Ia Faatomua i se Auala Uigā le Tusi Ola e Faavavau
1 Sa tomai tele Iesu i lona faaaogaina o upu tomua. Sa ia silafia upu e fai atu e faagaee ai le naunau. I se tasi taimi, na ia amataina ai se talanoaga ma se fafine Samaria i lona talosaga atu lava mo sina vai e inu ai. Sa vave ona uai atu le mafaufau o le fafine i lenei mea, auā sa “leai ni mea e feaveai a Iutaia ma Samaria.” O le talanoaga lea na faia mulimuli ane, na iu ina fesoasoani ai i le fafine ma le toatele o isi tagata Iutaia e avea ma tagata talitonu. (Ioa. 4:7-9, 41) E mafai ona tatou aʻoaʻoina se mea mai i lana faaaoaoga.
2 Pe a sauniuni e ofo le tusi Ola e Faavavau, fesili ifo i a te oe lava, ‘O ā mea o popole i ai tagata o laʻu oganuu i le taimi nei? O le ā se mea e talafeagai ma se talavou, se tagata matua, se tane, po o se avā?’ E mafai ona e sauniunia ni nai faatomuaga ma fuafua e faaaogā se faatomuaga e sili ona fetaui mo le tulaga.
3 Talu ai ua faagasolo ina matuā leaga le olaga faaleaiga ma ua avea ma popolega o le toatele, e mafai ona e faapea atu:
◼ “O omiga o le olaga i aso faisoo, ua oo ai mea faigata i aiga i aso nei. O fea e mafai ona latou maua ai se fesoasoani? [Faatali mo se tali.] E mafai ona avea le Tusi Paia ma fesoasoani moni i a i tatou. [Faitau le 2 Timoteo 3:16, 17.] Ua ofo mai e le Tusi Paia taiala aogā e mafai ona fesoasoani i aiga ia faasaoina. Mātau le mea o taʻua i le palakalafa e 3, itulau e 238 o lenei lomiga, E Mafai ona E Ola e Faavavau i Parataiso i le Lalolagi.” Faitau le palakalafa e 3, ma ofo atu le tusi.
4 Afai o e faaaogā se faamatalaga mai tala fou o le vaifanua i lou atunuu, e mafai ona e faapea atu:
◼ “Sa e faalogo i le lipoti mai tala fou e uiga i le [taʻu se mea o faapopoleina ai tagata o le atunuu]? O le ā sou manatu e uiga i lena mea? [Faatali mo se tali.] E te lē o tau mānatu ea po o le ā o le a iu i ai lenei lalolagi? Ua valoia mai e le Tusi Paia mea faapena o le a tutupu e faamaonia ai ua tatou ola i aso e gata ai.” Ona talanoa lea i le faamatalaga i le tusi Ola e Faavavau, itulau e 150 e oo i le 153.
5 E toatele ua popole i le faatuputeleina o faafitauli tau solitulafono. E mafai ona e faaaogā le uluai upu tomua i lalo o le ulutala “Crime/Safety” i le itulau e 10 o le tusi “Reasoning” e faapea:
◼ “O loo matou talanoa ma tagata e uiga i le saogalemu totino. Ua matuā tele le solitulafono ua siomia ai i tatou, ma ua aafia ai o tatou olaga. O le ā sou manatu i se mea e mafai ona faia e tagata e pei o oe ma aʻu ina ia lagona ai le malu puipuia i luga o ala tetele i le po?” E mafai ona e faitau le Salamo 37:10, 11 ma faasino i ai faamanuiaga o le a aumaia e le Malo o le Atua, e faaaogā ai le itulau e 156 e oo i le 158 o le tusi Ola e Faavavau.
6 Afai e te manao i se faatomuaga faigofie, e mafai ona e faaaogā se upu tomua e pei o lea e maua i le pito i luga i le itulau e 12 o le tusi “Reasoning” e faapea:
◼ “O loo matou faalaeiauina o matou tuaoi ina ia talatalanoa e uiga i le lumanai sili o loo aumaia i le Tusi Paia mo i tatou. [Faitau le Faaaliga 21:3, 4.] O le ā sau faafofoga mai i ai, e lelei? [Faatali mo se tali.] Ua faamatilatila mai i le mataupu e 19 o lenei lomiga isi faamanuiaga o le a tofo i ai le fanau usiusitai a tagata i le pulega a le Malo o le Atua.” A faaalia se naunau, ofo atu le tusi Ola e Faavavau.
7 O le sauniunia o se upu tomua uigā e mafai ona fesoasoani lea i a te oe ina ia e pāʻia loto o i latou o fia aai i le amiotonu.—Mata. 5:6.