Ia Faamanatu le Faamanatuga ma le Lotofaafetai
1, 2. O ā māfuaaga e ao ai ona tatou faamanatu ma le lotofaafetai le togiola?
1 Ona o le usitai i le faatonuga a Iesu, o le a tauaofia ai Kerisiano i le lalolagi atoa pe a mavae le goto o le lā i le Aso Toonaʻi, Mati 22, 2008, e faamanatu le maliu o Iesu Keriso. (Luka 22:19; 1 Kori. 11:23-26) Ua tatou sauni e faia faapea ona o lo tatou matuā lotofaafetai i mea uma ua faataunuuina ona o lenā aso ua 1,975 nei tausaga talu ai. E ala i le tumau faamaoni atoatoa i se maliu tigā i se laau faaoosala, na faapaiaina ai e Iesu le suafa o lona Tamā, ma saunia ai se tali sili ona lelei i le taufaifai a Satani.—Iopu 1:11; Faata. 27:11.
2 O le toto maligi o Iesu ua faamaonia ai le feagaiga fou, ua mafai ai ona vaetamaina tagata lē lelei atoatoa e fai ma atalii o le Atua faatasi ai ma le faamoemoe e pule faatasi ma Keriso i lona Malo i le lagi. (Iere. 31:31-34; Mare. 14:24) E lē gata i lea, ua faaalia manino ai le loloto o le alofa o le Atua mo tagata e ala i le auina mai o lona Alo pele e fai ai le taulaga, e pei ona faamatala e Iesu lava ia iā Nikotemo.—Ioa. 3:16.
3. E faapefea ona maua aogā e i latou e auai i le Faamanatuga?
3 Valaaulia Isi: Sa fautuaina i La Tatou Faiva o le Malo o Ianuari le fai o se lisi o tagata tatou te iloa ma valaaulia tagata uma. Pe ua amata ona e valaauliaina tagata o i lau lisi? Po ua fai ni au faatulagaga ina ia auai atoatoa i le tauiviga lea e amata iā Mati 1 e valaaulia tagata i le Faamanatuga? O i latou o le a auai o le a faafofoga i faamatalaga mai le Tusi Paia lea e mafai ona atiaʻe ai le faatuatua i le togiola, lea e mafai ona taʻitaʻia atu ai i le ola e faavavau.—Roma 10:17.
4. Aiseā e ao ai ona tatou vave taunuu i le Faamanatuga?
4 O i latou uma e mafai ona faatasi mai e ao ona fuafua e vave taunuu a o leʻi amataina le sauniga ina ia faafeiloaʻi māfana atu iā i latou o le a talia mai lenei valaaulia faapitoa. Ona o le a toʻatele e auai i le Faamanatuga e tāua ai tele mo i tatou ona uaʻi faapitoa atu i ē fou mai o le a iai, atoa ai foʻi ma i latou o ē e auai mai i sauniga mai lea taimi i lea taimi.
5. E faapefea ona e saunia lou loto mo lenei sauniga?
5 Ia Saunia Lou Loto: O loo i le tusi Iloiloina o Tusitusiga Paia i Aso Taʻitasi—2008 ma le Kalena 2008 ia se faasologa o le faitau Tusi Paia mo le Faamanatuga e amata iā Mati 17. O le iloiloina o mea na tutupu i aso mulimuli o le soifuaga o Iesu i le lalolagi o le a fesoasoani iā te oe e saunia ai lou loto mo le faamanatuina o le Faamanatuga. (Esera 7:10) O le tatalo ma manatunatu loloto i nei mea na tutupu o loo i le Tusi Paia o le a faaloloto ai lou talisapaia o le alofa o Ieova ma lona Alo i le sauniaina o le togiola.—Sala. 143:5.
6. O le a faapefea ona tatou maua aogā pe a faateleina lo tatou lotofaafetai mo le togiola?
6 A o taulata mai le Faamanatuga, e ao ona tatou sauni ma fesoasoani i isi e sauni mo lenei sauniga tāua. O le manatua ma le lotofaafetai o le togiola o le a faamalosia ai la tatou faiā ma Ieova ma lona Alo. (2 Kori. 5:14, 15) O le a uunaʻia ai foʻi i tatou e faaaʻoaʻo iā i laʻua i le faaalia o le alofa faataulaga mo isi.—1 Ioa. 4:11.