Ia Tele le Lūlū ae Ia Faautauta
1 Ua iloa uma lava e faifaatoaga, afai e tele lana lūlū, o le a ono tele foi lana seleselega, ae a tau leai sana lūlū, e mautinoa foi o le a lē tele sana seleselega. (2 Kori. 9:6) E faaeteete tele le au faifaatoaga ina ia lē faamaumauina fatu, i le soona lūlū lea i vaega e lē mafai ona ola aʻe ai. E faapena foi le faautauta e manaomia pe a tatou ofoina a tatou lomiga i le fanua. Tatou te faanaunau e tuu atu lomiga ia i latou o ē e fia faitau i ai. Tatou te mananao e avatu le avanoa i ē ua tatau i ai, ia latou iloa ai le alofa tunoa o Ieova ma le faamoemoe o le Malo.
2 Po ua amata ea ona fau au mekasini, o polosiua, ma isi lomiga i se fata i le fale, ae semanū e mafai ona faaaogā e avatu i ē ua tatau i ai o loo i lau oganuu, le poto o le upu moni? (Faatusatusa i le Mataio 25:25.) Po o iai ea ni taimi e te tau faatalatu ai i le ofoina atu o mekasini po o isi lomiga i lau uluai asiasiga, ona e faafaigata ia te oe ona taʻu atu le auala o loo lagolagoina ai le galuega talaʻi o le Malo? Ua iloa e tagata talaʻi ua poto masani, le tali lelei mai o ē ona fale, i le na o sina faamatalaga puupuu lava e faigofie ae tuusao, pe a taʻuina atu ia i latou le auala o loo taulimaina ai foai faameaalofa i le galuega o le Malo.
3 E te ono faapea atu:
◼ “Ai o e tau mānatu pe faapefea ona matou ofoina a matou lomiga e aunoa ma se totogi. O se vaega o le galuega tau aʻoaʻoga i le lalolagi atoa, o loo lagolagoina e foai tauofo. Afai la e te finagalo e fai sina au foai faameaalofa i le galuega, o le a ou fiafia tele e taliaina.”
4 E toatele tagata e ona fale o le a fesili mai i le tau o lomiga.
E ono mafai ona e tali atu:
◼ “E leai se tau o le lomiga auā o loo lagolagoina la matou galuega e foai tauofo. Afai e te fia faia sina foai i lenei aso, o le a matou fiafia e faamautinoa ua faaaogāina mo le galuega talaʻi i le lalolagi aoao.”
Po o lou ono fai atu foi:
◼ “Ua matou ofoina atu a matou lomiga i ē uma lava e naunau e fia aʻoaʻoina atili le Tusi Paia. Afai e te fia faia sina foai i lenei galuega i le lalolagi aoao, o le a ou fiafia e faaooina atu mo oe.”
5 I le galuega mekasini, ua faaali atu ai e nisi tagata talaʻi le itulau i totonu o se mekasini ma faapea atu:
◼ “E pei ona e tagai mai i inei, o loo lagolagoina la matou galuega e foai tauofo. Afai e te fia faia sina foai e fesoasoani ai i lenei galuega, ua ou sauni e taulimaina lea tulaga.”
O se isi lenei o faamatalaga faigofie:
◼ “E ui lava ina ofoina a matou lomiga e aunoa ma se tau, ae matou te taliaina ni foai talafeagai mo la matou galuega i le lalolagi aoao.”
6 Ia aua lava neʻi o tatou faatalatu mai le luluina o fatu o le Malo ona o lo tatou matamuli e taʻu atu le auala o loo faatupeina ai le galuega. Ae i le taimi lava e tasi, e manaomia le faautauta ina ia lē faamaumauina ai a tatou lomiga i ‘eleele papa.’ (Mare. 4:5, 6, 16, 17) O i latou e talisapaia le tala lelei o loo tatou avatua, ua fiafia e mauaina le avanoa e faimeaalofa ai i lona lagolagoina faaletino.—Faatusatusa i le Mataio 10:42.