Po o E Faaaogāina Fesoasoani Talafeagai?
1. O le ā le auala na aʻoaʻoina ai tagata e Paulo ma Iesu?
1 Na taumafai le aposetolo o Paulo e fefulifulisaʻi pe ‘fetufaaʻi ma isi i Tusitusiga Paia.’ (Galu. 17:2, 3; 18:19) Na faataʻitaʻi o ia iā Iesu, o lē sa masani ona sii mai mau o le Tusi Paia ma faaaogā talafaatusa e faamalamalama ai le finagalo o le Atua i ē na faalogologo iā te ia. (Mata. 12:1-12) Ma ua fuafuaina le tamaʻi tusi Le Auala e Amata ma Faaauau ai Talanoaga Faale-Tusi Paia e aogā iā i tatou ina ia faia ai faapea.
2. E faapefea ona faaaogā le tamaʻi tusi Le Auala e Amata ma Faaauau ai Talanoaga Faale-Tusi Paia e sauni ai upu tomua e faaoso naunau?
2 Sauni Upu Tomua Faaoso Naunau: I itulau e 2-7 o le tamaʻi tusi Le Auala e Amata ma Faaauau ai Talanoaga Faale-Tusi Paia, ua iai upu tomua e faaoso ai le naunau. Ia aʻoaʻo ma faaaogā upu tomua eseese, aemaise lava pe a talaʻia soo le oganuu, o le a manaia ai lau faiva i le fesuisuiaʻi o au taulimaga ma aogā iā te oe i le amataina o talanoaga i le talaʻiga. Pe afai o e talaʻi i le telefoni, e mafai ona faitau saʻo lava le upu tomua mai le tusi po o le tamaʻi tusi e pei ona taʻua.
3. O ā faamatalaga mai i itulau e 7-16 o le tamaʻi tusi e aogā iā i tatou i le talaʻiga?
3 Tali Atu i Faamatalaga Tetee: Mafaufau muamua po o ā tala e masani ona fai e tagata o le tou oganuu e tetee mai ai, ma faaalu ni nai minute e autalu ai tali e fai atu, o loo i itulau e 7-13. Pe e iai nisi i le oganuu e lotu Puta, pe Hinitū, lotu Siū, pe Musalimi? O loo talanoaina i itulau e 13-16 o le tamaʻi tusi, manatu e aogā pe a feiloaʻi ma i latou.
4. E faapefea ona faaaogā Mataupu o le Tusi Paia mo Talanoaga pe a lāgā se fesili faigatā po o se mataupu e ono finau ai ma tagata?
4 Taliina o Fesili: E aogā foʻi Mataupu o le Tusi Paia mo Talanoaga i tua o le Tusi Paia o le Lalolagi Fou o Tusitusiga Eleni e amata i le itulau e 556, pe a lāgā se fesili faigatā po o se mataupu e ono finau ai ma tagata. E faigofie lava ona e faapea atu o loo e fia faaali atu se manatu tāua i lea mataupu ma faaaogā loa Mataupu o le Tusi Paia mo Talanoaga. Ua faatulaga mataupu e tusa o le alafapeta faa-Samoa, o lea la, suʻe le mataupu autū ua e manatu e maua i ai le mataupu ua talanoaina. Faasolo lau vaai i ulutala mata tetele ua amata ai palakalafa.
5. O ā nisi aogā o Mataupu o le Tusi Paia mo Talanoaga?
5 O Nisi Aogā: Ua ave e le toʻatele o le ʻautalaʻi lenei Tusi Paia fou i a latou galuega po o aʻoga ona e aogā iā i latou e tali ai fesili e pei, ‘O le ā le mea e tou te lē faamanatuina ai aso faamanatu?’ Ua aogā i talavou faamatalaga o loo i le itulau e 559 “Aso Faamanatu, Aso Fanau” e tali ai fesili i le aʻoga. Po o e fia alu e asia se tasi o loo gasegase po ua maliu se isi e pele iā te ia? E mafai ona e avatu faamāfanafanaga mai le Tusi Paia e faavae i mau o loo maua i le mataupu “Oti,” i le itulau e 561. Ua iai foʻi faamatalaga aogā i Mataupu o le Tusi Paia mo Talanoaga mo ē o sauni a latou lauga ma i latou e taʻitaʻia vaega mo le talaʻiga.
6. O le ā lo tatou sini i le talaʻiga?
6 O lo tatou sini i le talaʻiga, e lē ina ia mālō i finauga pe na o le taʻu atu o faamatalaga. E tatou te mananaʻo ia talanoa ma fefulifulisaʻi ma le poto le Tusi Paia. E faaalia lo tatou uaʻi totoʻa atu i le auala e aʻoaʻo atu ai, pe a tatou faaaogāina ma le poto le tamaʻi tusi Le Auala e Amata ma Faaauau ai Talanoaga Faale-Tusi Paia ma Mataupu o le Tusi Paia mo Talanoaga i le pito i tua o le Tusi Paia fou.—1 Timo. 4:16.