“Kudzidzisa Kwoumwari” Kokorodzano Dzoruwa
VOSE avo vanoshuva kudzidziswa naJehovha vanokarira nokudisa “Kudzidzisa Kwoumwari” Kokorodzano Dzoruwa. Purogiramu yamazuva mana ichasimbisa mativi anokosha okudzidzisa kwapaMagwaro uko kunotaviridza maKristu munguva dzino dzezvinetso zvomunhu oga zvinokura nenyongano yenyika. Purogiramu yacho ichabetsera kukurira zvakasimba ‘chipi kana chipi chinorwisana nokudzidzisa kwakanaka.’ (1 Timotio 1:10) Ichakurudzirawo vose vanopinda kuva vadzidzisi vari nani veShoko raMwari.
Mienzaniso yakaisvonaka zvakadini yatinayo yokutevedzera! Mudzidzisi Mukurusa haasati ari mumwe kunze kwaJehovha Mwari amene! Nokudaro, Erihu akataura nenzira yakarurama kuna Jobho kuti Jehovha “Iye unotidzidzisa kupfuura mhuka dzenyika, unotiita vakachenjera kupfuura shiri dzokudenga.” Iye akabvunzawo pamusoro paJehovha, kuti: “Ndiani ari muraidzi akafanana naye?” (Jobho 35:11; 36:22, NW) Mwari anonongedzerwa kwaari pana Isaya 30:20, (NW) so“Muraidzi Mukuru.”
Wechipiri bedzi kuna Jehovha somudzidzisi ndiye Mwanakomana wake, Jesu Kristu. Iye akazivikanwa so“Mudzidzisi” uye so“Muraidzi,” achinongedzerwa kwaari saakadaro ka 50 muEvhangeri. Pasinei zvapo nokuporesa kwake kunoshamisa kwakawanda namamwe manenji, Jesu haana kuzivikanwa saChiremba asi soMudzidzisi, Muraidzi.—Mateo 8:19; Ruka 5:5; Johane 13:13.
Nenzira yakakodzera zvikurusa, Jesu akadzidzisa vadzidzi vake navaapostora kuva vadzidzisi sezvaakanga akaita. Tinogona kuona ikoku muna Mateo 10:5 kusvikira ku 11:1 uye Ruka 10:1-11. Chinguvana asati akwira kudenga, Jesu akapa vadzidzi vake basa rokudzidzisa rinosanozivikanwa rakanyorwa pana Mateo 28:19, 20, (NW): “Endai naizvozvo muite vadzidzi vavanhu vamarudzi ose, muchivabhapatidza muzita raBaba neroMwanakomana neromudzimu mutsvene, muchivadzidzisa kuchengeta zvinhu zvose zvandakakurairai.” Bhuku raMabasa, pamwe chete netsamba dzakafuridzirwa dzinoritevera muMagwaro akafuridzirwa echiKristu echiGiriki, rinorondedzera kuti vateveri vapakuvamba vaJesu vakaita iri basa rokudzidzisa nenzira yokushingaira, younyanzvi, uye nokutendeka sei.
Iri basa rokudzidzisa rinokosha zvikuru nhasi kupfuura nakare kose. Tiri kurarama mumazuva okupedzisira etsika ino yezvinhu, uye nemhaka yaikoko, upenyu hunobatanidzwa. Kuti vanhu vasagoverane muzvivi zveBhabhironi Guru ndokugamuchira rutivi rwamadambudziko aro, ivo vanofanira kudzidziswa ndokubetserwa kubuda muBhabhironi ndokutsigira Jehovha noUmambo hwake.—Zvakazarurwa 18:4.
Kuti ayamure vose veZvapupu zvaJehovha munhamburiko yazvo yokuita basa ravo rokudzidzisa, Jehovha kupfurikidza nesangano rake akagovera “Kudzidzisa Kwoumwari” Kokorodzano Dzoruwa. Idzi kokorodzano dzamazuva mana dzichavamba muNorthern Hemisphere mukuvamba kwezhezha ra 1993. Mubatiri mumwe nomumwe akazvitsaurira waJehovha ngaave nechokwadi chokuti anopinda inenge zvayo imwe yeidzi kokorodzano, achivapo ndokuteerera kuvambira parwiyo rwokutanga nomunyengetero paChina masikati kutozosvikira pamunyengetero wokupfiga paSvondo masikati.