Haungadi Kurasikirwa Nayo!
KURASIKIRWA nei? NeKokorodzano Yoruwa yeZvapupu zvaJehovha ye“Vaiti veShoko raMwari”! Kokorodzano dzakatevedzana idzi, dzakatanga muna May muUnited States, dzichaitwa mumazana amaguta munyika yose kwemwedzi inoverengeka iri kutevera. Munzvimbo dzakawanda purogiramu yacho ichatanga musi weChishanu mangwanani na9:30 nepurogiramu yenziyo.
Pashure pokuzarura nokukurudzira kuteerera zvinotaura Shoko raMwari, purogiramu yamangwanani ichapfuurira nehurukuro dzinoti “Penyai Norunako rwaJehovha” uye “Ramba Wakatsiga Sounoona Uyo Asingaoneki.” Zvadaro purogiramu yamangwanani ichaguma nehurukuro chaiyo yekokorodzano inoti, “Rumbidzai Jehovha—Muiti Wezvinhu Zvinoshamisa.”
Hurukuro yokutanga yechikamu chamasikati inoti, “Musarega Kuita Zvakanaka Kwazvo,” ichateverwa nehurukuro yokusiyirana ine zvikamu zvitatu pamusoro pamasarudzirwe angaitwa wokuroorana naye, kuvaka mhuri yakasimba mumudzimu, uye kudzidzisa vana kuda Jehovha. Hurukuro yokupedzisa zuva racho inoti, “Kuramba Uchifambirana Nesangano raJehovha,” ichaongorora kufambira mberi kwave kuchingoitika mukunzwisiswa kwezvinangwa zvaMwari munguva dzino.
Purogiramu yamangwanani oMugovera ine hurukuro yokusiyirana yechipiri ine zvikamu zvitatu, ine musoro unoti “Vashumiri veShoko raMwari.” Iyi ichapa mazano emaitire atingaita basa redu rokuita vadzidzi. Zvadaro pachava nehurukuro inonyevenutsa mwoyo inoti “Kusanyadzisa Mwari.” Kana yapera pachauya hurukuro yorubhabhatidzo, uye mukana wokubhabhatidzwa uchapiwa kune vaya vanokwanisa.
Ava masikati hurukuro yokusiyirana yechitatu ine zvikamu zvitatu ichasimbisa musoro wokuti “Shanda Nesimba Kuti Ukudziridze Kukura Mumudzimu,” muhurukuro yacho mazano anoshanda achapiwawo pamusoro pokuti kuva munhu womudzimu kungakudziridzwa sei. Chikamu chacho chichaguma nehurukuro inopa kunzwisisa zvinhu zvomudzimu inoti “Kufamba Muchiedza Chinoramba Chichijeka cheShoko raMwari.” Ichakurukura Isaya zvitsauko 25 neIsaya 26 uye icharondedzera kuti tinganzwisisa zviri nani sei bhuku reBhaibheri iri rinonakidza kwazvo.
Mangwanani eSvondo achavawo nehurukuro yokusiyirana yokupedzisira ine zvikamu zvitatu ine musoro unoti “Uprofita hwaZefania Hune Zvahunoreva Kune Vanoita Kuda kwaMwari.” Ichatsanangura kuti uprofita ihwohwo hwakashanda sei munguva dzakare kurudzi rweJudha uye kuti hunoshanda sei muzuva redu, kunyanya kuzvitendero zvenyika ino. Zvadaro uchanakidzwa nomutambo wavanhu vakapfeka zvipfeko zvenguva yavanhu vanotaurwa muBhaibheri unoti “Mienzaniso Yokutinyevera Muzuva Redu,” unotaura nezvounzenza hwavarume vechiIsraeri nguva pfupi vaIsraeri vasati vapinda muNyika Yakapikirwa. Chinhu chikuru chechikamu chokupedzisira chekokorodzano musi weSvondo masikati ichava hurukuro yavose inoti, “Chikonzero Nei Tichifanira Kufunga Nezvamabasa aMwari Anoshamisa.”
Gadzirira zvino kupinda mazuva ose matatu. Kuti uwane nzvimbo iri pedyo nomusha wako, enda kuHoro yoUmambo yeZvapupu zvaJehovha yomunharaunda kana kunyorera vabudisi vemagazini ino.