Batisisa Ziviso Yapachena Yetariro Yako Isingazununguki
1 Fundo yeNharireyomurindi mutoo mukuru uyo “zvokudya [zvomudzimu] panguva yakafanira” zvinogoverwa kupfurikidza nawo nokuda kwavanhu vaMwari nhasi. (Mat. 24:45, NW) Tinopinda uyu musangano unokosha namadonzo makuru maviri—kuti tivakwe mumudzimu nokuita ziviso yapachena yetariro yedu kuna vamwe.—VaH. 10:23-25.
2 Kuzvibetsera Timene: Kunofungidzirwa kuti muungano zhinjisa chikamu chimwe bedzi chezvitatu chavateereri chinofunda chidzidzo chacho pachine nguva mberi. Chinenge chiverengero chimwe chetecho chinogoverana mukutsinhira. Zvokudya zvomudzimu zvikukutu zvinopiwa muFundo yeNharireyomurindi hazvigoni kudzeyiwa zvizere mukati momusangano iwo umene. Unofanira kutsaura nguva yokufunda mashoko acho pachine nguva mberi.
3 Pakugadzirira fundo yacho, ungakuwana kuchibetsera kutanga kurava ndokufunga pamusoro pemibvunzo iri mubhokisi riri pedyo nomugumo wenyaya yacho. Iyoyi inogona kubetsera kunangidzira ngwariro yako pamapfundo makuru acharangarirwa muchidzidzo chacho.
4 Mukati mefundo sanoteerera zvinotaurwa. Ipa ngwariro kutsinhiro dzokutanga dzomuitisi; tsinhiro idzodzi dzinotungamirira kufundo yacho. Iye angabvunza mibvunzo mitatu kana kuti mina ichapindurwa, kana kuti angahwirudzura mapfundo makuru omuchidzidzo chevhiki rakapfuura kana chevhiki rino chiri kupfuuridzirwa kwenhau imwe cheteyo. Kana pane gadziridzo yakati mukunzwisisa kwedu uporofita hweBhaibheri kana kuti nheyo yapaMagwaro, achadanira ikoku kungwariro yedu. Chokwadika, tsinhiro dzinoitwa nomuitisi dzinofanira kuva pfupi, sezvo rimwe donzo refundo riri rokupa ungano banza rokuzivisa tariro yavo. Sanoteerera sezvo vamwe vanotsinhira pamusoro pezvavakadzidza; ikoku kunogona kubetsera kusimbisa kutenda kwako.
5 Zivisa Tariro Yako: Unopa nguva dzose tsinhiro mukati mefundo here? Tsinhiro pfupi, dzakananga dzinodikanwa. (Enzanisa naRuka 21:1-4.) Tsinhiro yakapfava inobva mumwoyo inoongwa navose. Kazhinji kazhinji tsinhiro yokutanga pamusoro pomubvunzo inofanira kuva pfupi neyakananga. Ikoku kunobvumira vamwe kududza rugwaro kana kuti kukwevera ngwariro kuudzame hwakati mundima yacho. Neiyi nzira vakawanda vanogona kuita ziviso yapachena yetariro yavo. Tsinhiro nguva dzose dzinofanira kuva dzakanaka nedzinovaka.
6 Kana uchangobva kutanga kupinda fundo yacho kana kuti kana uchitya pamusoro pokutsinhira, ungada kukumbira muitisi nokuda kworubatsiro. Mukumbire kutsvaka ruoko rwako apo ndima yakati inorangarirwa. Zvichida unogona kuzvipira kurava rugwaro rwakanongedzerwa ndokuita tsananguro pfupi yerevo yarwo. Ungaita zvinonyorwa zvishomanene mumucheto kuti zvikubetsere kuyeuka zvaunoda kutaura apo unotsinhira. Kana uri wechiduku, yeuka kuti tsinhiro dzako dzinogamuchirwa uye dzinoongwa.—Mat. 21:16.
7 Kunokosha kuti tizivise kutenda kwedu, uye Fundo yeNharireyomurindi inogovera banza rakaisvonaka rokuita saizvozvo. Kana uchizengurira kutsinhira, ita zvaunogona kuti ukurire chinetso chacho, uye zviite umene kuti upe mhinduro imwe zvayo. Uchave wapa chimwe chinhu kumusangano wacho, uye uchanzwa zviri nani nokuda kwako. Naizvozvo kuregererei kuronga kupa tsinhiro imwe zvayo paFundo yeNharireyomurindi inotevera imene?—Zvir. 15:23.