Tauivi ina ia Maua Ē Fia Faalogo
1 E toatele tagata tatou te feiloai i ai i la tatou faiva mai lea fale i lea fale e lē o mafaufau i ni mea faaleagaga. Atonu ua alu uma lo latou taimi i o latou aiga, o faafitauli tau le tamaoaiga, po o o latou lava faafitauli totino. Ina ia amata se talanoaga, e sili ona lelei le talanoa i mataupu e masani ona fiafia uma i ai tagata o lena vaipanoa. E mafai ona faia ni fesili e faatupu ai le naunau, auā o le a aofia ai le tagata e ana le fale i le talanoaga. E sili ona aogā le faia o fesili faatupu manatu ae lē faamaasiasiina ai tagata.
2 E te ono maua se tagata e fia faalogo e ala i le faaaogā o se faafeiloaiga e pei o lenei:
◼ “Talofa. O loʻu igoa o _____. Ou te nofo i inei lava i lo tatou alalafaga. O le toatele o tagata sa ou talanoa i ai i lenei taeao o loo popole i le [ia taʻua se tala po o se mea e leʻi leva ona tupu i le alalafaga, o loo popole uma i ai ona tagata]. Pe e te manatu ea o le finagalo lea o le Atua ia faapenei le lalolagi?” Faatali mo se tali. O le taimi loa lena e ono faatomua atu ai le sāvali o le Olaga i se Lalolagi Fou Filemu. Ia talatalanoa puupuu i le ata o loo i le itulau 1 ma le faamatalaga i palakalafa 1-3 pe a lava le taimi. Pe afai ua tuputupu aʻe le naunau fiafia, e mafai ona faailoa atu le tusi o le Ola e Faavavau. E mafai ona e tatai atu manatu i le Salamo 37:9, 10 e pei ona sii mai i le itulau e 157 ma faitau atu i ai le manatu mai le tusi. Pe a faaaogā ata i itulau e 156-157, ia faamatala tulaga amiotonu o le a iai i le lalolagi aoao pe a aveesea le amio leaga.
3 Ia nofo sauni pea e ofo atu Le Olomatamata, le Watchtower ma le Awake! Ua nofo popole tagata i vaipanoa uma i le leaga o tulaga tau amio. A o e faitauina le Awake! o Aokuso 8, ia fili ni manatu tāua e te iloa o le a faagaeeina ai le naunau o tagata i lau oganuu. Na i lo le talanoa umi ai pea i na tulaga leaga o loo iai, ia tatai manatu o lē ona le fale i le mataupu “The Perfect Moral Guide” (“Le Taiala Sili ona Lelei o Amioga”) ma talanoa mautinoa atu i aogā o le utagiaina o fautuaga a le Afioga a le Atua. I se isi taimi a o faagasolo le masina, pe a faatomua atu le Awake! o Aokuso 22, ia tatai manatu i le mataupu “When All Races Live Together in Peace” (“Pe a Oo ina Nonofo Faatasi Ituaiga Uma o Tagata i le Filemu”). Ia faamatilatila le fautuaga a le Tusi Paia mo le mauaina o ni faiā filemu i le va o ituaiga o tagata. O lomiga fou ma lomiga tuai o Le Olomatamata, le Watchtower ma le Awake! e mafai ona faatomua atu i so o se taimi e faaopoopo i aso faapitoa na ua uma ona faataatitia mo le ofoina o mekasini.
4 Ia manatua, o lo tatou sini ia faagaee le naunau fiafia i le feau o le Malo. Ina ia mafai ona maua sē e fia faalogo, muamua e tatau ona faauai mai manatu o lē ona le fale ma ia faagaeeina ona mafaufauga. O le a faapogaia e lenei itu tagata e pei ni mamoe ina ia fia faalogo “i mea e fetalaia mai e Ieova le Atua” e faatatau i lana fuafuaga mo tagata.—Sala. 85:8.