Pogai e Tatau ai ona E Manao e Tauaao se Suesuega faale-Tusi Paia
1 O se tasi o mea aupito sili ona tauia mo se Kerisiano o le faaaogāina lea e Ieova ia fesoasoani i se isi tagata e avea ma soʻo o Keriso. (Mata. 28:19, 20; 1 Kori. 3:6, 9) E mafai ona iu i le ola e faavavau, mo i latou o loo tatou fesoasoani i ai i lenei auala.
2 O le a atiina aʻe se faiā matuā vavalalata i le va o le faiaʻoga ma lē o loo aʻoaʻoina. O le tuputupu aʻe faaleagaga o le tagata aʻoga e moni o se puna o le olioli tele. (1 Tesa. 2:11, 19, 20) O lea, e tatau ai ona fai ma sini o Kerisiano taitasi ia aaoina a itiiti mai e tasi le suesuega faale-Tusi Paia i le aiga ma se isi e lē nofo i lona auaiga. Ioe, o le avega tauave a ulu o aiga taitasi ia aaoina se suesuega faale-Tusi Paia uigā e le aunoa ma lona lava aiga. I auaiga na e i ai tamā e lē talitonu, e manaomia e le tinā Kerisiano ona faia faatatauga talafeagai mo le suesueina o le Tusi Paia ma le fanau.
TATALO MO SUESUEGA
3 Ona ua tatou tuloto atu i lenei taimi o le iʻuga, e tatau i tagata uma ona faamuamua taumafaiga e aaoina suesuega faale-Tusi Paia uigā. O tatalo faisoo ia Ieova i lenei faatatau e faaalia ai lo tatou faanaunauga faamaoni e tauaao se suesuega faale-Tusi Paia. E folasia ai faapea ua tatou iloa e aafia ai le mataupu o le ola ma le oti. (Eseki. 33:7-9, 14-16) Tatou te mautinoa ai le faamanuiaga a Ieova ia tatou taumafaiga ma le loto faamaoni.—1 Ioane 5:14, 15.
4 Ina ia uigā i le faia o soʻo, e ao ona tatou sauniuni lelei. E matuā aogā foi ona matauina isi o ē tomai i le aaoina o suesuega faale-Tusi Paia. I masina o loo fotuai mai, o le a matou faaoo atu ni faufautuaga mai ovasia femalagaai ma isi o ē na taulau i le faia o soʻo. O se faasologa o mataupu o le a faamatilatila ai nisi o manatu faatino i le faapefea ona amata ma tauaaoina suesuega faale-Tusi Paia fuatele.
MATAUPU O LUMANAI
5 O ā nisi o ia manatu o le a faapea ona iloiloina i lomiga o lumanai o La Tatou Faiva o le Malo? O le a tatou talanoaina ai pe faapefea i tagata talaʻi eseese ma paeonia ona amataina suesuega faale-Tusi Paia ma o ā auala na latou faaaogā e paʻia ai loto o a latou tagata aʻoga. Tatou fetufaai ai foi faufautuaga i le atiina aʻe o le talisapaia mo le faalapotopotoga a Ieova ma galueaina ai se faanaunauga e saosaolaumea i le auaunaga i le fanua. O le a i ai foi faufautuaga i le faapefea ona faia le suesuega faale-Tusi Paia a lou lava aiga ia sili ona uigā ina ia atiina aʻe ai e a outou fanau se faiā vavalalata totino ma Ieova.
6 I le gasologa o tausaga faaleauaunaga e fa ua mavae, e 959,834 tagata na papatisoina i le lalolagi aoao, ma o le 135 o i latou na e mai i faapotopotoga i lalo o le Lala i Samoa i Sisifo. O le toatele anoanoai o ia tagata na ausia le tulaga papatiso faatasi ai ma le fesoasoani a se tasi na tauaaoina se suesuega faale-Tusi Paia ma i latou. O aofia i le Faamanatuga atoa ma a tatou tauaofiaga itumalo e faaalia ai e toatele atili ē e ono fesoasoani i ai e agai i luma i le papatisoga. I le faaauau pea o a tatou taumafaiga e amata ma tauaaoina suesuega faale-Tusi Paia ma i latou na, atonu e mafai ai ona tatou fesoasoani i le toatele nauā e avea ma soʻo ma oo ai ina olioli i le ola e faavavau.—1 Timo. 6:12, 19.