Ia Fesoasoani Alofa i Ē Faaalia le Naunau
1 Ina ua taitaia e le agelu a Ieova le soo o Filipo, i se tagata Aitiope o lē sa matuā naunau i le upu moni o le Afioga a le Atua, ona fesoasoani alofa atu lea o le soo i lea tagata ia malamalama i mea sa ia faitauina. (Galu. 8:26-39) Pe tatou te faia ea ni taumafaiga faapitoa e fesoasoani ai i a i latou o ē ua naunau? E tatau, auā o lo tatou tofiga mai le Atua e aofia ai le faia o soo. (Mata. 28:19, 20) O le ā e mafai ona tatou faia e fesoasoani atu ai i a i latou?
2 Ia tuu ese se taimi i vaiaso taitasi mo le faia o asiga. Ia fuafua e toe asia i latou na naunau, ma taumafai e sosoo le talanoaga faale-Tusi Paia lea na amata i lau uluai asiasiga. Ia manatua pea le sini o le amataina o se suesuega faale-Tusi Paia. Ia foi atu e lē aunoa e ofo i ai lomiga fou o Le Olomatamata, le Watchtower ma le Awake! Pe a iloa le naunau moni mai, e mafai loa ona e ofo atu i ai tusiga.
3 Afai i lau uluai asiasiga sa e talanoaina ai le tāua o le Tusi Paia, e mafai la ona e toe tatao le talanoaga, i le faaaogā o se manatu mai le itulau e 66 o le tusi “Reasoning” ma fai atu faapenei:
◼ “Ua manatu nisi e lē aogā fautuaga a le Tusi Paia i lo tatou lalolagi i aso nei. O le ā sou taofi i ai? [Faataga se tali mai.] Pe e te lē ioe, o se tusi o loo aumaia ai ni fautuaga lelei ua mafai ai ona tatou maua ni aiga fiafia, o se tusi aogā lena? [Faataga se manatu.] Ua suia manatu ma faiga ua aafia ai le olaga i le aiga, ma e lē o lelei iuga ua tatou vaaia i aso nei. Ae o aiga latou te faatatauina mea o loo taʻua i le Tusi Paia e mautinoa le mautu ma le fiafia.” Faitau le Kolose 3:18-21. Ofo atu le sāvali, Le Pogai e Mafai ai ona E Faatuatua i le Tusi Paia, ma faamatala atu e faapea, o loo tatou ofoina le faia o se suesuega faale-Tusi Paia e aunoa ma se totogi.
4 E mafai ona e amataina se talanoaga e uiga i le tulaga o ē ua maliliu i le auala lenei:
◼ “E tele ni faamatalaga e uiga i le tulaga o ē ua maliliu. E te manatu o le ā e tupu i a i tatou pe a tatou maliliu? [Faataga se tali mai.] O le tele o tapuaiga ua latou aʻoaʻoina e faapea, e faaauau pea ona tatou feola i nisi tino. Ua toatele e maofa i le aʻoaʻoina o mea o loo fai mai ai le Tusi Paia i lenei mataupu. [Faitau le Failauga 9:5.] E ui lava ua lē o toe iloa e ē ua maliliu se mea, ae ua lē o faagaloina i latou. Ua folafolaina e le Atua le toe faatutuina mai o i latou i le ola, i le pulega a lona Malo.” Faasino atu i Le Olomatamata o Oketopa 15, 1994, po o le itulau e 162 i le tusi Ola e Faavavau, ma talanoa ai i mau ma ata. Ia fuafua e toe asia, ma se fuafuaga ina ia amata se suesuega faale-Tusi Paia.
5 Pe a e manao e faamatala atili le manatu faa-Kerisiano i tulaga o faiga taua i le va o atunuu, atonu e te manao e fai atu se faamatalaga e pei o lenei:
◼ “Ua talitonu nisi o le tau ua na o lea le auala e foia ai fefinauaiga. O le ā sou manatu i ai? [Faataga se tali mai.] Ua faaalia i le Tusi Paia le finagalo o le Atua ina ia nonofo faatasi tagata uma i le filemu. [Faitau le Roma 12:17, 18.] O le mea moni lava lena o le a iai i le lalolagi aoao i le pulega a le Malo o le Atua.” Ia faasino atu i le polosiua, Po o Silasila Alofa mai ea le Atua ia i Tatou?, i le itulau e 25-26. Taʻu atu i ai e mafai ona e toe foi atu e faamatala le mafuaaga na aʻoaʻo ai e Iesu i tatou e tatalo atu mo le ‘finagalo o le Atua ina ia faia i le lalolagi e pei ona faia i le lagi.’—Mata. 6:10.
6 Sa iloa e le eunuka Aitiope lona lē malamalama seʻi vaganā ua iai se tasi e taitaiina o ia. (Galu. 8:31) Ona fesoasoani alofa lea i ai o Filipo. E mafai ona tatou alolofa moni mo isi e ala i le fesoasoani i a i latou i le auala lava lea.