“E Lē o Aʻu e Sese”

O LE Ā le tele o e faalogo ai i se tasi i aso nei o faapea mai, ‘Ou te faamalie atu. O aʻu e sese. O aʻu lava e tuuaʻia!’? O ia upu faigofie ma le faamaoni ua seāseā lava ona toe faalogoina. O le mea moni, i le tele lava o tulaga, e tusa lava pe taʻutino se sese, ae e faia taumafaiga uma e tuuaʻi ai se isi tagata po o ni tulaga e tau faaitiitia ai le matuiā o se mea na fai lea e faapea, sa lē mafai e lē ua sese ona puleaina.

O nisi ua oo lava ina latou tuuaʻia o latou genes (sela autū e pulea le fausaga o le tagata)! Ae pe mafai ea ona talitonuina lea tulaga? Ua fesiligia e le tusi Exploding the Gene Myth fuafuaga ma le aogā o nisi o vala o le sailiiliga i le sela autū e pulea le fausaga o le tagata. I le autaluina o le tusi e le tusitala Ausetalia o Bill Deane, ua iu ai i lenei faaiuga mafaufau loloto e faapea: “O se vaega o tagata o ē suesueina uiga o tagata, e foliga mai na amata talu ai nei ona talitonu faapea ua latou maua se faamaoniga saʻo e lagolago ai la latou filosofia e faapea, e leai se tasi e tatau ona tuuaʻia mo a latou gaoioiga: Atonu e faapea atu lē o loo tu mo se tagata tetee i luma o se faamasinoga, ‘Lau Afioga e, sa leai sana mea e mafai i ai—e māfua mai i ona sela autū lea e pulea le fausaga o le tagata.’”

E Lē o se Tuuaʻiga Fou

Ona o le vave tuputupu aʻe o lenei augatupulaga i se tulaga e pei ona taʻua e se tasi tusitala faapea o le tupulaga “e lē o aʻu,” o lenei tuuaʻia o isi e foliga mai ua faateleina lava. Peitai ua faaalia mai e faamaumauga o talafaasolopito, o le faasolo atu o le tautuuaʻi i isi, ma le faamolemolega e faapea “E lē o aʻu e tuuaʻia,” na amata mai lava i le amataga o le tagata. O le tali atu a Atamu ma Eva ina ua mavae le la uluai agasala, o le ʻaina o le fua o le laau na faasaina e le Atua, o se faataitaiga matilatila lea o le tautuuaʻi. Ua lipotia mai e le Kenese le talanoaga na tupu, i le muai fetalai atu o le Atua: “Ua e ʻai ea i le laau na ou fai atu ai ia te oe, e aua e te ʻai ai? Ona faapea mai lea o Atamu, O le fafine na e au mai ia te au, ua na au mai ia te au le fua o le laau, ona ou ʻai ai lea. Ona fetalai atu lea o Ieova le Atua i le fafine, Se a lena mea ua e faia? Ona tali mai lea o le fafine, Na faasese mai le gata ia te au, ona ou ʻai ai lea.”—Kenese 3:11-13.

Talu mai lava lena taimi, ua fafau aʻe ai loa e tagata ni ituaiga eseese o talitonuga ma suesue ni faamolemolega e lē masani ai e taʻumamāina ai i latou mai so o se mea lava e taʻusalaina ai a latou gaoioiga. O se tasi o na tulaga matilatila o le talitonuga faaanamua lea i iuga tuupoina. Sa taʻua e se fafine lotu Puta o lē e talitonu ma le faamaoni i le Karma e faapea: “Sa ou manatu e lē fetaui loʻu tigaina i se mea na ou ola mai ma aʻu ae ou te lē o iloaina. E tatau ona ou taliaina faapea o loʻu taunuuga na muai fuafuaina.” I le ola aʻe i le aʻoaʻoga e faapea ua uma ona faapolokalameina le olaga atoa e pei ona aʻoaʻoina e John Calvin, ua lauiloa ai foi le talitonuga i iuga tuupoina i Kerisinetoma. E masani lava ona taʻu atu e le aufailotu i tauaiga o loo faavauvau e faapea o le faalavelave faafuasei o le finagalo lena o le Atua. Ua faapena foi ona tuuaʻi e nisi o Kerisiano o loo saʻo faanaunauga o loto, ia Satani mo mea uma lava e sese i o latou olaga.

Nei la, ua amata ona tatou vaaia amioga e aunoa ma le faalogona taʻusalaina ua faataga ma ioeina e le tulafono ma le lautele. Ua tatou ola i se vaitaimi o le faatupulaia o aiā ma le faaitiitia o avega tauave a tagata taitoatasi.

O le sailiiliga i uiga o tagata ua maua ai faamaoniga taumatemate faasaienitisi ua manatu nisi e mafai ona avatu ai le saʻolotoga i uiga e amata mai i amioga lē mamā ma oo atu i le fasioti tagata. O le iuga lea o le faanaunau o tagata e tuuaʻia so o se mea po o so o se tasi nai lo le tuuaʻia o le tagata lava ia.

Tatou te manaomia ni tali i fesili e pei o nei: O le ā ua maua mai i suesuega faasaienisi? Pe ua pulea moni ea uiga faaletagata e o tatou sela autū ia e puleaina le fausaga o le tagata? Pe o pulea ea e uiga i totonu ma mea i fafo atu o tatou uiga? O le ā moni lava ua faaalia e faamaoniga?