Taulimaga Faataʻitaʻi

Ina ia Amata se Suʻesuʻega Faale-Tusi Paia i le Aso Toonaʻi Muamua o Setema

“E toʻatele tagata e talitonu i agelu, ae ā oe? [Faatali mo se tali.] O agelu o ni meafaiola agaga ma e malolosi tele. Ae o le ā sou manatu, pe e mafai ona latou fesoasoani mai iā i tatou? Ua taʻua i le Tusi Paia le auala ua latou fesoasoani ai i tagata i aso nei.” Faaali i ai le pito i tua o le Olomatamata o Setema, ma talanoa i le mataupu i lalo o le fesili muamua ma se mau se tasi. Ofo mekasini ma faatulaga e toe foʻi e talanoa i le isi fesili.

Le Olomatamata Setema 1

“Pe e te manatu o le a faaumatia atoatoa e tagata le lalolagi? [Faatali mo se tali.] E ui lava e lē mafai e tagata ona toe faaleleia mea ua latou faaleagaina, ae ua taʻu mai e le Tusi Paia, e mafai e le Atua ona toe faaleleia mea ma e finagalo o ia e faia faapea. E tatou te maua lenā faamautinoaga i le Salamo 65:9. [Faitau.] O loo talanoaina i lenei lomiga o Le Olomatamata le auala o le a tausia ai e le Atua le lalolagi, ma le auala e tatou te maua ai na faamanuiaga i le lumanaʻi. Pe e te manaʻo e tuu le lomiga e te faitau ai?”

Ala Mai! Iulai-Setema

“I aso nei, e toʻatele talavou ua alu uma lo latou taimi i le faaaogāina o le Initaneti, ma e masani ona latou soona faailoa atu ai faamatalaga e uiga iā i latou lava. E faapefea ona tatou aʻoaʻoina fanau talavou ina ia faaeteete pe a faaaogā le Initaneti? [Faatali mo se tali.] O se tasi lenei o fautuaga atamai mai i le Tusi Paia e mafai ona fesoasoani ai i talavou, ina ia mafaufau muamua a o leʻi tuuina se faamatalaga i le Initaneti. [Faitau le Faataoto 10:23.] O loo talanoaina i le itulau e 10 o lenei mekasini, mea e mafai ona e faia ina ia aʻoaʻo ai lau tama talavou e faaalia le faaeteete.”