Fetuunaiga i Itula Manaomia mo Paeonia
1 E tatou te talisapaia uma le iai o ni paeonia sauatoa ma ni paeonia lagolago galulue mamafa i totonu o le faapotopotoga. E oo foi i vaipanoa o loo faaitiitia ai le oganuu ma e masani lava ona galueaiina soo, ae o loo faataatia ai e paeonia se faataitaiga lelei i la latou auaunaga o le Malo ma le maelega. Ua latou faalaeiauina tagata talaʻi uma ina ia faaauau pea ona pisi i le sailia o i latou o ē ua “saunia.”—Galu. 13:48.
2 Ua matauina e le Sosaiete faafitauli pei ni mauga o loo fesagai ma paeonia, ae maise lava i le sailia o galuega faavaitaimi ina ia fesoasoani ai ia i latou e tausia lelei o latou manaoga totino ina ia tumau ai pea i le auaunaga faataimi atoa. O le tulaga faaletonu o le tamaoaiga o loo iai nei i le tele o atunuu ua faafaigata ai lava i nisi ona ulu atu i le galuega paeonia, e ui lava o le faanaunauga lena o loo iai i o latou loto. I masina ua tuanai, sa tilofaia ai ma le faaeteete nei vala faatasi ma isi vala.
3 O lea la, pe a fua atu i tulaga ua taʻua i luga, ua faaitiitia ai e le Sosaiete itula manaomia mo paeonia sauatoa ma paeonia lagolago. E amata atu i le tausaga faalekalena o le 1999, o le a manaomia ai itula e 70 i masina taitasi mo paeonia sauatoa, po o le aofai e 840 itula i le tausaga. O itula manaomia i le masina mo paeonia lagolago o le a 50. O le a tumau pea itula manaomia mo paeonia faapito ma misionare, auā o loo fesoasoani le Sosaiete i le saunia o mea manaomia mo le tausia o o latou manaoga faaletino. O lea, o loo mafai lava ona latou uaʻi atoatoa atu i la latou galuega talaʻi ma le faia o soo.
4 E faamoemoe o le a fesoasoani lenei suiga i itula manaomia mo le tele o paeonia ina ia taofimau ai pea i lenei faaeaga tāua o le auaunaga. E tatau foi ona tatala ai le avanoa mo le toatele o tagata talaʻi ina ia laa atu e avea ma paeonia lagolago po o le paeonia sauatoa. Maeu se faamanuiaga o le a aumaia e lenei fetuunaiga mo tagata uma i le faapotopotoga!