Rubatsiro Rwako Runodiwa
1 “Tinotenda nezvose zvamunotiitira. Basa renyu rinotibatsira chaizvo.” Mashoko iwayo anonyatsoratidza kuonga kwatinoita vakuru vechiKristu nevashumiri vanoshumira vari pakati pedu. Sezvo sangano raMwari riri kuramba richikura, varume vakakura mumudzimu vanoramba vachidiwa kuti vashande muungano dzinoda kusvika 100 000 pasi pose. Kana uri hama yakabhabhatidzwa, rubatsiro rwako runodiwa.
2 “Kusvasvavirira”: Ungasvasvavirira sei dzimwe ropafadzo dzebasa? (1 Tim. 3:1) Nokuratidza muenzaniso wakanaka muzvose zvaunoita muupenyu hwako. (1 Tim. 4:12; Tito 2:6-8; 1 Pet. 5:3) Ita basa rokuparidzira zvizere, uye batsirawo vamwe kuti vaite saizvozvo. (2 Tim. 4:5) Farira nomwoyo wose kugara zvakanaka kwevaunonamata navo. (VaR. 12:13) Iva mudzidzi weShoko raMwari anoshingaira, uye dzidzira ‘unyanzvi hwokudzidzisa.’ (Tito 1:9; 1 Tim. 4:13) Shingaira kuita mabasa aunonzi nevakuru uite. (1 Tim. 3:10) Kana uri musoro wemhuri, ‘tungamirira mhuri yako zvakanaka.’—1 Tim. 3:4, 5, 12.
3 Kushanda somushumiri anoshumira kana kuti mukuru akagadzwa kunosanganisira basa rakaoma uye kunoda kuzvipira. (1 Tim. 5:17) Naizvozvo, paunenge uchisvasvavirira, nyanya kufunga nezvokushumira vamwe uchizvininipisa. (Mat. 20:25-28; Joh. 13:3-5, 12-17) Fungisisa nezvounhu hwaTimoti, uye edza kuhutevedzera. (VaF. 2:20-22) SaTimoti, ita kuti mufambiro wako wakanaka ukureverere. (Mab. 16:1, 2) Sezvaunokudziridza unhu hwomudzimu hunodiwa kuti uwane dzimwe ropafadzo uye kushandisa zano chero ripi zvaro raunopiwa kuti uvandudze, ‘kufambira mberi kwako kuchaonekwa nevanhu vose.’—1 Tim. 4:15.
4 Vabereki, Dzidzisai Vana Venyu Kuti Vabatsire: Vana vanogona kutanga kudzidza vachiri vaduku zvikuru. Vadzidzisei kuteerera pamisangano, kuparidza, uye kuva nomufambiro unoratidza muenzaniso wakanaka paImba yoUmambo uye kuchikoro. Vadzidzisei kuti vashumirewo vamwe, vachiita zvinhu zvakadai sokubatsira kuchenesa Imba yoUmambo, kubatsira vakwegura, zvichingodaro. Itai kuti vaone kuti kupa kunofadza sei. (Mab. 20:35) Kudzidziswa kwakadaro kungavabatsira kuti vave mapiyona, vashumiri vanoshumira nevakuru vemangwana.