2. Ndisu Tinokonzera Kutambura Kwedu Here?
Nei Zvichikosha Kuti Tizive Mhinduro Yacho?
Kana tiri isu tinokonzera matambudziko edu, zvinorevawo kuti tinogona kuagadzirisa tega.
Imbofunga Izvi
Zvii zviri kuitwa nevanhu zviri kukonzera matambudziko anotevera?
Kushungurudzwa.
Sangano reWorld Health Organization (WHO), rinofungidzira kuti pavanhu vakuru 4 vega vega, mumwe chete akamborohwa zveutsinye paaiva mwana. Rinotiwo pavanhukadzi 3 vega vega, mumwe chete akamboshungurudzwa pabonde kana kurohwa zveutsinye.
Kufa Kwevanhu.
Bhuku rinonzi World Health Statistics 2018, rakabudiswa nesangano reWHO rinoti: “Zvinofungidzirwa kuti vanhu 477 000 vakapondwa pasi rese mugore ra2016.” Kunewo vamwe vanhu 180 000 vanofungidzirwa kuti vakaurayiwa muhondo dzakarwiwa gore iroro.
Zvirwere.
Nyaya yakabuda mumagazini inonzi National Geographic, yakanyorwa naFran Smith yakati: “Vanhu vanopfuura 1 bhiriyoni vanoputa uye fodya ndiyo iri kukonzera zvirwere zvinonyanya kuuraya vanhu, zvakadai sechirwere chemwoyo, sitiroko, kenza yemapapu nezvimwewo.”
Rusaruro.
Chiremba anonzi Jay Watts, akati: “Urombo, kutarisirwa pasi, rusarura ganda, kusarurwa nemhaka yekuti uri munhurume kana kuti munhukadzi, kutamiswa paunogara uye mweya wemakwikwi zvese izvi zvinoita kuti vanhu vawedzere kushushikana.”
DZIDZA ZVIMWE
Ona vhidhiyo inonzi Mwari Akasikirei Nyika? iri pawebsite yedu inonzi jw.org.
Zvinotaurwa neBhaibheri
Matambudziko akawanda anokonzerwa nevanhu.
Dzimwe hurumende dzinotaura kuti dziri kubatsira vanhu asi dzichitoita kuti vaomerwe neupenyu.
‘Munhu anotonga mumwe munhu achimubata zvakaipa.’—MUPARIDZI 8:9.
Matambudziko anogona kuderedzwa.
Bhaibheri rinotibatsira kuti tive neutano hwakanaka uye kuti tigarisane nevamwe zvakanaka.
“Mwoyo wakadzikama unopa upenyu kumuviri, asi godo rinoodza mapfupa.”—ZVIREVO 14:30.
“Bvisai kuvengana kwese, kutsamwa, hasha, kupopota, nekutuka pamwe chete nezvinhu zvese zvakaipa.”—VAEFESO 4:31.