Zvinotaura Bhaibheri

Zvaunofanira Kuziva Maererano neKrisimasi

MAMIRIYONI evanhu pasi pose ari kugadzirira kupemberera Krisimasi muna 2002. Zvichida uri mumwe wavo. Kana kuti ingasava tsika yako kubatanidzwa muzvinoitwa zvechitendero pamhemberero yakakurumbira iyi. Chero zvazviri, zvichida ungasakwanisa kunzvenga zvinoitwa maererano neKrisimasi. Zvakapararira mune zvokutengeserana uye zvevaraidzo zvepasi pano, kunyange kunyika dzisiri dzechiKristu.

Chii chaunoziva maererano neKrisimasi? Kupemberera kuberekwa kwaKristu kunotsigirwa neBhaibheri here? Chii chiri seri kwemhemberero yakakurumbira iyi inoitwa gore rimwe nerimwe musi waDecember 25?

Krisimasi Yakarambidzwa

Kana ukapedza kanguva uchiongorora nyaya iyi, uchaona kuti Krisimasi haina kutanga nechiKristu chechokwadi. Nyanzvi zhinji dzeBhaibheri dzezvitendero zvakasiyana-siyana dzinobvuma izvi. Saka hazvifaniri kukushamisa kuti muEngland, Paramende yaCromwell yakadzika mutemo muna 1647 wokuti Krisimasi rive zuva rokutendeuka pazvitadzo uye yakabva yairambidza zvachose muna 1652. Paramende yakaungana nemaune musi waDecember 25 gore rimwe nerimwe kubva muna 1644 kusvika muna 1656. Maererano nomudzidzi wezvakaitika kare anonzi Penne L. Restad, “vafundisi vaiparidza zvakaitika nezvokuzvarwa kwaJesu vaikwanisa kuiswa mujeri. Vatarisiri vemachechi vaikwanisa kubvisiswa faindi kana vakashongedza machechi avo. Mutemo waiti zvitoro zvinofanira kuramba zvakavhurwa musi weKrisimasi sokunge kuti rakanga riri rimwewo zuva rokuita basa.” Nei pakadzikwa mitemo yakaoma zvakadaro? Vaida kuchinja zvinhu vechechi yePuritan vaidavira kuti chechi haifaniri kuvamba tsika dzakanga dzisiri muMagwaro. Vakaparidza zvakasimba uye vakagovera mabhuku aishora kupemberera Krisimasi.

Maonero akaita seaya akanga arikowo kuNorth America. Pakati pemakore a1659 na1681, Krisimasi yakarambidzwa muMassachusetts Bay Colony.a Maererano nomutemo wakadzikwa panguva iyoyo, Krisimasi yaisafanira kuchengetwa chero munzira ipi neipi. Vaityora mutemo uyu vaibvisiswa faindi. Havasi vaPuritan chete vaiva muNew England vakanga vasiri kufara nokupemberera Krisimasi asiwo mamwe mapoka munyika dzaiva nechepakati. VaQuaker vomuPennsylvania vakanga vakashinga kufanana nevaPuritan mumaonero avaiita mhemberero yacho. Rimwe bhuku rinoti “nguva pfupi pashure pokunge vanhu vokuAmerica vawana kuzvitonga, Elizabeth Drinker, akanga ari muQuaker, akakamura vagari vomuPhiladelphia kuva mapoka matatu. Kwakanga kuine vaQuaker, avo vakanga ‘vasina basa ne[Krisimasi] kufanana nerimwe zuva ripi neripi,’ vaya vaiipemberera nokuti vakanga vari vatenderi, uye ruzhinji rwakanga ruchiipemberera ruchiita mhirizhonga uye kudhakwa.’”

Henry Ward Beecher, muparidzi anozivikanwa zvikuru wokuAmerica uyo akarerwa mumhuri yevaCalvinist, akanga asingazivi zvakawanda nezveKrisimasi kusvika ava nemakore 30. “Kwandiri Krisimasi yakanga isina basa,” akanyora kudaro Beecher muna 1874.

Machechi epakutanga evaBaptist neevaCongregationalist akashayawo Magwaro aitsigira kupembererwa kwokuberekwa kwaKristu. Rimwe bhuku rinoti Baptist Church yomuNewport mu[Rhode Island] yakatozotanga kupemberera Krisimasi musi waDecember 25, 1772. Aya akanga ava anenge makore 130 kubva pakaumbwa chechi yeBaptist muNew England.

Mavambo eKrisimasi

New Catholic Encyclopedia inobvuma kuti: “Zuva rokuberekwa kwaKristu harizivikanwi. Evhangeri hadziratidzi zuva racho kana mwedzi wacho . . . Maererano nokufungidzira kwakaitwa naH. Usener . . . uye zvinobvumwa nenyanzvi zhinji mazuva ano, zuva rokuberekwa kwaKristu rakaiswa panguva yomuchando apo zuva rinenge riri kure zvikuru nepakati penyika (December 25 paJulian Calendar, January 6 paEgyptian Calendar), nokuti pazuva iri, sezvo zuva rakanga rava kutanga kudzoka kuchamhembe, vanamati vechihedheni vakazvipira vaMithra vaipemberera dies natalis Solis Invicti (musi wokuberekwa kwezuva risingakundiki). Musi waDec. 25, 274, Aurelian akanga ataura kuti zuva rainamatwa ndiro mumiriri mukuru wehurumende uye akanga atsaurira temberi kwariri muCampus Martius. Krisimasi yakatanga panguva apo kunamatwa kwezuva kwakanga kwakanyanya muRoma.”

Cyclopœdia yaM’Clintock naStrong inoti: “Kuchengetwa kweKrisimasi hakuna kutangwa naMwari, uye hakuwanikwi muT[estamende] I[tsva]. Zuva rokuberekwa kwaKristu harikwanisi kuzivikanwa kubva muT[estamende] I[tsva], uye harikwanisi kuzivikanwa kubva kumwe kupi nokupi.”

“Unyengeri Husina Maturo”

Tichifunga zviri pamusoro apa, vaKristu vechokwadi vanofanira kubatanidzwa mutsika dzeKrisimasi here? Zvinofadza Mwari here kubatanidza kunamatwa kwake nezvinodavirwa muzvitendero uye miitiro yeavo vasingamunamati? Muapostora Pauro akanyevera pana VaKorose 2:8 kuti: “Chenjerai: zvichida pangava nomumwe munhu angaenda nemi semhuka yake yaabata nouzivi uye nounyengeri husina maturo maererano netsika dzevanhu, maererano nezvinhu zvepakutanga zvenyika uye kwete maererano naKristu.”

Muapostora akanyorawo kuti: “Musasungwa zvisina kufanira pajoko nevasingatendi. Nokuti kururama kune ushamwari hwei nokusateerera mutemo? Kana kuti chiedza chine mugove wei nerima? Uyezve, itsinhiranoi iripo pakati paKristu naBheriari [Satani]? Kana kuti munhu akatendeka ane mugove wei neasingatendi?”—2 VaKorinde 6:14, 15.

Nemhaka youchapupu husingarambiki huripo, Zvapupu zvaJehovha zvinorega kubatanidzwa mumhemberero dzeKrisimasi. Kuwirirana neMagwaro, vanoedza kuva no“kunamata kwakachena uye kusina mhosva mukuona kwaMwari wedu,” kuburikidza nokuzvichengeta “vasina ruvara rwenyika.”—Jakobho 1:27.

[Mashoko Omuzasi]

[Mashoko okukwezva vaverengi ari papeji 24]

Paramende yomuEngland yakarambidza Krisimasi muna 1652

[Mashoko okukwezva vaverengi ari papeji 25]

“Kwandiri Krisimasi yakanga isina basa”—HENRY WARD BEECHER, MUFUNDISI WOKUAMERICA

[Mufananidzo uri papeji 25]

Vanamati vechihedheni vakazvipira vaMithras uye vamwari wezuva (vari muchivezwa) vaipemberera musi waDecember 25

[Kwazvakatorwa]

Musée du Louvre, Paris