O ai e Māfua Ai?

O LE uluai tagata, o Atamu, na amata ai. Ina ua uma ona ia faia le agasala, na ia faapea atu i le Atua: “O le fafine na e au mai ia te au, ua na au mai ia te au le fua o le laau, ona ou ʻai ai lea.” E tusa lava ua ia faapea atu: “E lē o aʻu na māfua ai!” Na faapena foi ona faia e le uluai fafine o Eva ina ua ia fai atu: “Na faasese mai le gata ia te au, ona ou ʻai ai lea.”—Kenese 3:12, 13.

O lea, ua mautu le faataitaiga na amataina i le faatoaga o Etena mo tagata, o le mumusu lea e talia āuga o ā latou lava gaoioiga. Pe ua tuuaia ea oe i lea tulaga? Pe a mapuna aʻe faafitauli, pe vave lava ona e tuuaia isi? Pe e te iloilo ea le tulaga ma vaai po o ai moni e māfua ai? I le olaga i aso taitasi, e faigofie ona lavea i le mailei o le tuuaia o isi mo ō tatou masei ma faapea ane, “E lē o aʻu na māfua ai!” Seʻi ō tatou iloilo ni tulaga masani ma vaai po o le ā e māfuli i ai nisi e faia. Ae sili atu ona tāua, seʻi manatunatu i le auala e te gaoioi ai i ia lava tulaga.

Faigata Tautupe

“E lē o aʻu na māfua ai—e tuuaia le tulaga tautamaoaiga, o tagata faipisinisi piopio, o le maualuga o le tau o le soifuaga,” atonu o tala ia a nisi pe a oo i faafitauli tetele tautupe. Ae pe ua tonu ea ona tuuaia nei tulaga? Atonu o tulaga lē mautonu na ala ai ona latou faia ni taumafaiga faapisinisi lē mautinoa po o ni faiga e ono faatupu ai le masalosalo i a te i latou. O nisi taimi, ua pulea i latou i le matapeapea na i lo le mafaufau tonu, ma iu ai ina oo atu tagata i ni faiga faapisinisi latou te lē malamalama i ai ma faatogafitia ai e tagata faipisinisi piopio. E galo i a i latou le alagaupu e faapea, “Afai e foliga mai ua ova le lelei ua faafaigata ai ona talitonu e moni, o lona uiga e lē lelei e pei ona foliga mai ai.” Latou te saili mo ni fautuaga latou te fia faalogo i ai, ae a oo mai faigata tautamaoaiga, ona latou taumafai lea e tuuaia se isi. O le mea e faanoanoa ai, ona i nisi taimi, e tupu foi lenei mea i totonu o le faapotopotoga Kerisiano.

O nisi ua maileia i teugātupe e faia faatogafiti pe faia e aunoa ma se faautauta, e pei o le faatauina o taimane o loo manatu o iai ae leai, po o le avatu o le lagolagosua tautupe i ni polokalama lauiloa o le televise ae na lē faataulauina, po o le lagolagoina o ni atinaʻe tau i fanua ma fale ae na iu ina gau. Atonu o le soona naunau i le ʻoa na faanenefu ai lo latou manatua o le fautuaga mai le Tusi Paia e faapea: “O e manao i le fia mauoa, e maua i latou i le faaosoosoga, ma le mailei, . . . ua tuʻia ai ua ati i latou e i latou i puapuaga e tele.”—1 Timoteo 6:9, 10.

O le lē pulea i le faaaluina o tupe, e mafai foi ona oo ai i pagatia tautupe. O nisi ua manatu e tatau ona latou oofu e pei o tagata i mekasini lauiloa, ia ō e faimalologa i nofoaga taugata, ia ʻaʻai i faleaiga e sili ona lelei, ma faatau mea fou e “faafiafia” ai—o nisi taavale faaopoopo mo tafaoga, o vaa, o mea pueata, ma laaupese. O le mea moni, e sau se taimi e maua ai nei mea e i latou o loo fuafua tatau tupe ma teu lelei. Ae o i latou o loo faanatinati ina ia maua ia mea, atonu e oo ai i ni aitalafu tetele. Afai o lea le tulaga, o ai e tuuaia? E mautinoa lava ua latou lē amanaia le fautuaga lelei o loo aumaia i le Faataoto 13:18: “O le mativa ma le faamāina, e i ai ia i le na te teena mea e aʻoaʻoina.”

Faanoanoaga Ona o Fanau

“O toeaina ua māfua ai ona tuua e laʻu fanau le upu moni,” atonu o le upu lea a nisi mātua. “E leʻi lava lo latou uaʻi mai i laʻu fanau.”

E moni, ua iai i toeaina le avega tauave e leoleo ai ma tausia le lafu, ae faapefea mātua? Pe o avea ea i latou ma faataitaiga i le faaalia o fua o le agaga o le Atua i ā latou feutagaiga uma? Pe sa faia pea lava pea le suesuega o le Tusi Paia a le aiga? Pe na faaalia ea e mātua le maelega i le auaunaga a Ieova ma fesoasoani i le fanau e sauniuni i ai? Pe na latou vaai lelei po o ai e aumea atu i ai ā latou fanau?

Ua faapea foi ona faigofie mo mātua ona fai mai e faatatau i meaaʻoga: “O faiaoga na māfua ai ona lē lelei laʻu tama i le aʻoga. Latou te lē fiafia i laʻu tama. Ma e lē maualuga le aʻoaʻoga a le aʻoga lena.” Ae pe sa talanoa lelei atu le matua i le aʻoga? Pe sa faaalia le naunau o le matua i mataupu ma mea o aʻoaʻoina e le tamaitiiti? Pe sa fai se faasologa o taimi e fai ai ana meaaʻoga ma tuuina atu i ai se fesoasoani ina ua manaomia? Pe lē o le faafitauli moni ea, o le manatu faaalia ma le paie o le tamaitiiti, po o le matua foi?

Na i lo le tuuaia e mātua o aʻoga, e sili atu ona lelei pe a latou gaoioi ma le mautinoa ina ia faamautinoa o loo iai i ā latou fanau se manatu saʻo ma ia faaaogā avanoa ua latou maua i le aʻoga e aʻoaʻoina ai.

Lē Taulau ona Tupu Olaola Faaleagaga

I nisi taimi tatou te faalogoina ai se tasi o faapea mai: “E tatau ona sili atu soʻu malosi faaleagaga, ae e lē o aʻu e māfua ai ona ou faapea. E lē lava le uaʻi mai o toeaina i a te aʻu. E leai ni aʻu uo. E lē o iai le agaga o Ieova i lenei faapotopotoga.” Ae i le taimi lava e tasi, o isi i le faapotopotoga, o loo iai ni ā latou uo, o loo fiafia, ma o loo lelei le agaigai i luma faaleagaga; ma o loo faamanuiaina le faapotopotoga i le tupu olaola ma manuia faaleagaga. O lea la, o le ā le mafuaaga o le iai i nisi o ia faafitauli?

E toaitiiti tagata e fia aumea vavalalata ma i latou o ē faaalia se uiga lē mautinoa ma faitio. O se laulaufaiva maai ma le faitio soo e matuā faalotovaivaia ai. Atonu o le a faatapulaa e nisi lo latou aumea faatasi ma tagata faapea ona latou te lē mananao e faavaivaia faaleagaga. Talu ai ua manatu lea tagata e faapea o se faaaliga lea o le lē fiafia atu o le faapotopotoga, ona amata ai lea ona fesuisuiai faapotopotoga e alu i ai. E pei lava ona feofeoai o lafumanu o Aferika i ona laufanua laugatasi e saili nisi laufanua o loo tele ai vao, ua faapena foi i nei Kerisiano “feofeoai” ona latou sailia pea se faapotopotoga e fiafia i ai. Maeu le sili atu o lo latou fiafia pe ana latou vaavaai mo lelei o isi tagata ma taumafai foi i latou e faaalia atili fua o le agaga o le Atua i ō latou lava olaga!—Kalatia 5:22, 23.

O nisi ua latou faia faapea e ala i lo latou matuā taumafai e talanoa atu i tagata eseese i sauniga taitasi i le Maota o le Malo ma faamālō atu ma le faamaoni i se mea lelei i lea tagata. Atonu o lana fanau e amiolelei, le auai e lē aunoa i sauniga, o tali lava saunia i le suesuega o Le Olomatamata, le faaavanoaina o lona fale mo se Suesuega Tautusi a le Faapotopotoga ma feiloaiga mo le auaunaga i le fanua, ma isi lava mea faapena. I lou taumafai e aua le gata lau vaai i uiga lē lelei atoatoa, o le a e iloa ai ni uiga lelei i ou uso ma tuafāfine Kerisiano. O le a avea ai oe o sē e pele i a i latou, ma o le a tele ai ni au uo faamaoni.

Le Faamolemolega Sili

“O le finagalo o le Atua.” “E māfua mai lava i le Tiapolo.” Atonu o le faamolemolega sili, o le tuuaia lea o le Atua po o le Tiapolo mo mea tatou te lē taulau ai. E moni atonu o loo iai se aafiaga o nisi mea e tutupu i ō tatou olaga ona o le Atua po o Satani. Ae peitai, ua talitonu nisi e faapea o mea uma lava i ō latou olaga, pe lelei pe leaga, o le iuga lea o le faalaa mai o le Atua po o le faalavelave mai foi o Satani. E peiseai o mea uma lava e tutupu i a i latou, e lē o ni āuga o ā latou lava gaoioiga. “Afai e finagalo le Atua ou te maua le taavale fou le la, o le a mafai lava ona ia faia ina ia ou maua.”

E masani lava i tagata faapea ona soona fai ō latou olaga, ua faia ā latou filifiliga tautupe, po o isi foi mataupu, ma le manatu faapea o le a laveaiina i latou e le Atua. Afai e iu i faigata ā latou gaoioiga lē faautauta, i le itu tautamaoaiga pe ese foi, ona latou tuuaia lea o le Tiapolo. O le soona faia o se mea e aunoa ma le muai ‘fuafua,’ ona tuuaia lea o Satani ona o le lē taulau, pe sili atu foi ona leaga, o le faatalitalia lea o Ieova e faalaa ane, e lē gata ina avea o le osovale, ae e lē talafeagai foi ma le Tusi Paia.—Luka 14:28, 29.

Na taumafai Satani e uunaia Iesu e manatu faapea e aunoa ma se manatu mamafa i āuga o Ana gaoioiga. Ua faapea mai le Mataio 4:5-7 e faatatau i le tofotofoga lona lua: “Ona ave ai lea o ia e le tiapolo i le aai paia, ua ia faatuina foi ia te ia i le tumutumu o le malumalu, ona fai mai lea o ia ia te ia, ‘Afai o oe o le Alo o le Atua, oso ia oe i lalō; auā ua tusia, E poloai o ia i ana agelu ia te oe, latou te ave ia te oe i o latou lima, neʻi tuʻia lou vae i se maa.’” Na silafia e Iesu, e lē mafai ona ia faatalitalia Ieova e faalaa ane pe afai na te faia se gaoioiga e manino mai e faavalevalea pe oo foi ina pule ai i lona ola. O lea na ia tali atu ai e faapea: “Ua tusia foi, Aua e te tofotofo i le Alii lou Atua.”

O ē māfuli atu i le tuuaia o le Tiapolo po o le Atua mo ā latou lava gaoioiga lē faautauta, ua pei lava o ē talitonu i le sailiili i fetu, ua latou avea fetu e sui aʻi le Atua po o le Tiapolo. Ona o lo latou talitonu atoatoa e faapea o mea uma e tutupu e lē mafai ona latou pulea, ua galo ai i a i latou le mataupu silisili faigofie o loo taʻua i le Kalatia 6:7: “O le mea e luluina e le tagata, o le mea lava lea e seleseleina mai ai e ia.”

Faafetaiaia Mea Moni

E leai se tasi e lē ioe o loo tatou ola i se lalolagi lē lelei atoatoa. Ua moni faafitauli o loo talanoaina. O le a faamatapotoina i tatou e tagata i tulaga tautupe. O le a iai ni pule lē tonu. Atonu e lē lelei aafiaga i ā tatou fanau, mai ē e masani ai. E manaomia ona faaleleia atili nisi faiaoga ma nisi aʻoga. E iai nisi taimi e tatau ona matuā faaalia ai e toeaina le alofa ma le naunau atu. Ae e tatau ona tatou ioeina āuga o le lē lelei atoatoa ma e pei ona fai mai le Tusi Paia, “o le lalolagi uma o loo nofo toilalo i loo leaga.” Ua lē talafeagai ai la ona manatu e faapea o le a solosolo lelei ō tatou olaga i taimi uma.—1 Ioane 5:19.

E lē gata i lea, e tatau ona tatou iloa ō tatou lē lelei atoatoa ma tapulaa, ma iloa ai o le tele lava o taimi, ua māfua ō tatou faafitauli ona o lo tatou lava valea. Na lapatai atu Paulo i Kerisiano i Roma e faapea: “Ou te fai atu ai ia te outou uma, aua le faasili le manatu o se tasi i le mea ua tatau ona manatu ai.” (Roma 12:3) Ua tutusa le malosi o lena fautuaga mo i tatou i aso nei. Pe afai e tupu se tulaga lē manuia i ō tatou olaga, tatou te lē faataitai loa i ō tatou tuaa o Atamu ma Eva ma faapea mai: “E lē o aʻu na māfua ai!” Na i lo lena, o le a tatou fesili ifo i a i tatou lava, ‘Atonu o le ā se isi mea sa tatau ona ou faia semanū e alofia ai lenei taunuuga faanoanoa? Pe na ou faaalia ea le fuafua lelei e tusa ai o lea mataupu ma sailia fautuaga mai se puna atamai? Pe na ou manatu ea ia lē tuuaia le isi tagata, po o isi o loo aafia ai, ma ou faaaloalogia ai o ia, po o i latou foi?’

Afai tatou te mulimuli i mataupu silisili faa-Kerisiano ma faaalia le mafaufau lelei, o le a faateleina ā tatou uo ma faaitiitia ō tatou faafitauli. O le tele o faafitauli e lē tatau ona tutupu i ō tatou olaga o le a foia. O le a tatou maua le olioli i ā tatou feutagaiga ma isi ma lē oia ai i le fesili lea: “O ai e māfua ai?”

[Ata i le itulau 28]

E tele mea e mafai ona faia e mātua e fesoasoani ai i ā latou fanau ina ia olaola lelei faaleagaga