Tauiviga Faapitoa e Faailoa Atu ai le Faamanatuga!
1. O le ā o le a aafia ai tagata talaʻi o le Malo i le lalolagi aoao e amata atu iā Mati 21, 2009, ma aiseā?
1 I le aso Tofi, Aperila 9, 2009, o le a faapotopoto faatasi ai tagata tapuaʻi o Ieova le Atua i le lalolagi aoao, ina ia manatunatu i le tāua o lenei gaoioiga alofa mo le fanau a tagata. (Roma 5:6-8) E tatou te tulimataʻia ma le naunau le auai mai o le faitau miliona o ē fiafia, ina ia tatou auai faatasi i le faamanatuina o le maliu o Iesu. O le a tufatufaina se valaaulia faapitoa o le Faamanatuga i le lalolagi aoao, e amata atu iā Mati 21.
2. O ā manatu e ao ona e manatua pe a ofo le valaaulia?
2 Manatu e Ao Ona Manatuaina: Ia faaaogā lelei ata, fesili, ma mau faasino o loo i le tusi valaaulia. O se faataʻitaʻiga, e te ono faasino atu i le ata i le pito i luma ma faapea atu: “Ou te manaʻo e valaaulia oe e tatou te auai faatasi i le faamanatuina o le maliu o Iesu, lea o le a faamanatu i le aso Tofi, Aperila 9, 2009.” Ona e faasino atu lea i le ulutala o le valaaulia ma fesili o loo iai. Ia faamautinoa e faamamafa le manatu i le tagata o le aiga, e mafai ona ia valaaulia so o se isi o lona aiga po o nisi e masani ai.
3. E faapefea ona e toe asia se tagata na e tuua ai se valaaulia a o faagasolo le tauiviga?
3 Pe afai e telē le oganuu a la outou faapotopotoga, e ono faatonuina outou e toeaina e tuu tusi valaaulia i fale e lē o maua atu i ai nisi. I faaiʻuga o vaiaso, ofo mekasini faatasi ma le tusi valaaulia. Ia fai ma ou sini le valaaulia o au toe asiga, tagata aʻoga o le Tusi Paia, tauaiga, uō i le aʻoga, aumea i le galuega, tuaoi, ma isi e te masani ai. I le tausaga na teʻa, e 30 tauaiga o se tuafafine na ia valaauliaina, ma na fai ma ia faamanatu iā i latou le tāua tele o lea aso. Maʻeu lona fiafia ina ua auai atu le toʻa 25, ma e toʻa 4 na taliaina ni suʻesuʻega faale-Tusi Paia!
4. O ā fuafuaga e tatau ona tatou faia i le taimi nei, ma aiseā?
4 Ia Fai Mamao ni Fuafuaga: E toʻatele tagata talaʻi e mafai ona faateleina so latou sao iā Mati ma Aperila. Pe afai e iai sau fanau po o tagata aʻoga o le Tusi Paia o loo agaʻigaʻi i luma, atonu o le taimi talafeagai lea mo i latou e avea ai ma tagata talaʻi lē papatisoina. O le taimi lenei e amata fai ai fuafuaga, ina ia faateleina sou sao i lenei tauiviga lea e faailoa atu ai le faamanatuina o ni gaoioiga silisili se lua o le alofa.—Ioa. 3:16; 15:13.