Fesoasoani i Isi ia Latou “Tausi i Mea ua Tusia”
1 E lē lava le na ona “faalogo” atu i upu o le Tusi Paia. Ina ia mauaina atoatoa mai ai aogā, e tatau i se tasi ona “tausi” i mea o loo tusia ai. (Faaa. 1:3) O le tuua o lomiga ua na o se laasaga muamua lea e agaʻi atu i le faia o soo. Pe a tatou maua tagata loto fiafia o ē e naunau e faalogo, e tatau ona tatou toe foi vave atu ina ia fesoasoani ia i latou ina ia aʻoaʻo atili. O ā ni mea e mafai ona tatou talanoa i ai ia tatou toe asiga?
2 Afai sa e talanoa i se mataupu patino i le tusi “Talavou” i lau uluai asiasiga, atonu e te filifili e amataina lau talanoaga i le auala lenei:
◼ “Talu ai, sa ta talanoa e uiga i [taʻua le mataupu na lua talanoaina] ma le auala ua aafia ai tagata talavou i lenei mea. I le asō, ou te fia faailoa atu ai ia te oe mai le Tusi Paia le auala lenei e mafai ai e tagata talavou ona foia lenei faafitauli.” Ia e filia mai se mau mai le mataupu, ma faaali atu i ai le auala e mafai ai ona fesoasoani le mau i tagata talavou, pe afai latou te faatinoina. Pe afai e mautinoa lana tali mai, ona e faamatalaina atili atu lea i ai o le mataupu.
3 Afai sa lua talanoaina le Malo o le Atua i lau uluai asiasiga, e mafai ona e faaauau e ala i lou fesili atu faapenei:
◼ “I lou manatu, o le ā le ituaiga o pulega e manaomia ina ia faamalieina ai manaoga uma lava o tagata? [Faatali mo se tali. Faitau i ai le Ieremia 10:23.] E pei ona e faafofoga mai i le mau, e leʻi fuafuaina lava e le Atua le tagata na te puleaina o ia lava. O taumafaiga ina ia faia lena mea e aunoa ma le fesoasoani a le Atua, o le mafuaaga lena o le tele o o tatou faafitauli. O le Malo o le Atua, ua na o lea lava le pulega e mafai ai ona sauniunia mea o loo tatou manaomia.” Suʻe i le itulau e 230 o le tusi Reasoning, ma talanoa i mau na e i lalo o le uluai ulutala. Faaauau le talanoaga e ala i le faamatala o le pogai e mafai ai ona tuu lo tatou faatuatua atoatoa i le Atua.
4 Ia pe e te manao foi e faaaogā le faaupuga lenei e amata ai se talanoaga faale-Tusi Paia:
◼ “I le taimi ua mavae, na ta talanoa ai i le auala o le a faia ai e le Atua lenei lalolagi ina ia avea ma parataiso. O le a olioli tagata i nei tulaga pe a oo ina faia le finagalo o le Atua i lenei lalolagi e pei ona faia i le lagi. Ae peitai, ua matataʻu nisi e faapea ina neʻi toe oo mai tulaga leaga. O le a lē mafai ona faia o lena mea auā o tagata amio leaga uma lava, o le a lē toe i ai i latou.” Faitau le Salamo 37:10, 11. Ia e valaaulia lē ona le fale ina ia faaaogā la tatou polokalama o suesuega faale-Tusi Paia e aʻoaʻo atili ai.
5 Afai na e tuua le sāvali “Olaga i se Lalolagi Fou Filemu,” ia faasino atu i le ata i luma ona faitau lea o le palakalafa 1 i lalo o le ulutala “Olaga i le Lalolagi Fou a le Atua.” Ona e faapea atu lea:
◼ “Afai tatou te mananao e ola ai i se lalolagi faapena, e i ai se mea tāua e tatau ona tatou faia.” Faitau le palakalafa mulimuli ma ofo le tusi Talavou.
6 Talu ai o lo tatou sini o le amataina o ni suesuega faale-Tusi Paia, e manaomia ai ona tatou faia ni toe asiga uigā. Fai se faasologa o le taimi mo na toe asiga, ma ia sauniuni lelei. O le auala lenei e mafai ai ona tatou fesoasoani moni atu i tagata loto faamaoni.—Faaa. 22:6, 7.