Amataina o Suesuega Faale-Tusi Paia i Aiga
1 O se tasi o mea e sili ona tauia ma faamalieina mo Kerisiano moni, o le aʻoaʻoina lea o se tasi i le upu moni e ala i se suesuega faale-Tusi Paia i le aiga. Ae atonu e lē o olioli nisi i lenei vala faaoaina o le faiva, ona e manatu latou te lē mafai ona amata ma faia se suesuega faale-Tusi Paia. E toatele tagata talaʻi ma paeonia iloga sa iai foi lena lagona i se taimi. Ae o le faalagolago ia Ieova ma faatatauina manatu mai La Tatou Faiva o le Malo, ua latou iloa ai le auala e amata ai suesuega faale-Tusi Paia, ma ua tele ai lo latou olioli i le faiva. E mafai foi ona ia te oe lea lava sini.
2 Faaaogā le Auala Tuusao ma Sāvali: O se auala e sili ona faigofie e amata ai se suesuega, o le auala tuusao. E pau le mea e manaomia e nisi tagata o se valaaulia mafana lea e suesueina le Tusi Paia. E mafaia lenei mea i le na ona fesili lava i lē ona le fale: “Pe e te finagalo e faia sau suesuega faale-Tusi Paia i lou aiga ma faateleina ai lou poto i le Tusi Paia, ma lou iloa i le fuafuaga a le Atua mo le lalolagi?” Po o lou fai atu foi i lē ona le fale, e te fiafia e faataitai le auala e faia ai se suesuega faale-Tusi Paia i le aiga. E manino lava o le a teena e le toatele lenei ofo, ae manatu i lou olioli pe a maua se tasi na te taliaina!
3 O le isi auala e amata ai se suesuega faale-Tusi Paia, o le faaaogā lea o se tasi o a tatou sāvali. E ui ina laiti, ae ua avatu ai se feau e malosi ma mautinoa. E mafai faapefea ona amata se suesuega i se sāvali? E ala i le tuuina atu i lē ona le fale o se sāvali e te talitonu o le a ia naunau i ai. Ona e muai valaaulia loa lea o lē ona le fale e faitau mai le uluai palakalafa. Ia suʻe i mau o loo sii mai, ma talanoa i le auala o loo faatatauina ai i le mataupu. I le uluai asiasiga, atonu e te talanoaina se palakalafa e tasi pe lua. A o faasolo ina talisapaia e lē ona le fale le manatu faapea o loo ia aʻoaʻoina mea matagofie mai le Tusi Paia, atonu o le a mafai ai ona tele sou taimi e faaalu i a oulua talanoaga.
4 Faaaogā Tau Lava o le Tusi Paia: O nisi taimi, e malie ai le tagata e talanoa i le Tusi Paia, ae foliga e lē fia talia se suesuega aloaia, po o le faaaogā o sa tatou lomiga. E mafai lava ona e amata ma faia se suesuega faale-Tusi Paia i le saunia lea o ni talanoaga faale-Tusi Paia e faavae i mataupu o le tusi Ola e Faavavau po o le Reasoning, ae faaaogā na o le Tusi Paia pe a asiasi atu i le tagata fiafia. O na talanoaga atonu e 15 pe 20 minute le uumi pe sili atu, e fuafua i tulaga o loo iai. Afai e faifai pea ma o loo faia i se auala faasolosolo le aʻoaʻoina o upu moni o le Tusi Paia, o lena la ua e amataina se suesuega faale-Tusi Paia, ma ua mafai loa ona lipoti o se suesuega. Pe a oo i le taimi ua talafeagai, ona faailoa atu lea o le tusi Ola e Faavavau, ma amata aloaia ai se suesuega.
5 E lē gata i le maua o avanoa i le faiva i le fanua, ae po o e taumafai e amata ni suesuega faale-Tusi Paia ma ou tuaoi, o aumea, po o tagata o lou aiga? Pe sa faia muamua ea i ni taimi ua teʻa? Pe sa e toe taumafai i se taimi e leʻi mamao atu? Afai sa leʻi aogā se tasi o auala, po o e manatunatu ea e faaaogā se isi auala?
6 E mafai ona manuia lou amataina o ni suesuega pe afai e te faatatauina manatu ua tuuina atu, ia maelega i le auaunaga i le fanua, ma ia faalagolago ia Ieova mo lana faamanuiaga. Aua lava neʻi manatu māmā i le malosi o le upu moni ma le fesoasoani e foai mai e Ieova. Tau ina ia e faateleina lou olioli i le faiva e ala i le amataina ma le faia o ni suesuega faale-Tusi Paia i aiga.