Makomborero Atinowana Kana Tikabatsira Vamwe

Pasi rese vanhu vakawanda havana zvekudya uye pekugara. Vamwe vavo vanogona kunyaradzwa nekungonzwa mashoko anovapa tariro. Mwari anoda kuti titsvage vanhu vakadaro tovabatsira uye tikadaro achatikomborera.

ZVINOTAURWA NEBHAIBHERI

“Anonzwira tsitsi munhu akaderera anenge achikweretesa Jehovha, uye iye achamuripa zvaanoita.”—ZVIREVO 19:17.

TINGABATSIRA SEI VAMWE?

Jesu akataura imwe nyaya yemurume akarohwa nemakororo akasiyiwa ava kuda kufa. (Ruka 10:29-37) Mumwe murume akanga achingozvipfuurirawo akamira achibva abatsira murume uyu ainge akuvadzwa zvakaipisisa. Akamubatsira pasinei nekuti vakanga vari verudzi rwakasiyana.

Murume uyu aiva nemwoyo wakanaka haana kungogumira pakumusunga maronda uye kumubhadharira mari yekuti arapwe, asi akamunyaradza.

Nyaya iyi inotidzidzisei? Jesu airatidza kuti tinofanira kuita zvese zvatinogona kuti tibatsirewo vamwe. (Zvirevo 14:31) Bhaibheri rinodzidzisa kuti Mwari ava pedyo kubvisa urombo uye kutambura. Asi tinogona kuzvibvunza kuti achazviita riini uye sei? Nyaya inotevera inoratidza makomborero awakachengeterwa neMusiki wako ane rudo.