Faalaeiau Isi e Faitau Le Olomatamata
1 Ia Aperila ma Me, tatou te mananao ai e faalaeiau ē alolofa i le upu moni ia faitau e lē aunoa Le Olomatamata O mea tutupu ia i tatou lava ua faatalitonuina ai i tatou faapea, mai mekasini uma lava ua lomia i aso nei, ua na o lea lava o loo faasoaina meaʻai faaleagaga matuā tāua ua manaomia e i latou o ē o loo ōi ma mapu i tiga i tulaga faanoanoa o le lalolagi.—Eseki. 9:4.
2 Ua fesoasoani Le Olomatamata ia i tatou ia malamalama i le valoaga o le Tusi Paia lea ua faamaonia ai o loo tatou ola i le taimi o le iʻuga ma ua lē o toe mamao ona aumaia lea e le Malo o le Atua le filemu i le lalolagi. O lo tatou manatu mamafa moni i ola o isi ua uunaia ai i tatou e fetufaaʻi lenei faamoemoe ofoofogia ma i latou. Ma ua faalaeiauina i tatou i le matauina o le toatele o tagata loto faamaoni ua aoaoina mai mo le faaolataga.—Ioane 10:16.
3 Ua faatomua i le lomiga o Le Olomatamata o Aperila 1, 1991, le fesili “O Lē Fea Atua E te Tapuaia?” A maeʻa ona talanoaina le mea moni faapea ua lalata mai le filemu i le lalolagi, ona faailoa lea i lē ona le fale le tāua o le avatu o le tapuaiga e talia i le Atua ina ia mafai ai ona tagaʻi i lenei taimi o le filemu. E fesoasoani lea mataupu ia i tatou e faamautinoa ai tatou te lē tosina e tapuai i nisi atua, e pei o tupe, na i lo le Atua moni. O loo talanoaina i Le Olomatamata o Aperila 15, 1991, Peteleema ma le Kirisimasi. E toatele nauā tagata i aso nei ua na ona manatu ia Iesu o se pepe, peitai ua avea nei o ia ma tupu e sili ona malosi i le Malo o le Atua o le a faapea ona aumaia ia i tatou le filemu i le lalolagi. E mafai ona sosoo lelei ia mataupu ma le Mataupu mo Talanoaga o loo iai, “Lalolagi Filemu, ua Lalata mai Ea?” Ina ia mautinoa ua naunau faamaoni lē ona le fale i le tala lelei, faatosina o ia i se talanoaga faale-Tusi Paia mafana ma faaleuo. E manaomia ai i lenei mea le sauniuni mamao ma le nofo uta e faailoa pe faapefea i mataupu o i mekasini fou ona fesoasoani i lē ona le fale e faalautele ai lona malamalamaga i le mataupu o loo talanoaina.
4 Tatou te lē naunau e tau ina auina atu mekasini i so o se tasi o le a ia tuuina mai ia i tatou lona tuatusi mo le meli. Manatua o lo tatou tofiga o le talaʻia o le tala lelei ma le faia o soʻo. (Mata. 24:14; 28:19, 20) Afai e fiafia lea tagata e faitau na o ni nai mataupu patino mai lea taimi i lea taimi, atonu e sili ai ona tusia lona igoa i lau ala mekasini ma asiasi totino atu pea i ai. O lau fesootaiga faifai pea ma lea tagata o le a faaavanoaina ai oe e atiina aʻe le naunau ma mulimuli ane ai faamautinoa le taimi talafeagai ua fuafua na te maua ai Le Olomatamata e ala atu i le meli.
5 O le a ofoina mai e Aperila ma Me le tele o avanoa e faasalalauina ai le tala lelei o le Malo o Ieova i lea fale ma lea fale atoa ma talanoaga lē fuafuaina ma tagata tatou te feiloai. E mafai ona tatou mautinoa faapea o le a faaauau ona faamanuia e Ieova a tatou taumafaiga maelega e sailia ma saunia ai le fafagaina faaleagaga ua manaomia mo ē agamalu i la tatou oganuu.