NYAYA IRI PAKAVHA | UNGADA HERE KUDZIDZA BHAIBHERI?

Chirongwa Chekudzidza Bhaibheri Chemunhu Wose

Zvapupu zvaJehovha zvinozivikanwa nekuparidza. Asi waizviziva here kuti tinewo chirongwa chekudzidzisa vanhu Bhaibheri chinoitwa munyika yose?

Murume ari kudzidziswa Bhaibheri ari kubasa kwake

Muna 2014, Zvapupu zvinopfuura mamiriyoni 8, zviri munyika 240, zvakaitisa zvidzidzo zveBhaibheri zvingasvika 9 500 000 mwedzi mumwe nemumwe.a Kutaura zvazviri, nhamba yevanhu vatinodzidza navo Bhaibheri inotopfuura nhamba yevanhu vanogara mune imwe neimwe yenyika dzinenge 140!

Kuti zviite basa iri rokudzidzisa vanhu, gore negore Zvapupu zvaJehovha zvinobudisa zvinyorwa zvingasvika bhiriyoni nehafu zvakadai semaBhaibheri, mabhuku, magazini, nezvimwewo zvinobatsira pakudzidza Bhaibheri, mumitauro inenge 700. Basa iri risina raringaenzaniswa naro rinobatsira vanhu kuti vadzidze Bhaibheri mumutauro wavanoda.

“Kuchikoro ndaisambofarira zvemabhuku, asi kudzidza Bhaibheri kwaindinakidza. Uye zvandaidzidza zvaindisimbisa!”—Katlego, South Africa.

“Kudzidza Bhaibheri kwakapindura mibvunzo yangu yese neimwewo yakawanda.”—Bertha, Mexico.

“Chidzidzo chacho chaiitirwa kumba kwangu panguva yakandinakira. Unenge uchazodei!”—Eziquiel, Brazil.

“Dzimwe nguva taitora maminitsi 15 kusvika ku30 tichidzidza, pamwe pacho taitopfuura ipapo, zvichingoenderana nezvakandinakira.”—Viniana, Australia.

“Hapana mari yandakabhadhara pakuitiswa zvidzidzo izvi uye zvainakidza!”—Aimé, Benin.

“Munhu aindidzidzisa Bhaibheri aiva nemwoyo murefu nemutsa. Takapedzisira tava tsika nditsikewo.”—Karen, Northern Ireland.

“Kune vakawanda vanodzidza Bhaibheri asi vasingazovi Zvapupu.”—Denton, England.

MHINDURO DZEMIBVUNZO INOWANZOBVUNZWA NEZVECHIRONGWA CHEDU CHEKUDZIDZA NEVANHU BHAIBHERI

Chidzidzo chacho chinoitwa sei?

Tinokurukura misoro yakasiyana-siyana, tichiongorora kuti Bhaibheri rinotii nezvayo. Ngatimbotii tiri kuda kukurukura musoro unoti: Mwari. Somuenzaniso, Bhaibheri rinopindura mibvunzo yakadai seyekuti: Mwari ndiani? Akaita sei? Ane zita here? Anogara kupi? Tinogona here kuswedera pedyo naye? Dambudziko riri pakuti munhu angawana mhinduro dzacho papi muBhaibheri.

Kuti tibatsire vanhu kuwana mhinduro, tinowanzoshandisa bhuku rine mapeji 224 rinonzi Bhaibheri Rinombodzidzisei Chaizvo?b Rakanyorwa kuti ribatsire vanhu kunzwisisa dzidziso dzeBhaibheri dzavanofanira kutanga kuziva. Zvidzidzo zvirimo zvinotaura nezvaMwari, Jesu Kristu, kutambura kwevanhu, kumutswa kwevakafa, kunyengetera nezvimwewo.

Chidzidzo chacho chinogona kuitwa riini uye kupi?

Chidzidzo chacho chinogona kuitwa panguva nenzvimbo zvakakunakirai.

Chidzidzo chimwe nechimwe chinoitwa kwenguva yakareba sei?

Vanhu vakawanda vanosarudza kudzidza Bhaibheri kweinenge awa imwe chete pavhiki. Asi munhu ega ega anosarudza kuti anoda kudzidza kwenguva yakareba sei. Tinodzidza newe kwenguva yaunenge wasarudza. Vamwe vanongodzidza kwemaminitsi 10 kana 15 pavhiki.

Chirongwa chacho chekudzidza chinoita marii?

Chirongwa ichi nemabhuku anoshandiswa pakudzidza hazvibhadhariswi. Izvi zvinoenderana nemashoko akataurwa naJesu kuvadzidzi vake okuti: “Makagamuchira pachena, ipai pachena.”—Mateu 10:8.

Chirongwa chacho chinoitwa kwenguva yakareba sei?

Unogona kudzidza kusvika paunoda. Bhuku raBhaibheri Rinombodzidzisei Chaizvo? rine zvidzidzo 19. Unogona kudzidza zvimwe zvacho kana kuti zvese zvichienderana nezvaunokwanisa.

Ndinotofanira kubva ndaita mumwe weZvapupu zvaJehovha here?

Kwete. Tinoremekedza kodzero yemunhu mumwe nemumwe yekusarudza zvaanoda kutenda. Asi kana vanhu vakanzwisisa dzidziso dzeBhaibheri huru vanenge vava kuziva kuti vosarudza zvipi.

Ndingawanepi mamwe mashoko?

Nzvimbo yepaIndaneti inonzi jw.org ine mashoko echokwadi pamusoro pedzidziso uye zvinoitwa neZvapupu zvaJehovha.

Ndingaita sei kuti ndibatsirwe kudzidza Bhaibheri?

Zadza fomu riri pawww.pr2711.com rekukumbira kudzidza Bhaibheri.
Sarudza kero iri pedyo newe pane dziri papeji 2 yemagazini ino, wonyora uchikumbira kudzidza.
Tsvaga Zvapupu zvaJehovha zviri pedyo newe.

a Chidzidzo cheBhaibheri chinogona kuitiswa munhu mumwe chete kana kuti boka diki revanhu.

b Bhuku iri rakabudiswa neZvapupu zvaJehovha. Rinowanikwa mumitauro inopfuura 260 uye kusvika pari zvino, pakapirindwa anopfuura mamiriyoni 230.

KUBATSIRWA KURI KUITA MHURI

“Mudzimai wangu paakatanga kudzidza Bhaibheri, ndakaona kuti akatanga kuchinja chaizvo. Upenyu hwemhuri yedu hwakavandudzika. Ndaida kuziva kuti ari kudzidza nezvei, saka ndakatangawo kudzidza. Zvandaidzidza zvakandibatsira kuti ndivandudze upenyu hwangu. Kudzidza Bhaibheri kwakaita kuti mhuri yedu ibatane.”—Eziquiel.

“Pandakatanga kudzidza Bhaibheri, ndakabva ndasiya zvekushandisa madhiragi nekudhakwa, uye ndakadzidza kudzora hasha dzangu. Iye zvino mumba mangu mava kugara makachena. Ndakawedzera kuda kwandinoita mhuri yangu, uye ndinoita zvinhu zvinoita kuti ifare. Ndava kunyatsofara.”—Karen.

“Vamwe vanhu vaindishora kuti ndiri kudzidza Bhaibheri. Asi murume wangu ainditsigira achiti: ‘Handina basa nezvinotaurwa nevanhu. Zvakanaka zvauri kuita ndizvo zvandinoda. Ramba uchidzidza.’ Iye zvino tava kugarisana zvakanaka kupfuura kare!”—Viniana.