Auala e Talaʻia ai le Tala Lelei

I LE avea ai ma sē sa maelega e folafola atu le tala lelei, na faataatia ai e Iesu se faaaʻoaʻoga mo ona soo. Na tausolomua o ia e alu atu i mea na iai tagata, ma na talanoa ma aʻoaʻo atu i o latou aiga faapea nofoaga faitele. (Mata. 9:35; 13:36; Luka 8:1) Na talanoa atu Iesu i tagata taʻitoʻatasi, aʻoaʻo atu i ona soo a o iai na o i latou, ma na lauga atu foʻi i luma o le faitau afe o tagata. (Mare. 4:10-13; 6:35-44; Ioa. 3:2-21) Sa faaaogā lelei e Iesu avanoa talafeagai uma, e avatu ai ni upu faalaeiau ma se faamoemoe mo tagata. (Luka 4:16-19) E ui sa manaʻomia ona mālōlō pe taumafa Iesu i nisi o taimi, ae e leʻi fia misia e ia avanoa e molimau atu ai i isi. (Mare. 6:30-34; Ioa. 4:4-34) Pe a tatou faitau i tala faagaeeina i le Tusi Paia e faatatau i le faiva a Iesu, pe e lē uunaʻia ai ea i tatou e faaaʻoaʻo iā te ia? E mautinoa o o tatou faanaunauga na, e pei lava foʻi ona sa iai i le ʻauaposetolo.​—Mata. 4:19, 20; Luka 5:27, 28; Ioa. 1:43-45.

² Seʻi manatu i avanoa ua tatala mai mo Kerisiano i aso nei, ina ia faia ai se sao i le galuega na amata e Iesu Keriso i le toetoe 2,000 tausaga ua mavae.

TALAʻIGA MAI I LEA FALE I LEA FALE

³ I le avea ai o i tatou ma Molimau a Ieova, ua tatou iloa ai le tāua o le talaʻia o le tala lelei mai i lea fale i lea fale i se auala maopoopo. Talu ai o le auala lenei o loo tele ina tatou faaaogā e faaoo atu ai le feʻau i so o se mea, ua avea ai ma faailoga e mātaulia ai i tatou. O iʻuga lelei ua maua mai ai, ua faamaonia ai le atamai o le faaaogā o lenei auala e talaʻi atu ai i le faitau miliona o tagata i se taimi puupuu. (Mata. 11:19; 24:14) O le talaʻi atu i lea fale i lea fale, o se auala lelei lea e faaalia ai lo tatou alofa mo Ieova ma o tatou tuaoi.​—Mata. 22:34-40.

⁴ O le talaʻiga mai i lea fale i lea fale, e lē o se auala na faatoʻā faatulaga e Molimau a Ieova. O loo taʻua e le aposetolo o Paulo taimi na ia aʻoaʻo atu ai i tagata i o latou fale. Ina ua ia faamatala atu lana faiva i ovasia i Efeso, na ia faapea atu: ʻE mai lava i le uluaʻi aso na ou taunuu atu ai i le itumalo o Asia, ou te leʻi taofia foʻi le taʻuina atu iā te outou o mea aogā, ma aʻoaʻo atu iā te outou mai i lea fale i lea fale.’ O lenei auala ma isi foʻi auala, na mafai ai e Paulo ona “molimau māeʻaeʻa atu i tagata Iutaia atoa ma Eleni, i le salamō i le Atua ma le faatuatua i lo tatou Alii o Iesu.” (Galu. 20:18, 20, 21) I lenā taimi, na faaauiluma ai e emeperoa o Roma le ifo i tupua, ma o le toʻatele o tagata na “matataʻu i atua.” Sa iai se manaʻoga faanatinati ina ia saʻili atu tagata i “le Atua o lē na faia le lalolagi ma mea uma ua iai,” o Lē na “faatonuina tagata uma lava ina ia salamō” i lenā taimi.​—Galu. 17:22-31.

⁵ I aso nei, ua sili atu ona faanatinati le manaʻoga ina ia faaoo atu le tala lelei i tagata. Ua matuā latalata tele mai le iʻuga o lenei faiga leaga o mea. O le iloaina o lenei mea, e uunaʻia ai i tatou ina ia faateleina a tatou taumafaiga. Ua faamaonia mai i le tele o tausaga, e leai se isi auala e sili atu e saʻilia ai tagata o loo galala mo le upu moni, nai lo o le talaʻiga mai i lea fale i lea fale. O loo matuā aogā lenei auala i aso nei, e pei lava foʻi ona sa iai i aso o Iesu ma le ʻauaposetolo.​—Mare. 13:10.

⁶ Po o mafai ona faia sou sao atoatoa i le talaʻiga mai i lea fale i lea fale? Pe afai o loo e faia faapea, e mafai ona e mautinoa o loo e faamalieina Ieova. (Eseki. 9:11; Galu. 20:35) E ono lē faigofie iā te oe le talaʻiga mai i lea fale i lea fale. Atonu e lē atoatoa lou malosi i le tino, pe e te ono talaʻi foʻi i se oganuu e lē fia faalogo mai le toʻatele o tagata. E ono iai foʻi ni faasāsāaga mai i pulega a malo. Pe atonu foʻi e te lagona le matamuli, ma faafaigatā ai ona e amataina ni talanoaga ma ni tagata e te lē masani ai. O lea, e te lagona ai lava sina popole pe a e auai i le talaʻiga mai i lea fale i lea fale. Aua e te lotovaivai. (Eso. 4:10-12) E talitutusa lava lou tulaga ma tulaga o ou uso o loo i le tele o isi atunuu.

⁷ Na folafola atu e Iesu i ona soo: “Faauta! ou te faatasi ma outou i aso uma lava seʻia oo i le taufaaiʻuiʻuga o le faiga o mea a le lalolagi.” (Mata. 28:20) O lenei folafolaga ua faamalosia ai i tatou i le galuega o le faia o isi ma soo. Ua iā i tatou lagona e pei ona sa iai iā Paulo ina ua ia tusi: “O mea uma lava, ua ou maua le malosi mai iā te ia o lē na foaʻi maia iā te aʻu le mana.” (Fili. 4:13) Ia faaaogā atoatoa faatulagaga a le faapotopotoga, ina ia molimau atu ai mai i lea fale i lea fale. Pe a galulue faatasi ma isi, o le a e maua ai le tele o faalaeiauga ma le fesoasoani. Ia tatalo atu mo le fesoasoani, ina ia mafai ai ona e fesagaʻia so o se faafitauli e ono tulaʻi mai, ma ia finafinau ma le maelega o se faifeʻau o le tala lelei.​—1 Ioa. 5:14.

⁸ A o e talanoa atu i isi e uiga i le tala lelei, o le a e maua ai le avanoa e faailoa atu ai ʻle māfuaaga o lou faamoemoe.’ (1 Pete. 3:15) O le a e malamalama atili ai i le eseesega o i latou ua iai le faamoemoe o le a faataunuuina e le Malo le finagalo o le Atua, ma i latou e lē o iai lenā faamoemoe. (Isa. 65:13, 14) O le a e maua ai le faamalieina i lou iloaina, o loo e usitaʻia le poloaʻiga a Iesu ʻia susulu atu lo outou malamalama.’ E te ono maua ai foʻi le faaeaga o le fesoasoani atu lea i isi ina ia iloa Ieova, ma le upu moni lea e taʻitaʻia atu ai i le ola e faavavau.​—Mata. 5:16; Ioa. 17:3; 1 Timo. 4:16.

⁹ E iai fuafuaga ua faia mo le galuega mai i lea fale i lea fale, a o faagasolo le vaiaso faapea foʻi ma le faaiʻuga o le vaiaso. I nisi o nofoaga lea e faigatā ona maua ai tagata i o latou fale i le taimi o le aso, ua faia ai e nisi faapotopotoga ni fuafuaga mo talaʻiga i le afiafi. Atonu e sili atu ona talia e nisi tagata ē e asiasi atu i le aoauli po o le afiafi, nai lo o le taimi o le taeao.

IA SAʻILI I Ē UA TATAU I AI

¹⁰ Na poloaʻia e Iesu ona soo ina ia “saʻili” i ē ua tatau i ai le feʻau. (Mata. 10:11) O le saʻilia e Iesu o i latou o ē e talilelei mai, e leʻi faatapulaa atu i le talaʻiga mai i lea fale i lea fale. O le mea moni, na ia molimau atu i so o se avanoa talafeagai, i tulaga na fuafuaina ma le molimau lē fuafuaina foʻi. (Luka 8:1; Ioa 4:7-15) Na molimau atu foʻi le ʻauaposetolo i tagata i nofoaga eseese.​—Galu. 17:17; 28:16, 23, 30, 31.

¹¹ O lo tatou sini foʻi lenā i aso nei, o le faaoo atu lea o le feʻau o le Malo i tagata uma i le tele e mafai ai. O lona uiga ia tatou faaaʻoaʻo iā Iesu ma ona aposetolo, i le auala na latou faatino ai le galuega o le faia o isi ma soo. E tatau foʻi ona tatou mataʻalia i le suiga o tulaga o mea, faapea tulaga eseese o tagata i la tatou oganuu. (1 Kori. 7:31) Mo se faataʻitaʻiga, ua taulau tagata talaʻi i le molimau atu i nofoaga o pisinisi. I nisi o atunuu, ua faamaonia ai le taulau manuia o le molimau atu i alatetele, paka e tafafao ai, nofoaga e paka ai taavale, po o so o se nofoaga lava e maua ai tagata. I nisi o faapotopotoga, e latou te faaaogā laulau po o fata e toso solo e faaali ai lomiga i vaega o la latou oganuu. E ono faatulaga foʻi e le ofisa o le lālā se talaʻiga faapitoa i nofoaga faitele i aai tetele, i vaega e toʻatele ai tagata savavali, lea e mafai ona faia ai se sao o tagata talaʻi mai i faapotopotoga eseese. O le iʻuga, o le a mafai ai e i latou e lē maua atu e le ʻautalaʻi i o latou fale, ona maua le tala lelei i nisi nei o auala.

¹² Pe a e feiloaʻi ma tagata i nofoaga faitele e faaalia le fiafia i le feʻau o le Tusi Paia, e mafai ona tatou ofo iai se lomiga talafeagai. Ina ia faatupu pea le fiafia o le tagata, e mafai ona e tuu iai au faamatalaga mo fesootaʻiga ma faatulaga se toe asiga, ona faasino lea iai o le jw.org po le faailoa iai o faamatalaga e faatatau i se nofoaga lata ane e faia ai sauniga. O le iʻuga, atonu o le a avea ai le talaʻi atu i tagata i nofoaga faitele, o se auala lelei e faalautele atu ai lau faiva.

¹³ Peitaʻi, o le faalauiloaina atu o le tala lelei, e lē na o le pau lea o le mea e aofia ai i le galuega ua tofia i Kerisiano i aso nei. Ina ia e taulau i le fesoasoani atu i isi e talia le upu moni e taʻitaʻia ai i le ola, o le a e naunau la e asiasi atu pea i ē fiafia, ina ia mafai ona latou agaʻigaʻi i luma e avea o ni Kerisiano taʻumatuaina.

FAIA O TOE ASIGA

¹⁴ Na fetalai atu Iesu i ona soo: ʻE fai outou ma molimau iā te aʻu i tuluʻiga uma o le lalolagi.’ (Galu. 1:8) Ae na ia faapea atu foʻi iā i latou: ʻO le mea lea, ia outou ō atu e fai tagata o nuu uma lava ma soo, ia aʻoaʻoina i latou ia tausi i mea uma ua ou poloaʻi atu ai iā te outou.’ (Mata. 28:19, 20) O le faia o toe asiga e mafai ona faafiafiaina ai oe i le auaunaga iā Ieova. O tagata na faaalia le naunau i le tala lelei i lau uluaʻi asiasiga, e lē taumatea o le a fiafia e toe taliaina oe. E ala i le fetufaaʻi ma i latou i nisi o faamatalaga mai i le Tusi Paia, e ono mafai ai ona e faamalosia lo latou faatuatua i le Atua, ma fesoasoani iā i latou e amanaʻia o latou manaʻoga faaleagaga. (Mata. 5:3) Pe afai e te sauniuni lelei ma faatulaga le toe asiga e faia i se taimi e talafeagai lelei ma le tagata fiafia, e ono mafai ona e amataina se suʻesuʻega faale-Tusi Paia i le aiga. E masani lava o le amataina o suʻesuʻega, o le sini lenā mo le faia o toe asiga. O lea, e lē gata e tatou te totō le fatu o le upu moni, ae ia faasūsūina foʻi.​—1 Kori. 3:6.

¹⁵ E ono avea ma luʻi i nisi le faia o toe asiga. Atonu ua e maua le tomai i le faia o se taulimaga puupuu o le tala lelei i le talaʻiga, ma ua avea o se vala patino o le faiva e te fiafia i ai. Ae pe a e manatu e toe foʻi e faia se talanoaga i le Tusi Paia ma le tagata e ona le fale, e foliga mai o se luʻi e lē mafai ona e faafetaiaʻia. O sauniuniga lelei e faatuputeleina ai lou mautinoa. Ia faamautinoa e te faaaogāina fautuaga aogā e maua mai i le sauniga amata o le vaiaso. E mafai foʻi ona e valaaulia se tagata talaʻi tomai e fesoasoani iā te oe.

FAIA O SUʻESUʻEGA FAALE-TUSI PAIA I AIGA

¹⁶ Ina ua talanoa atu le faievagelia o Filipo i se tamāloa na liliu i le lotu Iutaia a o ia faitauina le Afioga a le Atua, na ia fesili atu: “Po ua e malamalama i mea ua e faitauina?” Na tali mai le tamāloa: “E faapefea ona ou malamalama pe a lē faasino mai e se tasi iā te aʻu?” Ua taʻua i le Galuega 8:26-36 e faapea, na “folafola atu [e Filipo] iā te ia le tala lelei e uiga iā Iesu,” e amata mai i le vaega o Tusitusiga Paia lea na faitauina e le tamāloa. E tatou te lē mailoa le umi na faaalu e Filipo e aʻoaʻo atu ai i lenei tamāloa. Peitaʻi, na faamatala māeʻaeʻa atu e Filipo le tala lelei, lea na iʻu ai ina talitonu le tamāloa ma talosaga atu ina ia papatisoina o ia i le vai. Na avea lenei tamāloa ma soo o Iesu Keriso.

¹⁷ I aso nei, e toʻatele e lē iloa lelei le Tusi Paia. O lea la, e ono tele se taimi e manaʻomia e toe asia ai ma faia se suʻesuʻega māeʻaeʻa o le Tusi Paia, lea e alu ai ni vaiaso, masina po o se tausaga pe sili atu foʻi, ona faatoʻā mafai lea ona atiaʻe e tagata le faatuatua ma agavaa ai mo le papatisoga. Peitaʻi, o le a tauia lou onosaʻi ma lou alofa i le fesoasoani atu i ē lotofaamaoni ina ia avea ma soo, e pei o le fetalaiga a Iesu: “E sili le fiafia e maua i le foaʻi atu i lo o le talia mai.”​—Galu. 20:35.

¹⁸ E lē taumatea o le a e manaʻo e faia se suʻesuʻega faale-Tusi Paia i aiga, e ala i le faaaogāina o se tasi o a tatou lomiga ua saunia faapitoa mo lea fuafuaga. A o e faatatauina faatonuga ua saunia mai i sauniga amata o le vaiaso ma galulue faatasi ma faiaʻoga tomai o lau faapotopotoga, o le a mafai ai ona e faia ni suʻesuʻega e fua mai, ma fesoasoani i isi e avea ma soo o Iesu Keriso.

¹⁹ Pe afai e te manaʻomia se fesoasoani i le amataina ma le faia o se suʻesuʻega faale-Tusi Paia i aiga, ia talanoa atu i se tasi o ovasia po o se isi Molimau e tomai i le faia o suʻesuʻega faale-Tusi Paia. O le a fesoasoani foʻi iā te oe fautuaga mai i le Polokalame mo le Sauniga o le Faiva ma le Olaga Faa-Kerisiano lea e faataʻitaʻi i le taimi o le sauniga. Ia faalagolago atu pea iā Ieova, ma avea lou faanaunauga o le amataina ma le faia o se suʻesuʻega ma mataupu patino o au tatalo. (1 Ioa. 3:22) O lea la, e ese mai i suʻesuʻega o loo e faia ma lou aiga, ia avea ma ou sini le faia o se suʻesuʻega faale-Tusi Paia ma se tagata e te feiloaʻi ai i le galuega i le fanua, pe afai e mafai. O le faia o suʻesuʻega faale-Tusi Paia, o le a atili faateleina ai lou olioli i le faiva.

FAASINO Ē FIAFIA I LE FAALAPOTOPOTOGA A IEOVA

²⁰ Ua avea tagata o se vaega o le faapotopotoga, ona ua tatou fesoasoani iā i latou e iloa Ieova ma avea ma soo o Iesu Keriso. O le a agaʻigaʻi i luma faaleagaga tagata aʻoga o le Tusi Paia ma tuputupu aʻe ma avea o ni ē e taʻumatuaina, pe a latou iloa ma felagolagomaʻi ma le faalapotopotoga a Ieova. E tāua la lo tatou aʻoaʻoina o i latou i le auala e faia ai faapea. Ua saunia faapitoa ata vitiō ma le polosiua O Ai o Loo Faia le Finagalo o Ieova i Aso Nei? mo lenei fuafuaga. E ono aogā foʻi nisi o faamatalaga o loo maua i le Mataupu 4 o lenei tusi, e fesoasoani ai iā i latou.

²¹ E mai lava i le taimi faatoʻā amata ai se talanoaga faale-Tusi Paia ma se tagata aʻoga, ia fesoasoani iā te ia ina ia iloa o loo faaaogā e Ieova se faalapotopotoga, e faataunuuina ai le galuega talaʻi i le lalolagi i aso nei. Ia faailoa i ai le tāua o lomiga o loo faaaogā mo suʻesuʻega faale-Tusi Paia. Ia faamatala i ai le auala e saunia, lomia ma tufatufaina ai na lomiga i le lalolagi aoao, e ala i se ʻaufaigaluega tauofo o ē e tuuina atu i le Atua. Ia valaaulia lau tagata aʻoga o le Tusi Paia ina ia lua auai faatasi i sauniga i le Maota mo Sauniga. Ia faamatala i ai le auala e fai ai sauniga, ma faafeiloaʻi atu o ia i uso ma tuafāfine i sauniga. Ia fesoasoani iā te ia e faamasani atu i isi Molimau i taimi o fonotaga ma tauaofiaga. I faatasiga faapenei faapea foʻi ma isi faatasiga, ia tuu le avanoa i le tagata fou e vaaitino ai lava o ia i le auala e faaalia ai e tagata o Ieova le alofa, o le faailoga lea e mātaulia ai Kerisiano moni. (Ioa. 13:35) A o faasolo ina talisapaia atili e le tagata fiafia le faalapotopotoga a Ieova, o le a oo ina mafuta vavalalata atu ai o ia iā Ieova.

FAAAOGĀINA O LOMIGA FAALE-TUSI PAIA

²² Na avea uluaʻi Kerisiano o ni tagata talaʻi maelega o le Afioga a le Atua. Na latou faia ni kopi o Tusitusiga Paia mo i latou lava, ma kopi mo suʻesuʻega a le faapotopotoga. Sa latou faailoa atu upu moni o le Afioga a le Atua i isi. E lē tele ni a latou kopi tusilima na iai, ma na latou matuā faapelepele i ai. (Kolo. 4:16; 2 Timo. 2:15; 3:14-17; 4:13; 1 Pete. 1:1) I aso nei, ua faaaogā e Molimau a Ieova auala faaonapōnei e lolomi ai le faitau selau miliona o Tusi Paia ma lomiga mo le suʻesuʻeina o le Tusi Paia. O nei lomiga e aofia ai sāvali, polosiua, tusi ma mekasini i le faitau selau o gagana eseese.

²³ A o e faailoa atu i isi le tala lelei, ia faaaogā lomiga mo le suʻesuʻeina o le Tusi Paia ua saunia mai e le faalapotopotoga a Ieova. O lou iloaina o le tele o aogā ua e maua ona o lou faitauina ma le suʻesuʻeina o lomiga a Molimau a Ieova, o le a uunaʻia ai oe e tufa atu nei lomiga i isi.​—Epe. 13:15, 16.

²⁴ O loo faatoʻateleina pea le aofaʻi o tagata e latou te faaaogāina le Initaneti e maua mai ai faamatalaga. O lea, e faaopoopo atu i lomiga faale-Tusi Paia, o le isi meafaigaluega ua taulau manuia e faaoo atu ai le tala lelei, o la tatou Upega tafaʻilagi aloaʻia o le jw.org. Ua mafai e tagata i le lalolagi aoao ona faaaogā le komepiuta, e faitau pe faalogologo ai i le faitauga o le Tusi Paia ma isi lomiga faale-Tusi Paia ua uma ona puʻeina, i le faitau selau o gagana. O nisi o ē e faatalatū e talanoa ma i tatou, pe e nonofo foʻi i vaipanoa e lē tele ai ni avanoa e talanoa ai ma Molimau a Ieova, ua mafai ona latou tilofaʻia o tatou talitonuga e faaaogā ai le tuatusi jw.org i o latou lava fale.

²⁵ O lea la, ia faailoa atu la tatou tuatusi jw.org i so o se avanoa e talafeagai. Pe a fesiligia i tatou e le tagata e ona le fale e faatatau i o tatou talitonuga, e mafai ona tatou faaaogā masini e pei o se telefoni feaveaʻi po o se komepiuta e faasino i ai le tali i le taimi lava lenā. Pe a tatou tau atu i se tagata e tautala i se isi gagana e aofia ai se tasi o gagana fai taga, e mafai ona faasino i latou i le vaega o la tatou Upega tafaʻilagi e maua ai le Tusi Paia, ma lomiga faale-Tusi Paia i lana lava gagana. Ua faaaogā foʻi e le toʻatele o tagata talaʻi se tasi o a tatou vitiō o loo maua i la tatou Upega tafaʻilagi, ina ia amataina ai talanoaga faale-Tusi Paia.

MOLIMAU LĒ FUAFUAINA

²⁶ Na fetalai Iesu i ē na uaʻi atu i ana fetalaiga e faapea: ʻO outou o le malamalama o le lalolagi. Ia susulu atu lo outou malamalama i luma o tagata, ina ia latou iloa a outou galuega lelei ma vivii atu ai i lo outou Tamā o i le lagi.’ (Mata. 5:14-16) Na faaatagia atu e nei soo ala o le Atua i le faaaʻoaʻo lea iā Iesu Keriso, o lē na faapea mai: “O aʻu o le malamalama o le lalolagi.” Na faataatia e Iesu le faaaʻoaʻoga mo Kerisiano uma, i le faasusulu atu o le “malamalama o le ola” mo le lelei o ē uma e fia faalogo.​—Ioa. 8:12.

²⁷ Na faataatia foʻi e le aposetolo o Paulo se faaaʻoaʻoga mo i tatou e mulimuli i ai. (1 Kori. 4:16; 11:1) A o iai i Atenai, na ia molimau atu ai i tagata na ia feiloaʻi i ai i le maketi i aso taʻitasi. (Galu. 17:17) Na mulimuli Kerisiano i Filipi i le faaaʻoaʻoga a Paulo. O le māfuaaga lenā na tusi atu ai Paulo iā i latou e faapea, na latou ola “i le tupulaga faapiʻopiʻo ma le taufaasesē,” lea sa latou “susulu atu ai e pei o molī e faamalamalama aʻi le lalolagi.” (Fili. 2:15) E mafai foʻi e i tatou i aso nei ona faasusulu atu upu moni o le Malo, e ala i a tatou upu ma gaoioiga i avanoa uma e tatou te maua e taʻu atu ai i isi le tala lelei. O le mea moni, o a tatou faaaʻoaʻoga lelei o ni tagata faamaoni ma amio saʻo, e ono iloa ai e isi le ese o i tatou mai i le toʻatele o tagata o le lalolagi. Ae afai e tatou te talanoa atu iā i latou e faatatau i le tala lelei, o le a latou iloa ai le pogai ua ese ai i tatou mai i isi tagata.

²⁸ O le toʻatele o Molimau a Ieova, e latou te faailoa atu le tala lelei i tagata e latou te feiloaʻi i galuega, i aʻoga, auala o femalagaaʻiga mo le lautele, po o so o se mea lava e feiloaʻi ai ma tagata a o faia a latou feʻau masani i aso taʻitasi. E tatou te ono maua foʻi le avanoa e talanoa atu ai i isi o loo tatou faimalaga faatasi. E ao iā i tatou taʻitoʻatasi ona mataʻalia i avanoa e faaaogā ai talanoaga masani, e fai ma auala e talaʻi atu ai. O lea, ia tatou nofosauni e talanoa atu i isi i so o se tulaga talafeagai.

²⁹ O taimi uma lava e tatou te talaʻi atu ai i isi, ua tatou viia ai Lē na Foafoaina i tatou ma faamamaluina ai lona suafa. Pe a teu pea i o tatou mafaufau lenā manatu, o le a uunaʻia ai i tatou e talaʻi atu. I le taimi e tasi, atonu o le a mafai ai ona tatou fesoasoani i ē lotofaamaoni ia iloa Ieova, ina ia mafai ai ona latou auauna atu foʻi iā te ia ma maua le faamoemoe o le ola, e ala i le faatuatua iā Iesu Keriso. E talileleia e Ieova na taumafaiga uma, ma e silasila i ai o ia o se auaunaga paia.​—Epe. 12:28; Faaa. 7:9, 10.

OGANUU

³⁰ O le finagalo o Ieova ia talaʻi atu le feʻau o le Malo i le lalolagi aoao, i aai faapea ma nofoaga maotua. Ona o lenei māfuaaga, ua maua ai e faapotopotoga faapea ma tagata talaʻi o loo molimau atu i vaipanoa tumamao, ni oganuu ua tofia mai e le ofisa o le lālā e latou te galulue ai. (1 Kori. 14:40) E ōgatusa lenei faatulagaga ma le faatulagaga na faatonuina e le Atua Kerisiano i le uluaʻi senituri e fai. (2 Kori. 10:13; Kala. 2:9) A o televave le tuputupu aʻe o le galuega o le Malo i nei aso e gata ai, e tele foʻi mea e mafai ona faataunuuina, pe a lelei ona faamaopoopo le faatulagaina o le galueaʻiina o oganuu a le faapotopotoga.

³¹ O lenei faatulagaga mo le galueaʻiina o oganuu a le faapotopotoga, e i lalo o le vaavaaiga a le ovasia o le auaunaga. E ono faatino e se auauna o le faiva le faasoasoaina o oganuu. E lua ituaiga o oganuu, o oganuu mo vaega ma sau lava oganuu. Pe afai e lē tele ni oganuu, o le a iai i le ovasia o le vaega ni oganuu mo vaega e galulue ai tagata talaʻi o loo i lana vaega. Ae afai o loo tele oganuu, e mafai e tagata talaʻi taʻitoʻatasi ona talosaga atu mo sana lava oganuu.

³² O le iai i se tagata talaʻi o sana lava oganuu, o le a ia maua ai pea tagata e talaʻi i ai i taimi e lē faia ai se faatasiga mo le talaʻiga, po o taimi foʻi e lē talafeagai ai le feiloaʻi i vaega. O se faataʻitaʻiga, e ono talosaga atu nisi tagata talaʻi mo oganuu e lata i mea o loo faigaluega ai, lea e mafai ona latou talaʻi ai i taimi e mālōlō ai mai i le galuega i le aoauli, po o le taimi foʻi e mānava ai. O nisi aiga e talosaga atu mo sa latou lava oganuu i le mea o loo nonofo ai, lea e mafai ona latou talaʻi ai i le afiafi. O le iai o se oganuu a le tagata talaʻi lava ia e latalata ma faigofie ona alu i ai, o le a fesoasoani iā te ia e faaaogā lelei ai lona taimi i le auaunaga i le fanua. E mafai foʻi ona faaaogā oganuu a le tagata lava ia e galulue ai ma isi tagata talaʻi, atonu pe a māeʻa le faatasiga mo le talaʻiga. Pe a e manaʻo i sau lava oganuu, e mafai ona e talosaga atu i le auauna mo oganuu.

³³ E tusa pe o se oganuu mo vaega lea e tuuina atu i le ovasia o le vaega pe o se oganuu ua tuuina atu i le tagata talaʻi lava ia, ae e tatau ona faamautinoa e lē ua tuuina atu i ai le oganuu ona faia taumafaiga uma e faafesootaʻi ai tagata i aiga uma. O le faatulagaga mo le galueaʻiina o oganuu e tatau ona faia e ōgatusa ma tulafono e puipuia ai. E tatau i le ovasia o le vaega po o se tagata talaʻi lea e iai lana lava oganuu, ona taumafai e galueaʻiina atoa se oganuu i totonu o le fā masina. Pe a māeʻa ona galueaʻiina le oganuu, e tatau ona faailoa atu i le auauna mo oganuu. E faalagolago i le tulaga o mea, e mafai ona tuu pea i le ovasia o le vaega po o le tagata talaʻi le oganuu ina ia toe galueaʻiina i se isi taimi, pe toe faafoʻi atu foʻi i le auauna mo oganuu.

³⁴ Afai e galulue felagolagomaʻi tagata uma o le faapotopotoga, o le a mafai ona galueaʻiina ma le māeʻaeʻa oganuu. E mafai ai foʻi ona ʻalofia le galueaʻiina o se oganuu e ni vaega eseese o tagata talaʻi i le taimi lava e tasi, lea e ono avea ma māfuaaga e lē fiafia ai tagata o aiga. O le faia faapea, e faaalia ai lo tatou manatu mamafa i o tatou uso atoa ai ma tagata o le oganuu.

IA GALULUE FELAGOLAGOMAʻI INA IA TALAʻI ATU I TAGATA O GAGANA UMA

³⁵ E manaʻomia ona aʻoaʻoina tagata uma e faatatau iā Ieova le Atua, o lona Alo ma le Malo. (Faaa. 14:6, 7) E tatou te naunau e fesoasoani i tagata e tautatala i gagana uma, ina ia latou valaau i le suafa o Ieova mo le faaolataga, ma oofu i le tagata fou faa-Kerisiano. (Roma 10:12, 13; Kolo. 3:10, 11) O ā nisi o luʻi e tulaʻi mai a o faailoa atu le tala lelei i oganuu e iai tagata e tautatala i isi gagana? E faapefea ona faafetaiaʻia na luʻi ina ia maua ai pea e le toʻatele e mafai ai, le avanoa e faalogo ai i le feʻau o le Malo i le gagana e sili ona latou malamalama i ai?​—Roma 10:14.

³⁶ O loo tofiaina atu oganuu e fua i gagana. O lea, ua mafai ai e faapotopotoga o loo iai tagata talaʻi e eseese gagana e tautatala ai, ona talaʻi i se oganuu e tasi, lea e nonofo ai le toʻatele o tagata e eseese gagana e tautatala ai. I tulaga faapea, e sili atu ona lelei pe a uaʻi atu tagata talaʻi o faapotopotoga taʻitasi, i le talaʻi atu i tagata i le oganuu o loo tautatala i le gagana patino o loo latou faaaogāina. O le tulaga lava lea e tasi i taimi o tauiviga lea e faia i tausaga taʻitasi. Peitaʻi, pe a molimau atu lē fuafuaina pe molimau atu i nofoaga faitele, e mafai lava ona talanoa atu i so o se tasi pe ofo atu lomiga i so o se isi lava gagana.

³⁷ I nisi tulaga, e lē mafai e faapotopotoga e tautatala i isi gagana ona galueaʻiina e lē aunoa a latou oganuu mamao. O lea, e tatau ai i ovasia o le auaunaga i faapotopotoga o loo aofia ai, ona latou fesootaʻi pea e faia faatasi se faatulagaga talafeagai mo le galueaʻiina o oganuu. O le faia faapea, o le a maua ai e tagata uma le avanoa e faalogo ai i le feʻau o le Malo ma ʻalofia ai foʻi le toe galueaʻiina o le oganuu i le taimi e tasi.​—Faata. 15:22.

³⁸ O le ā e tatau ona tatou faia pe a tatou tau atu i se tagata i le fale e tautala i se isi gagana? E lē tatau ona tatou manatu faapea, o le a asia o ia e tagata talaʻi o loo tautatala i lenā gagana. O nisi tagata talaʻi ua latou aʻoaʻoina ni faatomuaga faigofie, i le gagana a tagata lea e masani ona latou tau atu i ai i la latou oganuu. E mafai foʻi ona tatou faasino i le tagata, le auala e mafai ai ona ia faitau pe kopi (download) mai ai lomiga i lana lava gagana mai i la tatou Upega tafaʻilagi aloaʻia o le jw.org, pe faailoa atu foʻi o le a tatou faaoo atu ni lomiga i lana gagana.

³⁹ Pe a faaalia e se tagata le naunau moni, ia taumafai e faafesootaʻi se tagata talaʻi e tautala i lenā gagana e agavaa e fesoasoani i lea tagata. E mafai ona tatou faailoa i ai se nofoaga o latalata ane o loo faia ai sauniga i lana gagana. Pe afai e manaʻo le tagata fiafia e faafesootaʻi o ia e se tagata e tautala i lana gagana, e mafai ona tatou faasino i ai le faaaogāina o la tatou tuatusi jw.org, e tuu ai faamatalaga e pei o lana tuatusi ma lana telefoni. O le faia faapea, o le a mafai ai e le ofisa o le lālā ona faia taumafaiga e saʻili se tagata talaʻi, se vaega po o se faapotopotoga e latalata ane e mafai ona fesoasoani iā te ia.

⁴⁰ E tatau ona tatou asia pea le tagata fiafia seʻi vaganā ua ia faailoa mai, o lea ua iai tagata talaʻi e tautatala i lana gagana ua asiasi atu iā te ia. Peitaʻi, e iai taimi e lē maua ai se tagata talaʻi e tautala i le gagana a le tagata fiafia. Pe afai o le tulaga lenā, ia faia pea le mea e gata ai lo tatou mafai ina ia atiaʻe pea le fiafia o le tagata. Pe afai e mafai, ia tatou taumafai e suʻesuʻe ma ia i le Tusi Paia, atonu e faaaogā ai se lomiga i lana lava gagana. Pe a tatou faaaogā lelei ata ma valaaulia le tagata fiafia e faitau i mau sii, o le a ia malamalama ai i ni aʻoaʻoga faavae o le Tusi Paia. E ono iai foʻi se isi o le aiga o le tagata fiafia e malamalama i lana gagana faapea ma lau gagana, e ono lotomalie e avea ma faaliliu.

⁴¹ Ina ia mafai ona faasino le tagata fiafia i le faalapotopotoga a le Atua, e tatau ona tatou valaaulia o ia i a tatou sauniga, e tusa lava pe ono lē malamalama atoatoa i le polokalame. Pe a faitau ni mau, e mafai ona tatou fesoasoani iā te ia e suʻe na mau i lana Tusi Paia o loo i lana gagana, pe afai o iai. O faatasitasiga ma isi i totonu o le faapotopotoga, e mafai ona atiaʻe ai ma o le a fesoasoani lea i le tagata fiafia e agaʻigaʻi ai i luma faaleagaga.

⁴² Vaega Tau Amata: O se vaega tau amata e aofia ai na o ni tagata talaʻi o loo talaʻi atu i se isi gagana e ese mai i le gagana a le faapotopotoga, e ui lava e leai se toeaina po o se auauna o le faiva agavaa e mafai ona faia se sauniga faalevaiaso i lenā gagana. E tatau ona faamaonia e le ofisa o le lālā se faapotopotoga e vaavaaia se vaega tau amata pe a ausia aiāiga nei:

1. (1) Pe a toʻatele tagata e aumau ai i lea nofoaga e tautatala i le gagana e ese mai i le gagana a le faapotopotoga.

2. (2) E iai nisi o le ʻautalaʻi e iloa tautatala i lenei gagana, pe naunau foʻi e aʻoaʻo le gagana.

3. (3) E naunau foʻi le ʻautoeaina e taʻimua i le faamaopoopoina o le galuega talaʻi i lenei gagana.

Pe a naunau le ʻautoeaina e vaavaaia se vaega tau amata, e latou te talanoaina faatasi ma le ovasia matagaluega lenei mataupu. Atonu e iloa e le ovasia nisi faapotopotoga o loo latou talaʻi foʻi i tagata e tautatala i le gagana lava lea, ma e ono maua mai ai ni faamatalaga tāua e fesoasoani i le iloiloina po o fea le faapotopotoga e sili atu ona lelei e vaavaaia le vaega tau amata. Pe a māeʻa ona filifilia le faapotopotoga, ona tusi atu lea o toeaina i le ofisa o le lālā mo se faatagaga e aloaʻia ai se faapotopotoga e vaavaaia le vaega tau amata.

⁴³ Vaega: E tatau ona faamaonia e le ofisa o le lālā se faapotopotoga e vaavaaia se vaega pe a ausia aiāiga nei:

1. (1) Ia lava le tele o tagata fiafia ma ia iai ni faamaoniga o le faatupulaʻia pea i lea gagana.

2. (2) Ia iai se vaega itiiti o le ʻautalaʻi e tautatala pe aʻoaʻoina foʻi lea gagana.

3. (3) Ia iai se toeaina po o se auauna o le faiva agavaa e taʻimua ma faia se sauniga pe ā ma le faatasi i le vaiaso​—po o se vaega se tasi foʻi o se sauniga o le vaiaso pei o le lauga i le lautele po o le Suʻesuʻega o Le Olomatamata​—i lenei gagana.

Pe a ausia nei mea manaʻomia i le tele e mafai ai, o le a tusi atu le ʻautoeaina i le ofisa o le lālā faatasi ma faamatalaga uma ma talosaga atu ina ia talia aloaʻia i latou, o se faapotopotoga e vaavaaia se vaega. O le toeaina po o le auauna o le faiva o le a taʻimua i lea vaega, o le a avea ma “ovasia o le vaega” po o le “auauna o le vaega” e gafa ma le vaavaaia o le vaega.

⁴⁴ O le taimi lava e faavae ai le vaega, e filifili e le ʻautoeaina o le faapotopotoga lea e vaavaaia le vaega, pe tatau ona faaopoopo iai nisi vaega o le sauniga a le faapotopotoga, ma o le ā foʻi le tele e faia ai sauniga a o faagasolo le masina. E mafai foʻi ona faatulaga ni faatasiga mo le talaʻiga a le vaega. O i latou uma o loo i lea vaega, e i lalo o le vaavaaiga a le ʻautoeaina o le faapotopotoga lea o loo vaavaaia le vaega. E saunia atu e toeaina taʻiala talafeagai ma tausolomua i le tausia o manaʻoga o le vaega. Pe a galulue faatasi le ovasia o le matagaluega ma lea vaega i le vaiaso o lana asiasiga i le faapotopotoga o loo vaavaaia le vaega, o le a ia saunia se lipoti puupuu mo le ofisa o le lālā e faatatau i le agaʻigaʻi i luma o lea vaega, faapea ma nisi o latou manaʻoga patino. I se taimi mulimuli ane, atonu o le a mafai ona avea lea vaega ma faapotopotoga. O le a faamalieina Ieova, pe a faatatauina pea e i latou uma taʻiala mai i le faalapotopotoga.​—1 Kori. 1:10; 3:5, 6.

TALAʻIGA E FAIA O SE VAEGA

⁴⁵ Ua iai i Kerisiano tuuina atu se tiute tauave o le faaoo atu lea o le tala lelei i isi. E tele auala e faia ai lenei mea, ae o le toʻatele lava o i tatou, e talisapaia le galulue faatasi ma isi i le faiva i le fanua. (Luka 10:1) Ona o lea māfuaaga, ua feiloaʻi ai faapotopotoga mo faatasiga mo le talaʻiga i le faaiʻuga o le vaiaso, ma a o faagasolo foʻi le vaiaso. O aso mālōlō a le lalolagi, o isi taimi lelei ia e maua ai avanoa mo talaʻiga o se vaega, auā e toʻatele le ʻautalaʻi e maua ai avanoa mai i a latou galuega. O le Komiti o le Auaunaga o le Faapotopotoga e faatulagaina taimi ma nofoaga talafeagai, mo faatasiga mo le talaʻiga i taimi o le aso ma le afiafi.

⁴⁶ O talaʻiga e faia o se vaega, e mafai ai e tagata talaʻi ona galulue faatasi ma “fefaalaeiauaʻi ai.” (Roma 1:12) E mafai e tagata talaʻi fou ona galulue ma tagata talaʻi agavaa ma tomai, ma latou maua mai ai toleniga. I nisi o vaipanoa, atonu o se mea lelei le galulue faatasi o ni tagata talaʻi se toʻalua pe sili atu, ina ia maua ai pea le saogalemu. Pe afai o loo e fuafua e te galue na o oe i le oganuu, o lou auai atu i le faatasiga mo le talaʻiga, o le a mafai ona avea ma faalaeiauga mo i latou uma o le a auai. O le tau lava ina iloa o loo iai isi o loo galulue i le faiva i le fanua i lea oganuu, e mafai ona tatou maua ai se uiga mautinoa. O paeonia ma isi tagata talaʻi, e lē tatau ona manatu e tatau lava ona auai i faatasiga uma mo le talaʻiga ua faatulaga e le faapotopotoga, aemaise lava pe a faia nei faatasiga i aso uma. Peitaʻi, e talafeagai lava ona latou lagolagoina nisi o na faatasiga mo le talaʻiga i vaiaso taʻitasi.

⁴⁷ Tau ina ia tatou mulimuli uma atu i le faaaʻoaʻoga na faataatia e Iesu ma ona aposetolo! E tatou te mautinoa foʻi e faamanuia mai Ieova i a tatou taumafaiga, ina ia faia se sao atoatoa i le galuega tāua o le talaʻia o le tala lelei o le Malo.​—Luka 9:57-62.