foia mala o le fanau a tagata ae faapea foi i le ausia o ē loto faamaoni ma le upu moni e ala i suesuega faale-Tusi Paia.—Mata. 28:19, 20.